#在日落前交換日記
【不要太有公德心的教學】
細細個讀書嘅時候，老師會講好多關於公德心教育嘅問題，慢慢開始發覺呢種教育嘅作用係為咗俾大家「認識」公德心嘅基本，至於有啲乜嘢公德心要「發揮」，就係我哋長大之後自己判斷嘅事，千祈唔好係唔係都發揮出嚟，尤其係當呢個世界越嚟越多人有種「我老，所以我奉旨得到優勢」嘅態度。
好簡單舉個例子，當你推門入去一個地方，細細個爸爸媽媽就會教你要推住道門比其他人都入或者出。當你認識咗咁樣做係一種公德，我哋就應該因應對方嘅態度進行對應嘅行動。
有好多人覺得人哋幫佢推埋門係應份嘅事，係奉旨嘅事，我懷疑佢哋睇得太多延禧攻略，個個都覺得自己係皇帝或者貴妃，而你班打壞後生，就因為年紀輕注定係做瓔珞呢啲小宮女嘅，係收俸祿幫佢哋推住道門嘅，所以行就一定係佢行先，仲可以慢慢行；講唔該？咩黎㗎？食得㗎？比你幫佢推住道門，簡直係恩賜嚟一樣。
搭𨋢都一樣，我見你有小朋友幫你㩒住部𨋢同等埋你，你居然會叫小朋友慢慢著鞋唔使急，大佬，係咪有必要全世界都錫晒你個仔？人哋幫你㩒住，唔該都無句都算，至少係咪應該表現出唔太好意思，快快手手入𨋢唔好阻住人？呢啲唔係舉手之勞嘅問題，而係究竟有冇人覺得呢啲舉手之勞其實都值得一句「唔該」嘅問題，係究竟識唔識基本地尊重人嘅問題。
所以由細到大得到咁多關於公德心嘅教育，真正要學嘅係幾時應該實踐，幾時唔應該實踐。
