吳安儀變身索爆鏡為卓球要四眼唔要靚
愛美是女孩的天性，不少少女為了漂亮，寧花大量金錢做手術都要脫離「四眼一族」。不過「四眼妹」形象深入民心的香港桌球女將吳安儀，卻樂於與眼鏡和Cue棍為伍，即使接受本報訪問時獲星級形象指導擺脫「四眼Look」，自認貪靚的「安儀」仍堅持：「我驚做激光矯視會影響比賽表現，唔做『四眼妹』都係等退役先諗！」
「四眼妹」一詞向來被貼上「老土」這個標籤，從小學開始已戴眼鏡的「安儀」，卻表示從不介意這個花名：「比起『四眼妹』，畀人叫做『肥妹』咪仲唔開心！」雖然「安儀」不介意「四眼」，但本報特別請來星級形象指導Akira，讓「安儀」嘗試放下眼鏡的感覺，全新造型的確令人眼前一亮。
看到「安儀」的新Look後，Akira亦不禁大讚：「佢五官端正，除咗眼鏡後，打個眼影、輕輕畫條眼線，已經可以令雙眼明亮有神好多。之後再修埋堂眉，面部輪廓就更加突出，而且佢嘅皮膚質素都唔錯，令上妝效果幾靚，我覺得佢都有明星相o架！」
激光矯視有風險退役先諗
「變身」效果良好，「安儀」卻表示：「我近視有600度，散光有400，所以戴唔到隱形眼鏡，唯一唔做『四眼妹』嘅方法就係激光矯視。不過做呢個手術有風險，如果稍有差池影響視力，會影響我嘅運動員生涯，尤其係桌球講求眼界準繩，我絕對唔會為求貪靚冒呢個險！反而退役後就可以考慮、考慮！」
問到「四眼」會否阻礙她在桌球枱上的表現，「安儀」說：「咁一定係唔戴眼鏡最好，但依家逼住戴都習慣咗，我會專登配一副無框眼鏡，咁視域會廣好多；另外亦要有可調校嘅鼻托，方便打波時伏低『瞄波』！雖然我唔怕戴眼鏡，但會怕整爛眼鏡，所以一定會帶副後備鏡喺身，咁就點都唔會『盲摸摸』！」
認識吳安儀
年 齡：22歲
身 高：1米66
體 重：58公斤
威水史：
2010年亞運團體賽金牌
兩屆世界業餘錦標賽冠軍
星級形象導師施髮術
吳安儀今次的「索女」造型好評如潮，曾為不少明星藝人化妝的Akira應記一功，這位星級形象導師談及她的改造計劃時表示：「安儀本身頭髮比較薄，放晒落嚟無咁好睇，我為佢中間嘅頭髮夾咗俗稱粟米嘅小波浪紋，以達致小小蓬鬆效果，令整體髮型更立體、更有層次感。另外，雖然佢平時係左邊分界，但我依家將佢撥去右邊，咁就可以隱藏左眉毛嘅小小瑕疵，令妝容更加完美。」
「安儀」擔心留海遮眼會阻擋視線，Akira就為她在前面頭髮打個圈撥上頭頂，除比較清爽外，亦令「安儀」臉形看來更修長。對於「安儀」的全新造型，Akira總結：「佢膚色有啲偏黑，所以眼窩位我揀咗啡金色系眼影做配襯。今次嘅形象設計，我想呈現佢比較女性化同埋青春少艾嘅一面，呢個妝偏向自然，平時出街聚會都唔會太誇張！」
讀會計得着「更愛打桌球」
香港桌球壇人材輩出，並在多個世界性賽事獲獎無數，但自從桌球項目被剔出亞運後，不少桌球好手都諗定後路，「安儀」亦不例外，目前正修讀會計高級文憑的她，將來或會成為會計師！
「安儀」表示：「雖然桌球啱啱先喺體院精英項目『續約』多4年，但4年後又點算呢？如果到時桌球跌出精英項目，咁做全職運動員就等同即時失業，所以都要為自己將來打算。自己17歲嗰年中五畢業就無讀書，全心全意去打波，但兩年前20歲時知道桌球被剔出亞運，所以我就決定重返校園讀基礎文憑，今年仲可以升讀高級文憑修讀會計，呢一切都為將來做會計師鋪路！」
不過，重返校園後，安儀表示最大得着是令自己更渴望打桌球：「要兼顧打波同讀書好困難，基本上為咗比賽，我起碼要走一半嘅堂，但我會努力補番。由於時間唔夠用，反而令我更珍惜練波嘅時間，更認真去做好每一步。」
