《一支煙的時間》
♂：早晨
♀：早晨
♂：有冇聽過一支煙的時間？
♀：用了一支煙的時間掛念誰？你食緊煙？又掛住邊個？
♂：無食，曾經我好憎煙，我老豆間中會食煙，我會教訓佢，呢種又浪費金錢又唔健康既事點解要做
♀：我細個都好唔明點解人要飲酒，又苦又唔好飲又會醉，但我聽過人講，人生有太多比酒更苦既事，當你愈經歷多，就會愈覺得酒並唔苦
♂：係，每次佢都會一個人係廚房食煙，靠住抽氣扇，每一口都吐出外面，食完就會沖涼，唔係我媽就會話佢好臭
♀：咁你既第一支煙，又有咩故事？
♂：我係澳洲做過便利店，入職要求好簡單，佢問我食唔食煙，我話唔食，佢比左半日時間我將所有煙都記低佢，記到就請，記唔到就再見，最後我記到晒，而我發現便利店最多人買既就係煙
♀：澳洲煙稅好似好重
♂：係，一包差唔多要120蚊港紙，好多衣衫襤褸既人都會用散紙湊埋一齊買一包煙，出糧個日，我買左一包煙係海邊點起，臭既，如果你有留意，應該會發現我從來唔吸入肺
♀：我唔識睇，可能我都無吸入肺，咁點解你要繼續食？
♂：係外國，有煙易結交朋友，好彩既話一支煙就可以聽到一個故事
♀：剛剛我以為你係有人想懷念，估緊係初戀定半個，但答案兩個都唔係，咁你估下我點解會食？
♂：應該唔會係掛住一個人，或者忘記一個人
♀：無錯，答案好難估，因為佢眼中既我係完美，不食人間煙火，我聽過佢好多次讚我唔食煙，所以我想鬥氣話佢知，其實佢完全唔了解我
♂：你呢個原因比起懷念人更無聊，但都非常似你會做既事
♀：你係唯一一個會同我食煙既人
♂：依家我都係，或者係疫情之下，係隱蔽地方你先可以除低口罩同我傾計
♀：想睇我個靚樣咪出聲囉，唔駛講得咁隱晦
♂：我好記得你點煙，一睇就知唔係食開
♀：咁你會唔會同我一齊唔食煙？
♂：答你唔到，我依家已經話同你一齊先食，已經好少喇
♀：好少？即係你覺得我地將來會好少見？
♂：唔係……
♀：可能仲會食多過之前，笑
♂：下次我教你彈煙頭，我有個朋友教我彈過，原來可以彈到好遠
♀：好啊，但如果比人捉到，我個千五你要幫我比埋
♂：你唔迫我戒既？
♀：習慣從來都唔應該用迫去戒，凡事都有原因，煙代表你某種需求，就好似叫個有情緒病既人唔好唔開心咁，做到既一早做左
♂：前晚太夜，我地無去燒書，最後我自己去左，仲燒左包煙比老豆，希望依家既佢唔再需要用食煙去獲得自由啦
♀：係喎……對唔住，我無左件事
♂：唔緊要，你知唔知燒一本書要幾耐，差唔多五分鐘，熱到我成身汗，睇住一本書化成灰，其實都幾心痛【圖片】
♀：咁你要加油，努力到書會賣斷，唔需要做咁心痛既事
♂：依家既你應該唔需要再食煙啦
♀：唔係喎，依家我陪你食，你食一支，我食一支，你唔食，我就唔食
♂：做乜啊，想陪我一齊死咁話？
♀：無，你食我唔食，就得我食二手煙，公平起見，我又食，有乜事都好，都大家一齊有事
♂：好，一言為定，你唔係正常人，每次用既方法都令我有驚喜
♀：比你估到我，你就係食神啦
♂：喂，我好掛住你
♀：今日終於講喇，等左你成日
♂：臨訓前想話你知，呢句我想講好耐
♀：下次你可以早少少講，講多幾次都得
♂：好，我知點做，你唔好嫌我煩就得
♀：唔煩，但你唔好形式化咁講，我會感覺到
♂：知道喇，夜喇，早少少休息，你聽日開早，晚安
♀：記性唔錯，我聽住歌訓，聽日再講，晚安
——
未睇過既朋友可以去返第一回睇
https://www.patreon.com/maydreaming/posts?filters[tag]=長傾不見&sort=published_at
Patreon跟順序排，由頭睇會比較方便
另外IG可看圖文版「有圖」
掛住一個人 在 突然之間好掛住一個人- 港澳感情事板 - Dcard 的推薦與評價
琴晚發夢，見到一個好耐冇見嘅女仔，醒左之後發覺自己突然之間好掛住佢。 其實我同佢唔算好熟，雖然由小學就識，但係大家都淨係叫識得對方，無咩事唔 ... ... <看更多>