最近成日見到有人話買英國樓... 人都未過黎，樓已經買定，我甚至懷疑個BNO簽證的其中一個要求係「在英國要有樓」。
大佬呀，唔好咁癡線啦，見到啲KOL話買樓，自己就跟埋一份。你望下人地係買樓收租投資，或者過多幾年自再考慮自住，到時候望下情況唔鍾意賣左去再買另一間你吹得佢漲呀？你呢？你一買就自住，萬一你個鄰居癡線的、萬一你住落先發現有老鼠、萬一你住落先發現由車站行返屋企條路每個月平均有一個人俾人用刀隊死、萬一你住落先發現原來風水唔好、萬一你住落先發現自己唔鍾意住house鍾意有gym有會所、萬一你住落先發現原來你唔鍾意英國...
到時候你邊有錢再買另一間屋呀？！
KOL會講大話，但數據唔會。全英國的樓價每年也只是輕輕的升幾%，對心起香港那種病態式狂升，完全係兩回事。唔好再信啲人謂咩「蘇州過後無艇搭」，要坐洗頭艇你返大陸啦，呢度係英國，大不列顛船堅炮利你幾時想上船都可以。
留意一點，我唔係叫你們唔好買樓，我係叫你地唔好頭腦發熱一窩蜂去買，因為根本唔需要咁樣去困死自己。移民本身要洗好多錢，而買屋係不必要的開支，你首先住左一年，試下自己係咪真係鍾意呢區、係咪真係決定留在英國先講啦... 大把人話要來英國來歐洲生活，還不到三四年就一把鼻涕一包眼淚的跑回香港，英國有英國的好，同樣地香港也有自己的魅力，我愛上英國，不等於你也會愛上英國。
給自己一點空間、也給自己一個機會，不要一開始就困死自己。你就算倫敦住得不高興，還可以試試曼城牛津，一口氣綁死自己的話你就少了很多轉機，租左一年，試過你真係鍾意，熟左嗰區先再買啦...
成日話要融入英國，首先要放低香港人「一定要買樓」的謎之心態吧。
#萬一你一年後識左條仔去蘇格蘭咁點算
#賣樓跟佬走咩
#租左睇定啲先
#提提大家成為英國人後最緊要長命百歲多福多壽
#未交代好啲野真係千祈唔好死
#英國有傳說中嘅遺產稅
#你唔好諗住買多幾間屋留低俾個仔
#留低嘅只會係一份心意
#政府會好多謝你
#有朋友俾左50萬英鎊遺產稅
#我都唔知點安慰佢好
#喊左出黎
