［廉價勞供］勞斯萊斯，20億市值，供股集20億，再借30億錢。股價唔冧就奇
TLDR：冇得飛，仲邊使整引擎？更加唔使買新嘅。咁勞斯萊斯可以有乜收入？賣車？冇賣好耐了。所以要大規模供股兼借錢。今年股價已跌八成幾。
1. 早兩日就寫過全日空供股（https://fbook.cc/3GR4），咁同一條（？）生態鍊嘅勞斯萊斯，都供股，亦係十分合符邏輯嘅。
2. 應該好多人知，勞斯萊斯除咗車出名，仲有係飛機引擎，仲係少數嘅英國製造業之光添。
3. 但而家上市嘅「勞斯萊斯」RR，已經冇車。車友應該知，勞斯萊斯汽車而家係寶馬嘅。不過，寶馬只係拎咗個trademark，原勞斯萊斯汽車嘅直接繼承者係Bentley—而Bentley就係德國福士嘅—所以Either way都係德國公司，應該係咁
4. 講返今日想講嘅勞斯萊斯，就係飛機引擎—仲有船同潛艇，半隻軍工股。另外仲有電力裝置，都佔唔少收入。
5. 根據中文維基所講，勞斯萊斯，「2015年6月5日總市值178.6億英鎊，是倫敦證交所主要上市公司中第28大」
6. 而家呢？喔，放假冇Bloomberg都睇到（https://bityl.co/3lhk），而家市值排到去......差不多150位（＊），踢出富時100指數是肯定的。而家市值講緊23億英鎊，230億港紙左右— 大半間維他奶咋！（都話我係維他奶KOL）
7. 搞乜？估到啦，梗係肺炎。2015年都仲有180億市值，舊年年中都仲有，不過今年股價就跌咗8成幾。飛機公司都冇得飛，唔使整引擎啦，加上唔會訂新飛機，新造引擎訂單更少。航空公司都仲話可以原地打個圈或者賣飛機餐幫補收入（實情近乎冇用），勞斯萊斯就真係靠……中國同美國國內線生意頂住了，呼。
8. 勞斯萊斯大股東是誰？以我所知……係相當分散嘅。呢種結構，冇事冇幹時被視為係良好管治，冇乜單一大股東，全部係基金持股，冇人過10%，管理層就只係專業打工仔，「即係好似匯豐咁」。但冇事還冇事，有事就冇人頂了
9. 所以原本勞斯萊斯想引入啲主權基金，坡國GIC，同埋科威特投資局。但現有啲基金股東唔制—結果決定供股。拿，再一次話你知，供股就最公平。香港啲散戶成日以為供股就仆街公司，實情只係仆街公司鍾意供股，唔係供股就仆街公司。基本邏輯。嫌供股仆街嘅，不如配新股丫？係呀，你唔使拎錢—但其實係你想科水都冇得科—而供股你都係可以唔供的。你見啲基金股東都寧願供股，就知邊樣係公平
10. 是次供股，集資20億英鎊—嘩，公司自己都係20億英鎊市值咋。每3股供10股（親愛嘅互質數供股又來了，國泰咪玩過，其實度都咁玩），供股價32便士，宣佈時大約150便士。股價當然冧。唔止，同國泰一樣，除咗供股，仲要發債同借錢，呢度再多30億英鎊，孭咁多債，股價再多個理由冧。
11. 唔止，高盛同摩根士丹利，原本應該係underwriter（包銷商，你大約可以理解為冇人要就佢地自己食），都縮一半沙，將個包銷額減半。原本包六成，而家只包三成。
12. 內幕人士（唔知係高盛摩根定勞斯萊斯）話，拿個供股時機真係唔好呀，撞正侵侵連任。如果條友輸咗唔肯走就世界大亂，所以而家大家都保守啲。「仲有未來三四年都冇人坐長途機呀」。仲有，股價跌到咁先嚟供股？「其實四五月就應該做」。當然講就易，當時可能仲係搏會年尾有得飛嘛。
13. 拿，一單咁嘅刁，幾間投行執6000萬英鎊架，即係6億港紙，幾間分，每間都分到成億。有人話投行唔創造價值冇付出就收幾億—「咁你勞斯萊斯自己去賣股咯，唔使幫襯人地的」。
14. 最好補多個插曲，借錢嘅係邊幾間銀行？匯控，花旗，仲有法巴BNP。但BNP兩重身份，唔止借錢，仲做埋供股嗰邊嘅underwriting，一間行包銷20%，成為最大拆家。十分進取的說，想做歐洲投行第一喎—不過股價今年都差不多跌咗一半
又新一個月啦，月頭訂Ivan Patreon最抵，最新一期唔止講港股英股（Ocado vs Tesco！）美股（Palantir！），連碧咸隻電競股都有講（幾句都係講！）。當然一訂就睇返晒以前嘅嘢啦（https://bit.ly/31QmYj7）
（＊）係喎，你見個網寫114位，但9月25日嘅資料，當時股價仲有154便士，而家係117便士。大佬，用腦寫文架嘛，你估個網寫乜我照抄咩。
———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：https://bit.ly/31QmYj7
——————————————————————————
［收費短片第九擊］美股科技股是否泡沫爆破？價值投資之選
課程資訊：https://homebloggerhk.com/course_detail/?code=CC009
內容:
*美股急跌點算好
*科技股係咪泡沫爆煲？
*有乜價值投資之選？
本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145
另外想買返第八擊（美國總統大選股票部署）都仲可以：https://bityl.co/3NPn
