【鬥地主的前世今生.特區三部曲】
一,吾友 徐家健 教授 MyGut者言 經濟 3.0,近日成就解鎖,榮升 #鬥地主KOL 。今朝一早就收到佢 WhatsApp 提出一個非常值得深思嘅問題:「97以來,地產霸權呢個故仔喺香港真係非常成功,背後推手真係幾勁。」
二,Whatsapp Group 裡面有位比較年青嘅朋友(大概細我咃一個世代)就話:「地產霸權呢個概念,唔係過去十年先有咩?」另外,小友眼中,反地產霸權嘅旗手係朱凱迪、葉寶琳。
三,少年,你太年青了。又係時候叔叔話當年。1997 年亞洲金融風暴,香港並唔係第一個受衝擊嘅地方。我好記得,當時有唔少人覺得,香港幾十年都未出過事,駛乜驚?同埋第一波衝擊印尼泰國之類,我咃唔係將香港同佢咃比下話?就係咁,有班人趁低吸納,買咗幾個時至今日都仍然燴炙人口嘅名盤,包括天水圍嘉湖山莊美湖居。
四,天水圍,真係細細就聽過呢個地名;但係咁大個仔,響香港四十幾年,我去過兩、三次。嗯,天水圍嘅居民,千祈唔好覺得被冒犯,咁一個正常人真係唔會無端端去天水圍,係咪?我唔知當年恐慌性入市嘅人當中,有幾多係住開天水圍啦,但係對於一個從來都冇去過呢處嘅人,真係有些少心理障礙囉。
五,話說,一場金融風暴,咁啱打到呢班人正一正。佢哋有人上唔到會,唯有撻訂。不過,條款寫到明,賣方不但有權殺訂,仲可以追差價。
六,殺訂金,願賭服輸。差價都追?就係咁,小業主搵立法會議員求助。話說當年,社會普遍都仲係信議員嘅。不過,成件事最後都係打上法庭;官司一直打到 2005 年,小業主最終被判敗訴。
七,記得九零年代,李嘉誠係超人;直頭係香港之光。後來,就係呢場金融風暴,呢次撻訂追差價,令到香港有唔少人對資本主義自由市場生厭;覺得如果自由市場係代表有錢佬賺到盡贏到底,咁不如「攬炒」。
八,自由市場資本主義係乜,真係要搵日先慢慢傾。香港係乜,就可以話比大家知,唔完美,可接受,有改善空間。但今日嘅主題係【鬥地主的前世今生.香港三部曲】,暫時先唔好離題,如果唔係寫到九十九點都未講完。
九,大概 2004 年後,我見到社會上明顯醞釀緊一場反財團嘅社會運動。是咁的,一直以來,社會都有反財團嘅左翼。但係要成為一場運動,甚至係一場涉及到權力分配嘅社會運動,就唔係咁簡單。
十,同期香港發生咩事呢?(1)2003 年 7.1 之後,中共成立一個負責統籌 18 個部門嘅「中央港澳工作協調小組」。呢個嚴格來講,就係北京治港真正嘅最高機關。(2)2005 年老董腳痛落台。(3)政府研究訂立反競爭法。
十一,你可以話我捕風捉影。但我都幾肯定,當時政府推出反競爭法,其中一個目的就係同財團劃清界線。消息來源,我不便透露,但我可以話甚為可信。當然,最終都係信不信由你。
十二,綜合以上,可以見到特區由亞洲金融風暴揭幕,到老董腳痛完成「特區第一幕」;當中除左八萬五同沙士呢啲事件,更重要係意識形態嘅轉變。呢個亦都係本座當時同 孫柏文 以及 Andrew Work 成立自由市場智庫嘅時空背景。
十三,好多事情,表面上睇好似冇乜特別,但諗深一層,時間上嘅巧合,再加上往後嘅事態發展,往往令人覺得,背後就算冇一個好精密嘅計劃,點都有個方針大概。
十四,「特區第二幕」嘅主軸,就係左翼主張嘅冒起。我甚至會話,依家先係第二幕嘅最高潮。第二幕劇情入面,有反地產霸權,有反競爭法,有美國金融海嘯,有碼頭工潮,有人爭取工時,有規管一手樓,有人爭取全民退保,有梁振英搞七百萬人的故事,然後做埋行政長官,有公子哥兒唐英年墮馬,有誠哥仍然撐唐唐,有辣招,有傳聞地產黨捧曾俊華,然後林鄭冷手執個熱煎堆。
十五,以上重塑嘅「特區第二幕」嘅情節,不分輕重先後,純粹係我腦海浮現嘅一個個影像。代表咩,好後現代咁講,大家見到乜,就係乜。以 #鬥地主 作為呢一幕嘅最高潮,夠晒澎湃。
十六,劇情去到呢度,李嘉誠又由 #人民階級敵人,成就解鎖 成 #黃台之瓜 代言人。
十七,老套啲咁講,「特區第二幕」既係 the beginning of the end,亦係 the end of the beginning ;開始時,香港人好真心支持北京奧運嘅中國選手,會捐錢畀汶川大地震嘅同胞,但去到呢一刻,好多人只要聽到「何以這土地⋯⋯」就已經眼濕濕。
十八,「特區第三幕」 嘅主軸唔駛我講,大家都知係 #時代革命 #光復香港 。本土主義嘅冒起,最終會發展成點,我唔知。但似乎現時社會唯一共識,就係香港最終會一國一制:只係唔知究竟係邊一國同邊一制。
Search