其之…最終章
〔文末有 全集傳送門〕
＝＝＝＝＝＝＝＝＝＝＝＝＝＝
前文提要：
來到最後一話，也沒有甚麼前文可以提要。
在動蕩中的社會，完結一個自己喜歡的故事，已屬難忘。
有心的朋友，文末有傳送門，一次重溫，微微感動。
＝＝＝＝＝＝＝＝
看故事之前，以下是一份問卷，為25歲至35歲單身人士而設，
題目是《30歲應否談戀愛》，看看你是那類型的人。
題目1：
單身了超過一年？
是 >>> 2分
不是>>> 1分
題目2：
只想去愛，但很不想去負責任？
是 >>> 3分
不是>>> 1分
題目3：
曾經有個心儀對象，但你卻因疑問「他是否真正的心儀對象」而放棄。
是 >>> 2分
不是>>> 1分
題目4：
愈來愈喜歡一個人睇戲、一個人追劇、一個人食飯、一個人苦惱、一個人幻想。
是 >>> 3分
不是>>> 1分
題目5：
覺得寂寞是朋友。
是 >>> 5分
不是>>> 1分
分數表：
5分：快啲拍拖，你就快飢渴至死
5-10分：你想戀愛，但理想戀愛卻不多，至少你未找到
11-14分：沒刻意尋找，不主動、不抗拒、不負責，但希望你在床上，別「不安全」
15分：戀愛對你而言，是另一個星球的事
＝＝＝＝＝＝＝＝＝＝＝＝＝＝＝
「哈…而家啲Content Farm真係易做。」
在心中暗罵這個心理測驗的，
是本故事的主角，嚴先生。
全名嚴睦月，剛滿30歲。
果然…可以悠閒地玩「網上心理測驗」，
原因只有一個－
『他正身處婚宴現場的30號枱。』
而且…枱上的都是陌生人。
他今天是「單刀赴宴」，
因為除了新娘外，就沒一個熟人。
他心想，這種「單刀赴宴」情況也太多了吧？
是此故事的作者太懶？
抑或自己的朋友圈子「太散」？
還是說自己太好人，誰邀請都會去？
朋友們說，25歲至30歲，還是很喜歡出席婚宴的，
誰給你一個短訊，你就會到，
懶理WhatsApp中這句「我結婚啦！嗰日你嚟唔嚟呀」的上一句已經是2014年的事。
但30歲之後人就比較絕情，
有些交情不深的，已經會直接拒絕，不留情面。
事實上，對方那段時間都是Mass message給數百個人，
你的這句「Sorry，我嚟唔到啦」對他而言亦無甚殺傷力。
『並不是任何人都像你這樣感情豐富，少少事就受傷。』
不過，
嚴先生還是有點羨慕可以「坐滿一圍枱」的朋友、
羨慕新郎旁邊有一班「由細玩大」嘅真兄弟。
相比之下，自己更加是「搭枱」的常客，更加多是賓客而非「兄弟」。
也許自己的人生太內斂，對群體活動太抗拒，
結果賺了一種孤獨的開心，
卻賠了在婚宴上的不勝寂寞吧？
幸好，面對一個人的宴會，他還有一招…就是抽煙。
低下頭，從袋中拿起香煙，再抬起頭，卻又看到意想不到的畫面。
一名約米六的長髮女生，
穿著黑色連身裙，與女友人經過30號枱，向著18號枱進發。
她是Stella。（溫提一下：出現第一話，本故事的預設女主角。）
自從他的心偏向Mossie後，但又陷入轉工的風潮而無疾而終，
加上家人的健康出意外，心態早就大有不同，
嚴先生與Stella也自然斷了聯絡。
嚴先生放下了香煙，暗嘆世事的巧合度，有時比《愛回家》更為誇張。
但同時，有個認識的人在場，又稍稍安心。
他望著18號枱，希望Stella也會發現自己，
讓30號枱的陌生人知道…自己並不孤獨，自己是「相識滿天下」的。
活了30年，嚴先生還是需要追求「自我感覺良好」。
他如何超脫，還是敗在世俗目光下，
想被人認同、被人讚賞、被人羨慕，即使是陌生人。
『珊瑚扒翡翠』
她沒有發現他。
『百花炸釀蟹鉗』
她沒有發現他。
『玉環瑤柱脯』
她沒有發現他。
到了『翡翠蠔皇鮑片』、『脆皮吊燒雞』、『瑤柱蛋白飯』、『龍芽花菇炆伊麵』…
她依然沒有發現他。
炒飯與伊麵的出現，代表婚宴已經尾聲。
嚴先生覺得是「相認無望」了，
他其實可以簡單地Send一個訊息給Stella，但就是覺得太刻意，亦沒意義。
他拿起本來已放下的香煙，起身離開會場。
步出酒店，
他走到大馬路一旁的鐵欄，左手一按而起，坐在欄桿上，背向不斷駛過的車群，點起煙。
一把女聲，在旁邊揚起：
「我發現你真係好鍾意，一個人去飲喎。」
嚴先生一看，
聲音的主人是Stella，她隨著自己的身影，也來到了這個「吸煙區」。
Stella笑說：「拉一拉我上嚟啦，你明知我矮㗎。」
他手一拉，將這個較嬌小的女孩，拉到欄桿上。
兩個人一起，背向不斷駛過的車群，點起煙。
嚴先生：「你幾時知我喺度㗎？」
Stella：「由你發現我之前囉，哈哈！
我特登唔望你，諗住等你出嚟食煙，先搵你聚下嘛，點知你咁耐先出嚟食。」
嚴先生：「哈…咁啱嘅，我都係喎。但係…如果我今晚一支煙都唔食呢？」
Stella：「咁咪由佢囉。如果我唔搵你，你都係諗住由佢㗎啦。」
她依然沒變，
無時無刻都在試探，旁敲側擊。
嚴先生：「係嘅，隨緣嘛。」
他說出這句，望著酒店大門，的確是打從心底覺得「冇咩所謂」。
若然是從前的他，大概會落力討好Stella，去增加一段戀愛發生的機率。
但現在的他，想法已經變得踏實，對戀愛亦多了一份隨心。
當然，這個答案有些出乎Stella的意料，
令她一時接不上話，唯有順勢吸一口煙，再呼一口煙。
嚴先生：「咦…你唔係食嗰隻電子加熱煙㗎咩？」
Stella：「政府話禁呀嘛，轉返食成煙好耐啦。」
嚴先生：「有幾耐？第一次見你…大家都係29歲之嘛，哈哈。」
Stella：「耐呀，你都識講，嗰時29，而家都30啦！咁…30歲嘅嚴生，最近點呀？」
總是覺得，這句「最近點」就是陌生的代名詞，
有點唏噓，卻又是事實。
嚴先生：「都發生咗幾多事，轉咗份新工，適應緊囉。」
Stella：「轉工定轉行先？
我覺得如果轉行嚟講，30歲真係最後機會。」
嚴先生：「一半半啦，應該話行頭冇轉，工種轉咗，而家多咗Sales嘢，要跑數。
但收入就一定好咗好多嘅。」
Stella：「咁努力，儲錢結婚呀？」
嚴先生：「唔係…屋企人身體唔好。
何況，好又好…唔好又好，我哋呢個歲數，總係有錢好過冇錢嘅。
咁講係好現實，但總好過…日日沉醉喺自己嘅幻想世界入面呀？」
Stella：「哦～冇再幻想…所以…就冇再approach我啦，係咪？」
這下，令嚴先生笑得有點尷尬了。
但同時，又釋懷了。
因為兩個人可以完全坦白，是很幸福的，也許比相愛更幸福。
嚴先生：「咁，我覺得，你都唔係太需要我approach呀，係咪？」
Stella踢踢雙腳，說：
「同你一樣，好隨緣…又或者，我對愛情呢樣嘢，都係冇咩信心，所以唔急。
而之後我就發現…
男人多數都冇咩耐性，追咗一陣冇成果都會放棄。」
嚴先生：
「嗱！我唔係冇耐性㗎！
只係嗰時我都搞唔清楚自己心底嘅感覺…
到底係『唔介意同你一齊』、定『好想同你一齊』。」
Stella：「有呢個疑問，其實答案已經好清楚。」
嚴先生：「咁一直以嚟，只要我唔搵你，你就唔會搵我…
個答案都好清楚，哈哈。」
Stella：「所以，我哋兩個…咁樣食下煙…仲好。
講起又諗起，其實呢，我係好驚去你Book嗰啲高級餐廳㗎。」
嚴先生：「喂，咁呢樣嘢冇得怪我喎…
正常男女一開始約會，唔去呢啲唔通車仔麵咩。
嗱！我知你而家實話OK㗎！
但到真係約你去老麥，你個心又會藐㗎啦！」
Stella：「哈哈哈哈！或者啦！
喂…你知唔知，你放棄咗追我之後，有咩唔同咗？」
嚴先生：「唔係少咗頭髮下話？」
Stella：「低能！唔係呀！…
係同你傾計舒服咗，舒服過之前，都舒服過第一次見你。
如果係而家嘅你，或者一開始，我會鍾意啲。」
嚴先生聽後，沒有太雀躍、心也沒有悸動，
尼古丁反而滲入一點苦味。
嚴先生：
「哈哈…
以前諗點樣可以令你鍾意我…
原來當我唔再鍾意你，你就會鍾意我。」
Stella沒有回話，笑著望穿黑夜中的雲層，慢慢呼出一口煙。
Stella：「係咁㗎啦。我諗唔止我哋係咁，好多人都係咁，
Date咗幾次，都係冇下文。浪費晒所有時間。」
嚴先生：「浪費…？係咪浪費呢？
又唔知嘅…你細細個有冇睇《新世紀福音戰士》？」
Stella：「冇呀。」
嚴先生：「咁你介唔介意我講落去？」
Stella：「咁又唔介意嘅，你講啦。等我了解下呀嘛。」
嚴先生：「《新世紀福音戰士》呢套卡通有好多個版本，但大多數人接觸嘅…
都係細細個嘅TV版本，佢首片尾曲叫「Fly Me to the Moon」。
TV總共有26話，但呢首片尾曲「Fly Me to the Moon」並唔係集集一樣，
而係有好多個唔同Version，接近集集唔同，
有時曲風唔同、有時歌手都唔同。」
Stella：「哇…咁呢件事都幾有心思，套卡通係藝術品嚟喎。」
嚴先生：
「係呀，呢個心思位人哋1995年已經做咗。
但其實…我去到2019年先發現。
細細睇根本冇留意到。
係大個咗，先遇爾知道返，之後驚為天人。
所以…究竟浪唔浪費時間，好難定論嘅…
或者今日你覺得冇意義嘅事，會成為好多年後嘅一個註腳。」
Stella聽完，細味一番，隨即問了一句：
「你想表達嘅係…？」
嚴先生的視線一直沒有轉移，直至這句為止，
他終於托著頭，轉向Stella，慢慢地說了一句。
.
.
.
.
『有啲嘢，好多年之後先會發現。你話係咪呢？Koey。』
.
.
.
.
婚禮內，人群依然吵鬧，
與這兩根香煙的平靜，剛好成了有趣的對比。
你喜歡那個季節？
有人說過，人類並不會喜歡獨特一個季節，
而是喜歡追逐四季。
春天時盼夏；夏天時念秋；秋天時想冬。
所以，當你喜歡一個人，喜歡得放棄追逐其他人。
就很難得。
不是難得有個人值得你如此喜歡，
而是難得你可以盲目喜歡一個人。
這樣想的話，你就知道…
「其實你唔錯㗎，唔使驚。」
全故事完
PS. 在最終章…
希望看完故事的你輕輕給一個Like，
讓我知道還是有些人看的！
＝＝＝＝＝＝＝＝＝＝＝＝＝＝＝＝＝＝＝＝
故事後感：
首先，賣個廣告先～呢個故仔其實已經出咗書！（自資嘅，大把貨！哈哈）
如果大家想留個紀念，入Link就買到（唔使註冊）：
https://cheungson88.boutir.com/item/30歲應否談戀愛/6424788210548736?fbclid=IwAR0pk9TsojhSk32_o_24DqRif_KL-grz0gdVN4zsP5QwS_t82u5bNZzZPGQ
好，賣完廣告。
好抱歉咁遲先Post結局…
其實最終話一早寫好，
只係喺呢段時間，我覺得大家都應該聚焦於香港嘅事情上，集中五大訴求，
所以出Post時間都亂了，哈哈。
不過冇所謂嘅，
如果大家有時覺得攰，選擇搵呢個故事沉澱一下，已經係種榮幸。
有人問，本書會唔會同網上唔同？
其實真係接近冇（除咗書有一個人物介紹，有晒啲人嘅全名之外），
甚至本書因為頁數問題，比網上版係少一話。
所以你就算唔買書，
都可以享受到一樣嘅故事體驗。
我之前多謝過好多次，書展嚟支持我嘅朋友。
但其實，即使你冇買，
但你喺網上睇晒呢個故事，我都一樣咁感激。
始終，對一個故事而言，
「有人睇」就是一個最快樂的故事。
對於，有冇「外傳」補完多啲其他角色嘅故事？
之後會唔會有「31歲應否xxx」？
前者我盡力；後者就隨緣吧！
或者再過一段時間，我喺社會上得到更多故事。
嚴先生就會再出場，畀我「折磨」一下！
多謝呢半年嚟，睇過呢個故事嘅每一位讀者。
=============
此故事的 全集傳送門：
for desktop：http://bit.ly/2OThk8Z
for mobile（已排好晒，向左右撥就ok～）：http://bit.ly/2H2AAys
想大家加埋我IG，分享下自己嘅生活story
https://www.instagram.com/cheungson88/
(ID: cheungson88)
擊樂星球問卷 在 【豆莢寶寶兒童音樂會x線上問卷填寫須知】 親愛的豆粉們 的推薦與評價
今年的現場問卷填寫分為紙本問卷與線上問卷。問卷填寫完後請於＂節目結束後＂交至問卷回收處的工作人員，即可兌換今年的小禮物。 ... <看更多>