【英國揸車最緊要係咩？】
香港揸得掂，邊度都掂，因為...夠無品
一講响外國揸車，香港啲親朋戚友最自豪就係：「响香港揸得掂，有咩地方揸唔掂吖！」不過以我响世界各地揸咗廿幾年車，其實我覺得揸得衰格同無品，與揸得叻或者掂係兩回事。
由有車牌開始，從英國到香港都未停過需要揸車。而且同好多偽中產一樣，去旅行都鐘意揸車自由行。我從來唔敢話自己揸車叻，邊有醒唔醒㗎，其實係尊重自己尊重他人嘅問題。車多又密加上車位窄，啲親朋戚友（包括我自己）的確泊車技術同速度係快嘅。但係咁係咪等如「好掂」呢？一定唔係囉。
以佢地嘅標準，所謂揸車揸得叻，咪叻在貼住前面架車個囉柚，攝黎攝去同死都唔讓人。呢啲所作所為如果叫做叻，咁不如叫做無品同衰格。大家唔好誤會，以我嘅經驗，駕駛態度最衰嘅一定係揸私家車嗰啲偽中產朋友而並非職業司機。可能覺得自己有架私家車好「威武」啦？佢地直路架「超級跑車」（有七個位嗰啲呢）重好快添喎！
當見識過九成人揸棍波，全條街嘅車泊到5cm距離嘅意大利，或者無限速兩三個鐘嘅德國公路，本人就唔敢認屎認屁。都唔好講雪地揸車，呢啲無乜經驗可言嘅嘢。其實响英國同歐洲揸車，最重要嘅係「品」，尊重自己同其他道路使用者（好老土，但就係國際態度囉）。
#揸車其實代步
#乜嘢叫做叻呢
#攝得叻貼得前
#咁咪掂好威風
#揸車唔讓路人
#直路揸快小小
#的確係好勇猛
