成個廚房任你玩！
「煮餸類」遊戲一向都不乏捧場客，其中《Cooking Mama》同埋《Overcooked》系列更加係非常成功嘅例子，低成本製作但極高銷售回報，令唔少遊戲廠商爭相仿傚。而家市場上大多數「煮餸類」遊戲都係以惡搞為主，而呢一款即將上市嘅全新作品－－《Cooking Simulator》就反其道而行主打擬真，喺遊戲當中現家將會進入逼真而專業嘅餐廳級大廚房，大家可以利用各式各樣嘅煮食器具同埋食材，打造一道又一道大師級作品。
同惡搞類遊戲唔同，《Cooking Simulator》開宗明義係一個「煮餸模擬器」，入邊嘅食材、用具、物理系統等等都非常講究擬真，玩家或多或少真係可以從遊戲中學到唔少煮嘢嘅秘訣。本作亦會包含教學模式，有超過60種菜式等住玩家解鎖，解鎖咗之後遊戲會一步一步教你煮。除咗過關，《Cooking Simulator》亦有沙盒模式任你搗亂，你可以盡情喺大廚房入面做你想做嘅事，不論係玩「小李飛刀」定係放火燒咗個爐頭都冇問題，又或者你可以研發全新嘅烹飪風格，例如好似片尾介紹咁，用幾個紙盒堆起一個火堆，放火燒著啲紙盒，之後當爐頭咁用嚟煎牛扒，基本上只要你想像到可以喺廚房發生嘅事，遊戲中都可以實現。
主打高擬真、高自由度嘅《Cooking Simulator》將會喺12月7日正式登錄Steam平台，Mark定個期惡補下你啲廚藝啦！
__________________________________
想睇精彩短片，即去：http://bit.ly/2IRwZ8a
