前兩日見到一篇上等人媒體Hong Kong Tatler的文章，有關香港最佳叉燒，寫呢篇文嘅作者 e_ting，都算係認識。
佢介紹嘅食肆，我全部去過，但唔係全部都有食過叉燒，幫襯咗十年嘅大班樓，我係未食過佢哋嘅叉燒。
六國粵軒，以前好好食，上個月去，只係食菌，無食到叉燒，未能證實黯然燒魂飯有幾黯然。
龍景軒當然高質，月前同老母賀壽嗰餐，我仲未寫。
西苑好多年無去，但係佢個叉燒叫做「大哥叉燒」，邊個大哥？影壇嗰個，大家決定去唔去啦吓。
Mott 32，被標籤為藍店，原因好似係有個經理係藍，但係該集團本身係無出過聲，佢哋個黑毛豬叉燒，又係高質。
本來今個月喺留家廚房搞局，因晚市禁堂食而取消，佢哋個叉燒一樣出色，同另一間黃色中菜 - 逸東軒一樣，都係用本地豬。
新桂香，都係好耐無去，聽不少人講，水準跌咗好多，但有朋友最近去過，又無咩投訴喎。
點都好，俾我揀，我會推薦新蒲崗 友利坊 ，唔敢講係咪全港最佳黃店燒味店，只計九龍區，應該坐二望一。
PS : 最近食過甘棠燒鵝的一刀叉燒，令人驚喜。
圖中是留家廚房的叉燒。
