《生日之旅 - 澳門3日2夜Play House大比拼》
上個月我哋去咗澳門過生日，住咗巴黎人酒店嘅親子房，波包喺酒店房已經玩到唔捨得走，今次亦都係第一次行經港珠澳大橋去澳門，感覺好舒服，價錢亦平過搭船少少。
另外今趟帶佢哋去咗三間play house玩，間間都各有特色，即刻同大家分析一下，詳細可睇片！
👑Q立方王國
📍地點：澳門巴黎人6樓
⏰開放時間：每日上午9:30至晚上9:30
入場費 (小童+ 成人 (2小時))： 星期一至五 澳門幣140元；星期六、日及公眾假期 澳門幣160元
好玩度:⭐⭐⭐
抵玩度:⭐⭐⭐⭐
Q立方王國位於Parisian Macao 澳門巴黎人，係超過20,000平方尺室內及室外遊樂區，而佢最出名嘅就係太空艙主題嘅瀡滑梯、旋轉木馬同城堡，呢度嘅瀡滑梯有好多條，部份有高度限制，唔夠120cm冇得玩𠺢。
🐰華納滿 Fun 童樂園
📍地點：澳門新濠影滙西翼三樓
⏰開放時間：10:30 – 19:00
入場費 (小童+ 成人 (2小時))： 星期一至五 澳門幣120元；星期六、日及公眾假期 澳門幣150元
好玩度:⭐⭐⭐⭐
抵玩度:⭐⭐⭐
華納滿fun童樂園以華納人物作為主題，有賓尼兔、Batman、Superman等
以小型機動遊戲為主，有小型的跳樓機、賽車賽道、登峰奇兵攀石牆、波波池、華納極速迴旋等，適合大啲嘅小朋友多啲，而最正就係跳樓機，不過最少要 100 cm 高先可以玩㗎。而華納極速迴旋亦都好正，呢個機動遊戲係坐喺宇宙飛船上，再戴上 3D 眼鏡，然後對住壞人射，玩法同香港迪士尼嘅Antman差唔多，另外仲會不時有華納人物出嚟同小朋友影相添呀。
講真香港真係無呢類型嘅Play House，所以波包玩得好開心，而同Q立方王國一樣，華納滿 Fun 童樂園每個時段2個鐘，過鐘就要加錢㗎喇！
🐤憤怒鳥遊樂中心
📍地點: 澳門十六浦度假村3層
⏰開放時間：星期一：下午4時至晚上8時
星期二至日：上午10時30至晚上8時
入場費 (小童+ 成人 (2小時))： 星期一至五 澳門幣110元；星期六、日及公眾假期 澳門幣130元
(小童+ 成人 (全日))： 星期一至五 澳門幣180元；星期六、日及公眾假期 澳門幣200元
好玩度:⭐⭐⭐⭐
抵玩度:⭐⭐⭐⭐
位於澳門十六浦度假村 Ponte 16 Resort Macau嘅憤怒鳥遊樂中心，今年先正式開幕，呢個親子樂園佔地6000平方呎，以「憤怒鳥大電影」場景為設計藍本，未入去玩已經有唔少「憤怒鳥」打咭位，有大型迷宮、充氣彈床、波波池、水泡滑梯及兒童車場等，呢間相對適合包包同波仔年齡，所有野都玩得，要數呢間play house最正嘅一定係「憤怒鳥海灘」波波池喇，佢以藍白色波波模仿一個大海，可以瀡滑梯之外，仲可以坐大水泡瀡落嚟，最勁係連我都玩到癲晒呀！
三間各有好玩之處，包包同波仔就最鍾意憤怒鳥遊樂中心，你哋睇完又最鍾意邊間呢？
#澳門親子遊 #親子旅遊 #澳門 #playhouse #巴黎人 #澳門酒店 #酒店介紹 #黑面媽 #新濠影滙 #華納滿 Fun童樂園 #Q立方王國 #海灣餐廳 #澳門自助餐
