《服務態度呢家野，我都係buy 點到即止》
其實服務得太好，我受唔起...
我諗香港人都唔太習慣太熱情太親切太周到嘅服務，我作為客，有時接受太over 嘅服務，真心打冷震。大家都有去過和民食野，個waiter要無啦啦好似求婚咁跪喺度同你落單，食餐飯都要人跪我，真係受唔起。
太over 嘅服務，服務員同我都好支力...
如果你有選擇困難，你見佢跪喺度，真係唔好意思考慮食咩，起勢咁揭個menu ，拿拿臨Rap住講食咩，唔想佢跪咁耐。
我呢啲 打工仔真係好有同理心，雖然我係一個一日坐到黑嘅OL，平時郁得最多真係個十隻手指，但我想像到，個waiter 一日工作十幾小時，然後又起身又跪又起身又跪。我真係好多次去和民都想勸啲 waiter 不如辭職啦。
太over 嘅服務唔只和民跪地，有時行街買衫，諗住試件衫，個sales會自介「小姐貴姓呀，我係XXX，你fitting 完可以搵返我幫你架」，其實我只係試件$199 返工冷衫，都無咩需要問我貴姓咁好禮架喎。
但唔回應，又好似好無禮貌咁，為咗唔想深感內疚，又要答佢「我姓XX」...你服務得太over，唔只你支力，我都好支力，我要起勢咁好有禮貌回應「唔該哂，麻煩哂」，搞到我都覺得好支力。
服務態度呢家野，我都係buy 點到即止...
去餐廳食野，只要落order 唔好錯，啲 野食來得快又好食，收錢同你講句「多謝哂，byebye」，收貨架啦。買野我唔需要sales太熱心跟住我尾推介「今期流行」，我想要個size 拎俾我就得架啦。
所以我理解唔到，大陸人對海底撈皇帝式服務嘅欲望...
海底撈我喺山東出trip 個時食過一次，我記得我一舉手，就會有waiter 好似常識問題比賽搶答咁，衝埋你「服務」你，而慢半拍搶唔到「服務」你嘅員工會表現出「真可惜，我搶不到服務你的機會」。
同行嘅當地山東朋友話，大陸人都好鐘意呢套「皇帝式」享受，所以海底撈全國都咁受歡迎。個人來講，我麻麻地做「皇帝」，食餐飯唔洗太誇張，我呢啲 打工仔唔慣得到太好待遇，唔係咁受得起。平心而論海底撈野食係好食嘅，但我深信打邊爐只要啲 料新鮮，間間都差唔多。
咁海底撈啲 員工點解咁入血，服務到咁over，山東朋友話，海底撈係以銀彈政策聘請員工，比起一般餐飲集團，人工花紅都特別多。
海底撈個套喺香港work 唔work？
我覺得大家對呢個皇帝式享受有好奇心，但學方東昇話齋「一試無妨，再試投降」，服侍得我太好，真心受唔起。香港都係buy 效率多過服務。
香港人工咁貴，你要有皇帝式服務，服務費亦必然係皇帝級，實際嘅香港人就寧願花錢喺靚嘅食材，多過喺service charge 度啦。又如果佢引入人工低啲 嘅內地熱情同胞服務你，咁我又會唔想去。
最後係，我覺得要馴服香港服務業員工，以海底撈皇帝式standard 服務顧客，真心有難度，香港員工都比較「有個性」，如果要train香港員工train 到咁，佢哋可能都會覺得「使唔使呀？」。海底撈呢啲 咁over 嘅服務推出市面，一野推高咗食客對服務嘅expectation，仲推到去咁高層次，真係令服務業界深受其害，搞到啲食客愈來愈難服侍。
PS. 其實只要有效率，我唔mind 茶記老伙計西口西面，你叫「奶茶多奶」，即時俾佢串鳩你「多奶就唔好飲啦！」，香港員工挑戰顧客嘅gut屎，真係第二度搵唔返，呢啲真係應該保留嘅非物質文化遺產來架。
