《我對教會嘅負面印象，根本同宗教內容無關，而係傳教嘅人造成》
(利申：我幼稚園小學讀基督教學校，中學讀天主教學校，宜家公司老闆係虔誠嘅基督教徒)
我係無神論者，相信科學，相信人死如燈滅，唔存在死後世界。由於讀教會學校，身邊都會接觸到基督教或者天主教徒，而我必須要好誠實咁表達，我對任何信教嘅人都無好感，而呢份負面嘅感覺，大都係因為佢哋嘅傳教行為。
初中一次早會，英文科嘅老師就佢聖誕節期間嘅經歷，同大家分享天主嘅力量係有幾強大。個老師話，聖誕節期間參加咗一次彌撒，喺尖沙咀區唱聖詩，唱完佢諗住搭車返屋企，結果喺尖沙咀蕩失路，佢即時驚惶失措，喺呢一個時候，佢諗起要祈禱，請求天主俾佢一個冷靜嘅心智，去搵番搭車嘅路。聽到呢度，當時我已經笑到好似吸食大量大麻一樣，首先一個正常人，聖誕節去唱聖詩蕩失路，尖沙咀人來人往，路在口邊，你唔識路求其問人都好過祈禱問天主啦，其次，佢作為一個老師點會用一個咁荒謬嘅例子嚟印證神嘅強大？佢係唔明白佢自己係有幾咁荒謬，我嘅理解係佢遇到任何困難嘅時候，都慣性依賴信仰， 而唔係憑自己嘅能力解決。
另一次，一個朋友喺無安全措施嘅情況下同佢條仔發生性行為 ，最後搞大咗個肚，喺呢個唔知點算好嘅時候，佢返教會向天主懺悔，然後佢覺得得到寬恕，最後決定墮胎。我覺得一個未成年少女大肚，第一時間應該報警同埋搵媽媽的抉擇，聖母瑪利亞雖然都係未婚產子，但佢好難同你分享未婚懷孕點處理嘅經驗囉。 有啲人好容易因為自己信主，覺得最終會得到天主教寬恕，於是做錯事好輕易咁自己原諒自己。
有啲人會話 ，只係你遇到嘅嗰兩個信教嘅人比較奇怪，點可以一竹篙打一船人認為所有信教人都係奇怪呢？
我覺得信教同傳教嘅問題，就係在於，無人100%sure 佢哋對於信仰嘅詮釋係唔係完全正確，而好多時佢哋詮釋得好錯，佢哋都會主動傳教，說服其他人同佢一齊相信。
尋日我睇到高登一個post…
一個讀緊醫護科嘅男仔，因為一個女仔嘅介紹，而返教會，呢個男仔其後覺得教會傳遞嘅訊息，佢唔太相信，於是決定退出教會，唔再信。佢退出教會嘅舉動，令介紹佢入教會嘅女仔不滿，個女仔於是同教會嘅人講，呢個男仔有精神病有自殺傾向，甚至報警話呢個男仔自殺，最後，呢個男仔有精神病有自殺傾向嘅傳言，傳到去男仔嘅學校，由於個男仔讀醫護科目，學校以精神狀態會影響病人為由，暫停佢嘅實習，結果呢個男仔需要defer學業。
※※※※※※※
我覺得信唔信教，係個人選擇，如果你意志力比較薄弱，判斷力唔夠，你就要慎重咁考慮信奉一種宗教既後果同代價...
如果你自己無乜個人意志，容易受人影響，唔識拒絕人，朋友介紹一個宗教信仰俾你，你無比較過任何其他宗教嘅情況下，單憑朋友嘅介紹，你點判斷朋友介紹嗰個宗教信仰係最適合你，最可靠嘅呢？如果介紹呢個信仰俾你嘅嗰個朋友，死纏爛打，當你唔信嘅時候點樣甩身呢？你識唔識清楚咁表達你唔想信呢？ 我身邊就有唔少嘅朋友因為另外一個朋友傳教而friend都無得做。
我唔知道幾千年前，基督教天主教徒係咪咁著重主動傳教，呢個宗教已經存在咗幾千年，會唔會因為以訛傳訛嘅關係，令到當中嘅教義喺傳來傳去之下，變得有偏差呢？而每一個人嘅理解同詮釋亦唔一樣，好似玩超級無敵獎門人，以訛傳訛做動作，每一個做動作嘅人都會覺得自己表達得好啱，但聽嗰條友係唔係覺得啱呢？
我曾經問過一個信基督教嘅朋友，點解佢哋咁鍾意主動傳教 ，佢話，好似你去一間好食嘅餐廳，你覺得好正，好想推介俾其他朋友一樣，但我覺得佢呢個比喻係有啲古怪，美味嘅食物本身係無爭議性，人人都想食，而且你食完唔啱食，你可以去第二間食。但信教呢一樣野，講明只可以信一個 ，例如你信主耶穌佢就會唔俾你信佛，當你唔係一百個percent sure你相信同interpret嘅嘢係啱嘅時候 ，你點可以咁輕易咁介紹俾朋友呢？
宗教呢一樣嘢我覺得只可以被動傳教，唔能夠好似cold call咁，主動說服人相信，即係姜太公釣魚，要願者上釣，勉強無幸福，而我對教會嘅嗰種負面印象，好大程度就係一班cold call 嘅教徒造成嘅。
PS. 最後係，好多人會質疑高登個個自稱受教會迫害嘅男仔，講嘅野未必100%係事實，而且就算係事實，可能只係個間教會處理不當，唔代表其他教會同教徒都係奇怪嘅。我覺得呢，好多唔信教嘅人都受過傳教人嘅滋擾，證明奇怪教徒為數不少，我好同情個男仔嘅遭遇，希望你盡快回復正常嘅生活啦。
