【公關有問題】 學術及法律討論請賜教
話說今朝趕完啲嘢，睇一睇手機，除咗之鋒、周庭，仲有消息有個海關督察被停職拘捕。而之鋒、周庭拘捕嘅其中一個原因，係「明知而參與未經批准的集結」。
.
其實收到呢個消息，都唔係好明；同班朋友討論時，更加唔明。所以呢個post真係好想大家指點下同研究下，到底「明知而參與未經批准的集結」係乜東東？
.
根據基本法，香港人係有遊行同集會嘅權利，呢個係政府嘅宣傳片教大家嘅，唔駛我多講啦。而有心朋友搵咗一個2000年嘅政府公報，大家請留意呢一段：
.
//政府發言人今日（十月十日）指出，根據現行《公安條例》，三十人以上的公眾遊行毋須事先向警方申請牌照。主辦者只須於七日前通知警方。
.
至於有批評指現時【主辦者必須於收到警方的「不反對通知書」後方可舉行遊行，並謂此乃一變相的申請牌照制度，發言人說這純屬誤解。】
.
他續稱：「即使在一九九五年至一九九七年間，警方一直都有權根據《公安條例》所指定的理由禁止公眾遊行。這些可作出禁止的有限權力早已存在，而【現時的『不反對通知書』不會削弱市民根據《公民權利和政治權利國際公約》擁有的示威遊行權利。相反，『不反對通知書』使主辦者更清楚了解警方對是次遊行的態度，應有助其籌辦遊行。」】// (【】裡的是公關仔覺得比較重要所以括住俾大家睇)
.
睇返呢個新聞公告，警方發出嘅不反對通知書，係「通卜知」警方，團體需要辦法呢個遊行或者集會，但呢份通知書其實並不是「申請書」。公關仔嘅問題就係，如果這份並不是申請書，即是這個集會或遊行並不需要批準；而政府公報裡面寫得好清楚，「『不反對通知書』使主辦者更清楚了解警方對是次遊行的態度」，是「態度」而已，並不是yes or no，係咪咁嘅意思？
.
公關仔大膽假設一個例子：公關仔考到奬學金入暴大讀書,通知咗兄弟姐妹呢個消息，好快就要搬入宿舍。但係兄弟姐妹反對喎，咁哋公關仔嘅「態度」係口出惡言呀，甚至打我呀，但都無損我可以行使我讀書嘅行動同埋權利。
.
戴返頭盔先，公關仔並不是鼓吹遊行集會不需要向警方申請，事實上公關仔攪大型活動，都需要通知該區警局，讓警方知道當日會有好多人聚集，需要加強警方維持秩序。正常嘅警民合作幾時都需要，而且好應該。
.
但公關仔嘅問題係，如果遊行嘅不反對通知書並不是申請，即是行駛遊行及集會嘅權利並不需要批准，只需要通知而已。「批准」即是批准人不同意就不可以做；但「通知」呢？就係「通知」咗，做唔做唔到被通知嘅人話事喎。
.
如果呢個邏輯係啱嘅，咁「明知而參與未經批准的集結」呢樣東東係乜鬼野？其實出嚟遊行集會，係公安條例下俾香港市民嘅權利，只要我參與嘅係遊行「集會」，就係人會多過3個人出嚟，係無得夾硬話呢個係「集結」。
.
一係警方就將個不反對通知書變成申請，改公安條例，正式蓋棺話遊行集會不合法。如果唔係，「明知而參與未經批准的集結」係唔成立嘅，因為市民參加嘅，只係警方取態不歡迎嘅集會。當警方落到各區，街坊大叫不歡迎都無走，繼續請大家食催淚彈，點解集會警方不歡迎就係集結？
.
阿SIR，我一心係出嚟參加「集會遊行」，我鬼知點解變咗「集結」？明明個個團體寫都係集會喎，佢寫集結，我實唔參加啦！
.
堅係唔明。
大家一齊討論下。最好可以有記者幫手係4點鐘press con問下er er sir，集結同集會係點定性？到底市民點樣可以行使公安條例下嘅集會權利而不被檢控？大家清楚咗咪好囉！
新聞公報傳送門：https://www.info.gov.hk/gia/general/200010/10/1010251.htm
#近來咁多遊行集會大家清楚啲好喎
#最好律師出嚟解釋下
#中文系朋友請問申請同通知嘅分別有無解錯
810扮工室 #麻煩幫我問下你老細
#只有集會沒有集結
