[電影][翠絲] 11月中先正式上映嘅電影《翠絲》，喺第55屆台灣金馬獎拎到男女配角提名。喺劇中飾演男主角姜皓文妻子、要面對丈夫變性嘅惠英紅，入圍最佳女配角五強。今次係小紅姐第五次獲得金馬提名，上年憑《血觀音》得到影后寶座，今年可唔可以拎金馬女配角呢？提一提，小紅組喺2009年已經憑《心魔》拎過金馬最佳女配角。
另外，袁富華亦都憑住《翠絲》入圍最佳男配角五強。Ben哥喺戲中飾演男花旦，係主角踏上變性之路嘅關鍵人物之一。Ben哥多年來都活躍喺舞台劇、電影、電視界別，可以話係全能型演員，我都想佢拎金馬獎呀~~~11月17日自有分曉。
電影《翠絲》預告片 >>>
https://www.youtube.com/watch?v=400fjFO2LDs
--------------------------
第55屆台灣金馬獎部分提名名單：
最佳男配角：李鴻其《幸福城市》、鄭人碩《角頭2：王者再起》、章宇《我不是藥神》、田壯壯《後來的我們》、袁富華《翠絲》
最佳女配角：丁寧《幸福城市》、惠英紅《翠絲》、許晴《邪不壓正》、黃嘉千《老大人》、張子楓《你好，之華》
--------------------------
[回帶][方以文問兩句] 姜皓文 提到電影《翠絲》
問：之前睇報道話你會挑戰演跨性別人士嘅角色，好想睇呀。仲有咩角色想挑戰呢？
答：係呀，拍咗喇，套電影叫做《翠絲》。故事係講一個中年男人，由細到大都周旋喺一個思想：好想去做女人，一出世就覺得自己生為男兒身係唔應該，佢入面根本係一個女人嚟。呢套戲同小紅姐惠英紅合作，好開心佢教識咗我好多女士方面嘅嘢，同埋我哋個製作團隊裡面，無論係男女工作人員都當咗我係女人。我記得有位美指，係女仔嚟嘅，喺我換衫嘅時候佢叫清場，要啲男人避開。大家都幾上身，我好鍾意。裡面嘅棘手嘢，就係要研究女士。原來做一個女人係唔簡單，唔好話一舉手一投足、聲音、行路姿勢，仲有佢哋日常生活嘅瑣碎事，高踭鞋好，着衫好，都係一個學問，女人真係唔易做。今次呢部戲，係將我全身所有嘅毛髮都剃光，因為戲裡面係要女人裝扮，係唔可以有胳甩底毛、腳毛手毛、胸毛，要好光滑。因為跨性別人士喺變性手術之前，係要打賀爾蒙針，啲毛髮係會生長得好慢，然後唔會生鬚生毛。所以係劇情所需，係一個難忘嘅好演出經驗，希望呢部電影《翠絲》出嚟嘅時候大家會鍾意。
--------------------------
#翠絲 #港產片 #金馬獎 #惠英紅 #袁富華 #姜皓文
