每次嘈交都要和好（上）
「我哋分手啦！」
我打緊msg畀芸芸，解釋我嘅立場，但佢已經講咗分手，仲迅雷不及掩耳咁block咗我。
我唔傷心，亦唔太擔心，只係有幾分無奈。
因為「分手」呢句話，我已經聽過無數次。
我知道過多幾日，芸芸就會unblock我，我全心全意認低威哄番佢，我哋又會和好。
但和好後，過多一排，芸芸又會因為奇怪嘅理由嬲咗我，我哋再次嘈交，嘈到佢講分手。
「一排」係幾耐呢？或者係幾日、或者係一個月，反正唔會係永遠。
我哋會因為咩事而嘈交？我都話唔埋，可能係我講錯一句說話，可能係佢工作唔順利、行街揀唔到鍾意嘅衫……
總之，天文地理東南西北都可以成為嘈交嘅導火線。
我曾經戰戰兢兢，講每句說話都思前想後，好似一個企圖避開地雷嘅士兵咁。
但我漸漸發現，避係避唔開嘅，交係一定會嘈嘅。
今日我放假，本來約咗芸芸出嚟行街，但佢搭車嗰陣就同我嘈起嚟，仲block埋我，佢今日都唔會出嚟了。
我喺條街度百無聊賴咁行，一路行一路用手機search：「激嬲女友點算好？」
建議分為兩種，一種教點樣哄番女友，例如買鮮花屋前死守直至下雨、買新出嘅iPhone、打千字文……唉，呢啲我都試過晒啦，唔係唔Work，但每次都要做到成隻死狗咁，先哄得番佢。
另一種建議就得兩個字「分手」，感情問題全部都建議分手，唉，我又唔捨得分手。
我行吓行吓，行咗入一間舖頭度。
成間舖頭用銀灰色裝飾，氣氛神秘而詭異，貨架上咩都有，好似雜貨舖咁。
咦，呢條街我行過幾次，之前明明冇呢間舖頭㗎。
「先生，歡迎光臨『煩惱小店』，你係咪有咩煩惱啊？」聲音從背後傳來，我嚇咗一跳。
我回頭一望，一個黑衣女人坐喺櫃台望住我，眼神好似可以洞悉一切咁。
車，扮晒嘢。
我嗤之以鼻：「梗係有煩惱啦，世界上邊個人冇煩惱㗎？」
黑衣女人問：「最困擾你嘅煩惱係咩？可能我有產品幫到你呢。」
「我女朋友成日同我嘈交，嘈完就block我，請問你有咩產品幫到我呢？賣包老鼠藥畀我，毒死佢？」我心情唔好，講嘢嘅態度都唔多好。
估唔到，黑衣女人拎咗一包火柴出嚟：「呢包火柴叫『和好火柴』，每次同女朋友嘈交，你只要點一條火柴，佢就會即刻同你和好。」
我笑咗出聲：「有冇咁神奇啊？賣火柴的小女孩？」
「試吓囉。」黑衣女人遞包火柴畀我，我半信半疑咁點咗一支。
火柴燃盡後，我嘅電話響起，係芸芸打嚟：「BB，我過緊嚟啦，你喺邊？」
「你……你唔係嬲咗我咩？」以前芸芸一發脾氣，至少都要兩日先unblock我。
「啱啱又唔知點解唔嬲啦。」芸芸話鋒一轉：「你喺邊啫？我行到餐廳啦，唔見你嘅？你唔係遲到掛？」
「我點會遲到？我馬上出現，畀一分鐘我！」
為免再次激嬲芸芸，我即刻畀錢買咗嗰盒「和好火柴」，飛也似的衝咗出去。
我好快見到芸芸，展開咗一日嘅愉快約會。
過幾日，芸芸發脾氣，又block咗我。
我毫不猶豫咁點咗一支火柴，芸芸馬上搵番我。
呢一刻，我對我哋嘅愛情充滿信心，有咗呢盒火柴，無論因為咩事嘈交，都可以和好如初。
不經不覺間，盒火柴消耗得好快。
我想買多幾盒，但我去番嗰條街，無論點樣搵、點樣search，都搵唔番嗰間「煩惱小店」。
唉，我好煩惱，呢次我嘅煩惱，係火柴就嚟用晒。
到時，我又要回復以前嘅生活，郁啲就俾芸芸block幾日，要做牛做馬哄番佢……
我決定慳啲火柴。
芸芸再發我脾氣，我審時度勢，覺得佢呢次嬲得唔算嚴重，我就唔用火柴，乖乖等佢嬲完再哄佢。
下集：https://bit.ly/36DX2dM
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #每次嘈交都要和好
