默默地自己已邁向3字頭嘅中間。#仲係三字上半場😂
生日揀咗staycation方式慶祝，望住維港in room dinning，JLO突然話：「再過多四五年我哋就4字頭，如果人生有80歲，我哋就快到高峰。」
「係人生行咗一半，唔係叫高峰😂」
高峰係一條高低嘅曲線，有高潮必有低潮；年齡係一條直線，係世上其中一樣可以不勞而獲得嘅東西。人生就係盡可能係一條one way直線上，用力畫上最大幅度嘅高山低谷。
最近我迷上一齣 Netflix 紀錄片叫《爆機年代HIGH SCORE》，走遍美國日本訪問歷代最紅遊戲創作人，包括nitendo，sega，pac-man，mario，street fighter，final fantasy 等原創者同策劃人嘅起源同靈感。仲搵返以前細個贏咗全世界打機大賽嘅成年人，訪問佢哋當年如何成為冠軍...望住當年遊戲機由8-bit走到而家，感覺猶豫帶你走一轉非常真實嘅時光旅行。
除咗後期製作有趣之外，最吸引我嘅係每一位嘅訪問。雖然呢班人大多年事已高，加埋都有幾千歲，但係佢哋想當年嘅時候，眼睛都係有光有力有熱情，我認得呢一種眼光！
喺全職跳舞嘅生涯入面，我都曾經有過幾件會令我可以講到眼睛發光嘅經歷，三日要練成著四寸斗零嘅側手翻，如何受一眾師姐欺負仍然忍住眼淚默默地跳，曾經成為某國際明星御用香港女dancer，贏過全港舞蹈大專比賽排舞冠軍，亦試過完全慘敗... 令人發光嘅事有時候唔一定係成功嘅事，曾經有血有淚盡力地做過嘅一件事件，聚光燈曾經係你身上聚過光，已經可叫無悔。回想跳舞最尾兩年其實有啲滑啞，當時選擇咗安逸，對生活用力好少，亦無特別挑戰自己，所以回憶模糊零碎....其實呢種感覺一啲都唔好受。
今年感受最深嘅係，我哋成日話自己老，其實我哋一啲都唔老！事實上，我哋對於年齡表現出來嘅擔心，大部份並唔在於年齡增長帶來嘅數字，而係恐懼隨着年齡嘅增長，自己仍然一事無成，無發生過任何一件值得驕傲嘅事。選擇安逸又要心有不甘，羨慕別人又唔肯努力，唯有索性同自己講老喇老喇做唔到㗎啦，無力氣再為自己抗爭，於是索性乾脆投降...咁就一世。
我
不
要
變
成
這
樣
！
即是我嘅能力不及打機達人，將世界推向另一個紀元，我仍然希望我嘅人生有更多值得驕傲或者無悔嘅事，唔係只有驚天動地嘅人生先需要努力，平凡嘅幸福都需要不凡嘅努力。
無悔。#廢腑之鹽
#期待再有令自己發光嘅經歷
#女人像鹽
其實生日已經過咗😂
Instagram.com/missyboni
