《中英街1號》影評
「大歷史下的蒼涼與再動」
（含劇透，慎讀）
—
大歷史觀下，大多都係結果論。
—
寫《中英街1號》，其實我有強烈嘅自覺唔應該去寫，原因在於「未夠班」，一個九十後，寫乜嘢有關六七年暴動嘅意見呢？甚至連我父母，都唔敢話自己經歷過呢場事件。所以以下呢段文字，係預咗比大家喪插。
—
觀影前睇咗不少有關這套電影的評論，其中一個最大嘅指控，莫過於係「漂白」。到底乜嘢係「漂白」呢？八九年死咗人，政府說無，將唯物的事實扭曲，毫無疑問係一種漂白；當一個社會存在咗好多顯而易見嘅問題，仲要話「無問題無問題」，粉飾太平，又係漂白。但喺《中英街1號》入面，我睇唔到呢種扭曲嘅做法，反而睇到導演對於人性嘅睇法。
—
我諗，導演係覺得人性本善，就算唔存在善性，只少都有推動社會有良性轉變嘅心。
—
六七暴動入面嘅炸彈、殺人，或一切暴行，《中英街1號》其實無迴避到，只係電影多以口述或旁敲側擊或溫柔化嘅形式去處理，但總算係有講。電影的重點，反而係喺不同政治社會環境之下嘅「人」。
—
其中一個對電影嘅批評係，將一堆暴動嘅惡棍描繪成和善、有理想嘅人，其實現實並唔係咁樣，佢哋係魔鬼，為達到目的不擇手段嘅人渣。我同意暴動某程度上只係中國對於香港嘅政治操作，將人命同社會安危放到談判桌上嘅一個手段，以生命做籌碼。但又有邊個可以判斷所有參與暴動嘅人都抱住呢個心態呢？邊個可以肯定無人係為咗「理想」而戰？最少，我諗唔會所有參與六七嘅年青人都係為咗回歸之後可以做高官而搞事，《中英街》拍出佢哋嘅故事，又有何不可呢？
—
六七暴動，令我諗起旺角事件。無錯，兩者係無可能相提並論嘅，不論程度、規模抑或動機，都唔可以作比較。但後者又有無可能會搞出人命呢？我覺得有。其實好多事件會發展去到邊一個情況，有社會背景框架支撐，但更多時係存乎一念，如果當日磚頭飛去警察後腦，槍唔係向天開，香港今時今日又會有咩轉變？邊個都估唔到。
—
生命誠可貴，每條人命都係彌足珍貴，唔可以隨便拎走，係千真萬確嘅。但喺大歷史嘅視野下，呢啲東西又可以輕如鴻毛，冷酷無情。例如若果未來中國走向獨裁專政，但係社會同經濟發展得愈嚟愈好，甚至躋身成為世界最強嘅國家，咁八九一事又會唔會被描繪成為鎮壓反動份子的一場豐功偉績？六七又會唔會由暴動昇格為人民覺醒嘅重要事件？史書由人去書寫，未來決定過去。
—
呢種視野，可以直接投射於因為「旺角暴動」而入獄嘅人士上。今日去睇，「獨立」無望，涉案人士比人判監，社會人士話佢哋破壞社會安寧，佢哋喺現時係「輸家」。但未來呢？如果未來真係如佢哋所願，而社會亦能夠健康發展嘅話，今日嘅囚犯又會變成未來嘅英雄，功過不在當下，而需要從成個大歷史嘅脈絡而觀之。
—
《中英街1號》嘅後半段，講述2019年年青人有關大型社會運動後嘅無力感，有人選擇逃避，歸隱田園；有人嘅心仍然熾熱，但唔知可以做啲咩；有些人選擇離開香港，去外國潛尋學問。但不約而同嘅係，佢哋覺得自己做任何事都無辦法改變社會，徒勞無功。
—
政治好容易令人陷入困於當下的境況，畢竟社會變化唔會一時三刻而嚟。六七嘅極端暴力對比一九年嘅和理非非，有人話呢種類比不公允，唔可以將醜惡嘅魔鬼同純潔嘅年青人做比較。但咁又可不可以視之為係一種進步呢？兩個時代會通的地方係，年青人都唔知道未來將會係點，他們將會係英雄，抑或係狗熊，但他們都為住自己嘅理念去做事。
—
人喺大歷史的洪流之下，即使已經很努力，都可能成為未來人見人憎嘅搞事者。人應該點樣自處？游學修飾演嘅一航返到屋企，比爸爸張同祖喪打，然後張同祖話點解自己個仔喺度避，都唔堅持去做自己認為是係啱嘅事。
—
你永遠都唔會知道你做緊嘅事，喺「未來」嚟講係「啱」，定係「錯」。但係你可以決定嘅係，你呢家做嘅嘢喺「當下」究竟有無問題。游學修喺監獄同廖子妤對話，其中講到人係由乜嘢組成，就算死咗都仍然會存在等等，不死嘅就係你留落嚟嘅思想、信念。
—
社會影響人，但人又偏偏組成咗社會，唯「行動」兩個字，將你信奉嘅事物以行動做出嚟，聚集志同道合嘅朋友，甚至可以一齊影響番個社會轉頭。未來係點，無人能夠控制，亦唔需要控制，最重要係廖子妤所講嘅「無悔今生」。
—
無正確嘅政治立場，只有最適合時勢嘅睇法，社會不斷變緊，點解人唔可以變，而要被扣上「投機」嘅帽子呢？正如戲中嘅永權伯，佢參與過暴動撐中國，但後嚟又想自焚反香港政府。其實唔緊要架，最緊要係去做對得住你自己，你認為係「啱」嘅事。可能第日中國真正欣欣向榮，大家爭住真心愛國呢？You never know.
—
趙導以呢種眼光講政治，又超越政治，雖然兩邊不是人，一定會引嚟好多抨擊，但視野非凡。
—
中英街1號 No.1 Chung Ying Street
Fish Liew 廖子妤
盧鎮業(小野)
游學修 Neo Yau
未來決定過去 在 未來決定過去? 不可思議的惠勒延遲效應 - YouTube 的推薦與評價
未來決定過去 ? 不可思議的惠勒延遲效應. 497 views · 7 months ago #心想事成 #第三眼 #量子力學 ...more. 西瓦超心靈感應. 1.49K. Subscribe. 1.49K ... ... <看更多>