【與眾不同】
去年夏天…
73歲打扮時尚嘅佢，突然上嚟中心搵我…
佢同接待處同事講：「我想搵阿肥姑娘，我想借個助行架…」
同事未等我出去，已即時答咗佢：「妳係咪護老者？如果唔係，冇得借！」
我即時出去了解，戴住淺黑色太陽眼鏡嘅佢，強顏歡笑同我講：「阿肥姑娘，我想借個助行架…」
我問：「妳幫人借？」
佢：「唔係！我自己用！」
我，一早知道佢無親無故…
當時，辦公室有三位同事望住我，三位都喺中心做咗好多年…
中心有復康用具借用服務，由護老者服務同事負責，當值社工協助處理。借用對象係住喺我哋中心服務範圍內嘅護老者(或被照顧嘅長者住喺我哋服務範圍)。登記做護老者會員唔需要費用，但一定要有兩張身份證(長者+護老者)同住址證明。借用復康用具會收$100至$300按金+每個星期$5至$10嘅租借費。
我：「妳自己用？發生乜嘢事？」
佢：「我喺公園做運動時拉傷咗尾龍骨同右腳，宜家好痛，覺得淨係篤住把遮唔穩陣…」
我大驚：「吓？咁妳睇咗醫生未？妳點上嚟？」
佢：「我啱啱喺下面做完針灸，慢慢篤住把遮行上嚟…」
我同同事講，婆婆係中心會員，獨居，冇親人，可唔可以照借俾佢？佢願意照俾借用費…
三個同事一齊答：「唔得！佢都唔係護老者！」
我問佢：「妳可唔可以隨便搵個朋友出面做妳護老者？」
佢：「我冇啊…」
我入辦公室同同事商量：「我之前都借過四腳叉俾中心會員，照借俾佢得唔得？因為佢真係冇親友！」
同事答我：「咁妳問返負責護老者服務個同事啦！」
護老者服務同事？前負責同事試過因我借咗支柺杖俾無親無故嘅獨居長者公開喺其他同事面前話我；現負責同事則呢兩日放假！
佢，企喺接待處隔住玻璃望住我哋，眼見租借過程有阻滯，眼淚開始流落嚟：「我會照俾錢，我會還返俾你哋…」
我安慰佢，同同事講：「咁不如我轉贈支四腳叉俾佢？再唔係，我做佢護老者！」
我出去問佢：「我轉贈支四腳叉俾妳好冇？如果妳要借助行架，我就做妳護老者！」
佢破涕為笑：「四腳叉都OK！我唔駛轉贈，我借就可以，好返我會還返俾…」
我阻止佢再講落去：「我可以轉贈俾妳，妳收咗先，真係好返先考慮俾唔俾返我！總之宜家我轉贈俾妳！」
同事冇再出聲，因為社工有權轉贈復康用具俾有需要嘅長者。
佢好醒目：「明白！明白！OK！OK！」
佢篤住四腳叉，我送佢搭升降機…
「阿肥姑娘，多謝妳…」
「唔駛客氣！小心啲呀！」
我，未必係一個受歡迎嘅同事，背後亦成日俾唔少同事講是非…
但喺好多老友記心目中，我係一個值得佢哋信任同求助嘅姑娘…
事實上，我亦唔會改變…
因為，我覺得自己冇做錯！
後記：轉贈咗支四腳叉俾佢兩個月，九月中，佢回復昔日英姿健步如飛行上嚟，捐返支四腳叉俾我！
柺杖租借 在 彰化縣輔具資源中心- Posts | Facebook 的推薦與評價
放上了最新的租借價目表和酌修部分內容，請有需要的單位或人員，可至二林中心、田尾中心、彰化據點索取，防疫期間請大家記得戴口罩、勤消毒，做好自身防護喔 . ... <看更多>