［價值千幾萬嘅叉燒］嗚丫，真係食咗識飛。好好味呀。味王上身咁，應該見到我踩住塊砧板在深水灣滑浪，撞開晒啲鬼妹
1. 是咁的，早幾日應友人之請，去深水灣高爾夫球會。波我就唔識打，但飯就識食。席間主人家講起呢個叉燒必食，咁主人家講乜我都照聽架啦，人地熟過你。
2. 食落，果然好好食。可能我見識少，但的確係我四十年以嚟，食過最好嘅叉燒！然後忽然懷念講排球嘅雷Sir 雷禮義（都話我啲思考好跳躍）（＊）
3. 席間有人講起，某富貴朋友，明明唔打波，但拎千幾萬去入會—就係為咗嚟食叉燒。當然我等窮人心諗，你不如請個大廚返屋企，日日整都唔使咁價錢。但一來，會藉可以轉讓（扣返幾成手續費咁咯），二來，有錢人嘅思想同我地點同呢？三來，除咗食叉燒，仲可以食皮蛋，食雞，真係樣樣都好食。
4. 當然啦，艱險我奮進，困乏坐多程，新亞桑拿都係咁宣傳。冇千萬叉燒嘅，其實幾廿蚊一樣有好選擇，公司樓下嘅食神叉燒一樣不錯，長沙灣（定深水步？）（定荔枝角？）嘅森記餐室亦好，普通叉燒可以了，伊比利亞黑毛豬反而多餘。同老母同女食嘅，咪西苑益新，退步咗但還見得下人。
5. 總之人生總係有選擇，唔選擇都係一種選擇。哈維爾定華里沙（都係東歐佬啦，唔使分咁細）坐監時，冇酒冇咖啡，只能飲茶（東歐佬再獨裁還是有點文化），仲愛上咗飲 Earl Grey（咁啱嘅，我都係）。個重點係，呢個係佢覺得可以自主嘅嘢。坐監都總有自主，冇得飲酒冇得飲咖啡，你都仲可以有選擇。就算只能Earl Grey，都係有得選擇幾時飲，趁熱飲定攤凍先飲。聽落阿Q，但其實亦係睇你點睇。苦樂嘅嘢，真係好多程度係主觀嘅心。粗俗啲講句，你有錢都唔係個個有得搞Miranda Kerr，有錢一樣可唔開心（＊＊）。但就算你窮到在農村對住黃面婆，都仲可以選擇點搞，甚至唔搞，總係有選擇。
6. 噢，BTW，深水灣，我好多年前嚟過一次（我又唔游水，去嚟做乜？）。講緊讀大學年代，廿年前。幫某富豪嘅小朋友（＊＊），拿，真係富豪，香港應無人不識嗰種級數。其實幾乎變咗係《上流寄生族》，不過礙於當事人私隱，費事爆太多。佢老母（我指佢，唔係真係佢老母）間房真係大過我間屋，然後張書枱好似我間房咁大。都算，最重要係，個窗望出去，就係個沙灘，好多鬼妹的說。我就多數望住鬼妹，然後心諗，如果第時出嚟做嘢，有一日可以日日望鬼妹就好。結果真係天道酬勤，雖然我唔係救生員，但汾說要有鬼妹，於是便有了鬼妹。唔係太多年後，就有了pornhub．
7. 一件叉燒都寫到千幾字仲唔知寫咗乜，其實我啲文采好過周柏豪，可惜冇佢咁靚仔。
（＊）而我到佢死咗之後，即係舊年，先知原來係台山話
（＊＊）但當然了，有得揀梗係揀有錢，我冇聽過有錢嘅人唔開心會想變返冇錢，只有掉轉。你以為有錢人好似你想像中咁快樂？錯了，有錢人嘅快樂，你根本想像不到。
（＊＊＊）家族好多小朋友嘅，唔使估邊個，當然如果你係個小朋友，歡迎嚟相認
桑寄生蛋茶幾時飲 在 桑寄生蛋茶功效不止孕婦安胎 女生調經恩物 降 ... - YouTube 的推薦與評價
桑寄生 蓮子 蛋茶 # 桑寄生蛋茶 # 桑寄生 蓮子 蛋茶 功效保健中藥材 桑寄生 ，最出名甜品食譜就是 桑寄生 蓮子 蛋茶 ，但說到 桑寄生 茶功效，十個人九個人， ... ... <看更多>