【 泰劇泰好笑之驚死你睇唔到啲Product Placement 】
世道惡劣至此,萬惡呼風喚雨,嚴肅的新聞和評論要睇,欺凌弱小的正仆街要鬧,但也要為自己開一個缺口,釋放鬱悶壓力,能夠盡情瘋狂爆笑固然好,深宵瑟縮一角默默流淚也並非代表懦弱,總之心要強大,關鍵在於情緒不要失衡,緊記,這是一場持久戰,學習《權力遊戲》(Game of Thrones)裏的Arya Stark(Maisie Williams飾)那樣,每天默念仇人名字,天理循環報應不爽(https://bit.ly/2VxOU9d) 。學李嘉誠「紅顏知己」周凱旋話齋:「我自己是基督徒,我信《聖經》所說,There is a time for everything,不用心急誰和誰要落台。」日後盡量別教今天的淚白流,撐下去,不要死是當下我們最需要堅守的信念,所以我近來真的瘋狂看泰國電視出品,無他,人靚仔,劇好睇 ~~~ 不不不,應該是劇好笑才對。
就以近來熱播的GMMTV新推出的《因為我們天生一對》(2gether: The Series)的五集特別篇《因為我們依然天生一對》((Still)2gether)為例,每次透過YouTube收看新一集總是凌晨時份:三更夜半一個人,睇到中途笑吟吟,不明就裏的阿爸阿媽還以為壓力太大開始出現「黐綫」傾向,實情是劇情夾硬(其實比正傳來得合理很多)、Bright-Win那些令人經常反白眼的幼嫩演技(尤其是Bright,特別篇算是有明顯進步),已經令人很自然的笑出來,更重要是那些驚死你睇唔到的Product Placement(植入式廣告),直頭是每集的另類「Punchline」,廣告客戶擺明車馬出盡奶力Hard-sell三部曲,都能夠令觀眾嘆為觀止 ── 永遠有產品近鏡,繼而將宣傳語句融入對白裏,再而親身試用,總之「Kamcholia」起來,面不紅,氣不喘,如果閣下看YouTube時選擇輔以「連登泰劇港字組」製作的生鬼字幕,真的會笑到再標多兩滴眼水,奉勸各位切勿深夜這樣做,打擾家人。
翻看過去四集《因為我們依然天生一對》,受惠「金主」(品牌)包括:MALI煉奶、MAMA OK Generation即食麵、膠原蛋白飲品COLLY PLUS LYCOPENE、化妝護理品牌IDOLO、Lactasoy豆奶、Oishi綠茶飲品,絕大部份都是擺得落口,所以每一集總有一兩場戲是跟食嘢有關。例如第一集阿Tine練結他至夜深,返到屋企後飢腸轆轆,見到枱上有碟炸麵包,於是沙拉骨(Sarawat)就話:「我畀你揸下我個奶幫你下叉電啦!」阿Tine立即話:「叉鬼到電咩?!」然後阿Wat就在旁邊拿出一包MALI煉奶出來,完美示範何謂「因為時間關係已經整好碟餸,完!」不止講,還要做,阿Tine要對住鏡頭「擠奶」。第三集,講阿Wat洗面,當然要用最新推出的「IDOLO BRIGHT SIDE」潔面乳啦,阿Bright更立即示範,感覺有如內地最時興的藝人直播帶貨。
另一個例子,出現在剛剛播出的第四集。分開多時,Tine與Wat終於在大學校園重遇,為表掛念,阿Tine拿出一支Oishi巨峰提子綠茶出來錫一啖(同一品牌的飲品是他們的定情信物),再拋過對面馬路的Wat,阿Wat禮尚往來,又錫多啖。當今泰國當紅炸子雞阿Bright賜吻,這款飲品想唔爆賣都幾難。很多人懷疑,這種植入式廣告有沒有用,答案是有。第三集,阿Tine返到屋企,打開雪櫃見到成層都是DOI KHAM泰國皇家果汁系列,我當堂笑出嚟,然後朋友告之,「阿布泰國生活百貨」有得賣,更推薦荔枝味,結果?咪就係買咗4盒試試,每盒大概$9,喝下去的一瞬,我覺得自己跟Bright-Win的距離近了很多,又可以支持黃店,一舉兩得。(https://bit.ly/2DEE9Mo)
【延伸閱讀】
*八月天 ─ 撐下去,不要死!https://bit.ly/3lgCg9y
*《因為我們天生一對》特別篇Bright-Win隨時冇親密戲?https://bit.ly/31M284b
*GMMTV四大BL劇CP同框:https://bit.ly/2ETynXZ
*九月必睇泰劇《I'm Tee, Me Too》:https://bit.ly/35dF41P
(09092020)
#游大東 #游大東影視筆記 #泰劇 #STILL2GETHER AbouThai 阿布泰國生活百貨 #BRIGHTWIN #WINBRIGHT 快樂的 港女講劇 做乜膠睇電視
植入式廣告例子 在 Ming's Facebook 的最佳貼文
|STORY|日前,IISE在社交媒體上傳最新系列,竟然是一頂來自朝鮮時代的黑笠。
內文:https://bit.ly/2DNBQ9M
#MINGS #IISE #小眾品牌 #韓國 #韓服
相關文章:【GANGNAM STYLE】不知不覺間我們都在看韓劇的植入式廣告? https://bit.ly/3kBlG43
________________________________________
FOLLOW US NOW
➜ WEBSITE www.mings.hk
➜ INSTAGRAM www.instagram.com/mings.hk
➜ YOUTUBE www.youtube.com/mpwmings
植入式廣告例子 在 有心無默 Facebook 的最讚貼文
《無異之地》極樂謊園(十三)
自七月初喺無二手上接過萬變紙,我就一直照佢指示持之以恆咁訓練。結果,三個月後嘅今日,我總算叫做學有所成,喺危急關頭變出武器扭轉形勢。
「可惡……」另一個『我』氣急敗壞咁企返起身,「你到底係點做到?」
既然講得呢句,即係代表佢完全唔知萬變紙係咩一回事,亦都冇嗰段「經歷」嘅任何記憶。
係咩經歷?
事實上,我並唔係第一次成功使用萬變紙。記得喺訓練嘅初期,我已經可以變到類似擦膠、紙巾、電池之類嘅小物件,但真真正正有成功感覺嘅一次……發生喺八月七日,嗰日正好係我同如初嘅拍拖紀念日。
*
*
*
=========
一至十一集:
https://www.facebook.com/pg/Echo.of.Heart/photos/?tab=album&album_id=1736011713197304
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售!
=========
【回憶】
嗰一晚,我先約如初去一間我哋兩個都非常鍾意嘅餐廳食飯。食完之後我就提議去沙灘吹下海風,然後實行我嘅「大計」。
到埗後,我哋先牽手漫步咗一段路,然後就隨便搵個位置坐低慢慢傾。當我注意到附近開始冇咩人,時機差唔多成熟嘅時候。我就叫如初擰轉身,準備畀一個驚喜佢。
「係咩驚喜?」如初毫不猶豫就轉身背對住我。
各位千祈唔好誤會,我當然唔係諗住求婚。其實早喺狄陀出現之前,我同如初已經有共識唔會短期內進行呢件人生大事,而佢嘅出現亦都冇改變呢個計劃。
只係,多少都會影響到其他安排……
「妳知唔知今日除咗係我哋嘅拍拖紀念日,仲係日本嘅七夕?」我邊講邊靜稍稍咁撕出一張萬變紙,然後握喺掌心裡面。
「喔!」佢聽完好意外,「原來你仲記得……」
「我當然記得喇。上年妳話過想今年暑假去日本參加七夕祭同睇煙花大會。但因為『嗰件事』,所以只可以延後……」
「嗯,因為我真係好驚,驚離開香港無二先生就冇辦法保護到你……」
實際上,無二都曾經建議過我,喺解決呢件事之前盡量都唔好離開香港。
「對唔住。」
「傻喇做咩要道歉喎?錯嘅又唔係你……況且我呢期都好忙喇,其實去唔到可能仲好。」如初認真咁講:「講返個驚喜啦,同七夕有咩關係㗎?」
「妳等陣。」我先深呼吸口氣,合埋雙眼開始想像嗰件我想變出嚟嘅物品。
當刻,我可以話係前所未有咁專注。因為,我係真心想如初開心……至少,喺我哋呢個重要嘅紀念日,可以忘記所有煩惱,渡過難忘嘅一晚。
就喺下一瞬間,我感覺到萬變紙嘅形態開始出現變化,最後變成同我預想差唔多嘅木盒。
我先望一眼確認冇問題後,即刻興奮咁同如初講:「得喇,妳可以望返過嚟!」
如初一開始見到木盒嘅時候都仲係一臉疑惑,直到我打開個盒,佢先恍然大悟咁講:「呢個係……線香煙花!?」
「嗯。」我點點頭。
所謂線香煙花,係一款喺日本好受歡迎,可以握喺手上面玩嘅小型煙花。因為燃燒嘅時間短,散發出嚟嘅火花亦唔強,所以算係相當安全嘅小玩意。
「我想試好耐!但點解你會有嘅?」如初顯得又驚又喜,「照計香港應該買唔到……」
「總之我有辦法啦。」我自信滿滿咁講:「我哋快啲一人拎一枝試下。」
「但呢度唔係唔玩得咩,怕唔怕……」如初望一望周圍,隨即就注意到附近已經冇晒人。
「我哋都面對過咁多事囉,仲有咩好怕?」我反問:「如初,我一直起嚟最怕嘅……就係妳唔再開心。」
「口甜舌滑。」如初靦腆一笑,然後用姆指同食指夾起其中一枝,「咁我哋就趁冇人快啲玩啦。」
見如初一臉期待,我當然係事不宜遲,先用火機點著佢嗰枝,再輪到自己。
接住落嚟嘅短短兩分鐘,我哋兩個肩並肩咁睇住手中煙花嘅變化──由一個小火球、慢慢開始有火花飛散、再越發越燦爛、終於燃燒殆盡重新變成小火球……最後完全熄滅。
意猶未盡嘅我哋當然係繼續燒……一直燒……不經不覺就燒到去最後一枝。就喺我準備點著嘅時候,如初突然感觸咁講:「美好嘅事物,好似總係一瞬即逝。」
「但只要我哋一齊,」點著之後,我即刻捉住佢空出嚟嘅左手,「就會有更多美好嘅事等緊我哋。」
語畢,我同如初不禁互相凝視。我從佢清澈嘅眼眸裡面,見到火花閃爍不停……然後,我哋好自然咁越貼越近。
好想好想,時間可以永遠短喺呢一秒。
*
*
*
正因為嗰次嘅成功,令我使用萬變紙嘅時候變得更有信心。當然,隨住訓練嘅難度逐步提高,失敗嘅例子都係多不勝數。
但毫無疑問,之前嘅所有成功同失敗,都係為咗呢一瞬間……性命尤關嘅瞬間而準備。
「喂園長,睇嚟你哋嘅複製人技術仲有好大嘅進步空間。」無二笑住講,佢應該都意識到「我」嘅記憶係有缺失嘅部份。
「你要明白……想完美咁複製一個人嘅靈魂同記憶,從來都唔係一件易事。」園長回應嘅時候語氣依然輕鬆。
「明嘅,況且你都應該冇咩時間準備。」無二接著講,畀我嘅感覺就好似兩人喺度閒話家常咁。
「不過。」園長突然加重語氣,「佢越唔完整,變相就係越容易控制。」
就喺佢講完嘅瞬間,「我」嘅表情變了……從驚訝變成憤怒,眼神亦都充滿殺意。
「我要殺死你……然後由我去保護如初。」『我』用力握緊刀柄,準備重新展開攻勢。
「況且,你嘅助手又有冇勇氣殺死另一個『自己』?」
下一秒鐘,「我」已經再次衝到嚟面前一刀斬落嚟。今次雖然成功擋住,但對方力度之大,不禁令我嘅右手發麻。
說時遲那時快,「我」馬上再嚟一下右揮斬。本來我以為自己退後得切,但下剎那突然傳嚟刺痛感……驟眼見到恤衫胸前位置被斬開咗,但未有機會睇到傷口有幾深。
「阿聰,你唔係俾佢講中呀!?」無二再次大聲道:「狠心啲,呢次唔係你死就係佢亡!」
我當然知道……但要落手殺死一個有血有肉嘅人,並唔係短短一瞬間就可以作出覺悟,何況對方仲要係「自己」……
諗到呢度,我再次避過對方嘅一刀,今次幾乎差少少就會失平衡。但亦正正係呢一秒鐘,我突然有種似層相識嘅感覺──當時,我都係差少少就會跌低,同時又俾不知名嘅黑蟲所割傷。
哐!
就喺兩把刀再一次碰撞爆出火花嘅一瞬間,我手上把刀頓時化成碎片飛散開去……我趁住對方停低動作嘅瞬間,一連退後咗好幾步。
「勝負已分啦。」可能見我冇武器喺手,對方亦都唔急於進攻。
呢刻,雖然好似變回劣勢,我並冇任何慌張,反而係非常專注……先摲出另一張萬變紙,然後回想返當時嘅一幕──嗰陣喺尾東樓,我利用無二留畀我嘅打火機,成功擋住怪物嘅攻擊……
「呼……」
就喺下一瞬間,我感覺到右手握住一把熟悉嘅打火機。然後,搶喺對方作出下一次攻勢之前,舉起再順勢噠著佢。
接著,一聲猛烈嘅──蓬──熊熊烈火突然喺我面前爆發開去,凶猛程度就好似我係拎住一把噴火槍一樣。另一個「我」見狀當然係嚇到停低腳步,本來呢個距離佢一定係避唔過的。但火並冇將佢吞噬,而係形成一道火漩渦,將佢整個人圍困住。
「點解……啊!?」『我』嘗試伸出另一隻手,但只係靠近就被烈火所灼傷。
既然落唔到手殺佢,就唯有諗辦法困住佢。我就係帶住呢個想法,將喺尾東樓發生過嘅事重現一次……
「估唔到……真係做到。」雖然事前係充滿信心,但到呢刻真係成功之後。我居然又會覺得好冇真實感,總之就係好難以置信。
啪、啪、啪──就喺下一刻,我旁邊忽然傳出拍掌聲──係園長,原來我不知不覺就退到佢隔離。
「厲害。」園長感嘆咁講:「不愧係無二嘅助手,果然係有一定實力。」
我有一秒鐘猶豫過應唔應該趁呢個機會制伏佢。但意外嘅係,我突然有種全身上下都被抽空嘅感覺,身體瞬間變得軟弱無力,最後成個人跪喺地上面。
「你……」我好勉強先抬起頭怒視住佢。
「唔係我做。」園長舉起雙手否認,然後望向另一個『我』嗰邊,「你以為憑空變出咁有殺傷力嘅招式唔需要代價?小兄弟,只要個火焰漩渦一直存在,你就會不斷咁消耗自己嘅魔力。」
聽落佢並唔似係講大話,而事實上我都冇考慮到呢點……但如果喺呢個時候整停佢,情況咪會變得更加危險?
「等我幫你喇……反正,你都已經完成『蛻變』,我相信無二先生應該都好滿意。」說罷,園長即刻輕輕拍一拍手。
「無二?」我本來仲奇怪緊呢句說話係咩意思。但就喺下一瞬間,背後突然傳嚟慘叫聲。
「啊啊啊啊啊啊啊啊啊啊啊啊啊啊啊啊───!」係另一個『我』,佢居然試圖穿過火牆,結果當然係令到自己被烈火燒傷,但佢並冇因為咁停落嚟。
「停呀!」我再次望向園長,因為都幾肯定係佢落嘅命令,「快啲停手呀!」
「小兄弟,放低無謂嘅善悲啦……既然你已經贏咗,咁佢當然係冇存在價值。」園長冷漠咁望向另一個『我』。
只係短短幾秒鐘,「我」已經成個人被火吞噬,佢嘅痛喊聲亦都變得越嚟越虛弱。終於,佢從火漩渦裡面伸出一隻焦黑嘅手……
「如初……」
當佢用盡最後一口氣呼喚出呢個名字後,佢整個人向前瞓喺地上面,一動不動,全身上下都已經燒焦,再見唔到本來嘅樣貌。
就喺下一刻,火焰漩渦亦都慢慢消散,係因為佢知道敵人已經被消滅?無論係咩原因都好……唯一確認嘅係,嗰種意圖抽空我全身嘅感覺亦都慢慢褪去。但我並未因為咁起返身,而係一直茫然咁望住燒焦嘅屍體,直至一把熟悉嘅聲音喺背後響起。
「起身喇,你已經做得好好。」係無二,「好到超乎我想像。」
我轉身望過去,當刻幾乎係震驚到講唔出半句說話。因為,無二唔單止已經鬆綁,臉以及身體受傷嘅痕跡都同時消失晒。準確啲講,狀態同我哋失散之前可以話係一模一樣。
「點解……」
「我諗由我解釋會比較好。」回應我嘅人係園長,「小兄弟,其實我早就知道你哋今日會親臨『極樂園』。作為樂園嘅園長,我當然唔希望無二先生插手樂園嘅『事務』。所以,我喺事前做咗少少準備,等你哋轉移過嚟嘅時候強行分開你同無二先生。目的,就係希望利用你作為談判嘅籌碼。」
「談判嘅……籌碼?」我茫然咁重複。
「當然喇,」園長望向無二「以無二先生嘅能力,呢樣肯定都係佢計算之內嘅事。」
「過獎。」無二聳聳肩,完全冇打算否認。
「之後,就係我同佢兩個男人之間嘅會面。」園長繼續解釋落去:「正確啲嚟講,我哋係進行咗一次交易──無二先生話,只要小兄弟你可以安然無恙咁離開樂園,佢就唔會干預之後發生嘅任何事。」
聽到呢度,我依然係一頭霧水。假如佢哋真係進行咗交易,咁頭先發生嘅又係咩一回事?明明,我差少少就會死喺「自己」刀下……
「嗰陣我聽完無二先生嘅提議後,我即刻作出強烈反對……」然而,園長馬上就解答咗我嘅疑惑,「我話唔可以。以無二先生嘅能力,想將整個『極樂園』連根拔起根本就係輕而易舉嘅事。所以,作為細嘅,我決定盡下綿力,訓練下佢最重視嘅助手。」
「吓?」聽到呢度,我再一次望向無二,內心係希望佢可以否認一切,但佢並冇咁做到。
「而小兄弟你,確實表現得好好……唔單止抗拒晒所有誘惑,仲用實力擊敗咗另一個自己……係名乎其實咁作出『蛻變』。」
換句話說,之前發生嘅事……全部都係無二默許下進行?只係為咗,睇下我可以做到咩程度?
「噁……」可能因為一時三刻接受唔到呢個事實,加上頭先魔力用得太盡,所以我終於忍唔住嘔出嚟,「嗚……」
「好喇,呢邊嘅事解決咗,接住落嚟就到另一邊。」說罷,園長馬上轉身向前行,下一瞬間前方帳篷就自動打開咗一個通往外面嘅出口,「你哋有興趣嘅話可以一齊嚟睇,但記住唔好違背承諾呀。」
「阿聰,」幾秒後,無二行過嚟拍一拍我肩膀,「我知道你有好多嘢想問,甚至可能有啲怪我……無論點都好,我哋先離開呢度,其他嘢再慢慢解決。」
「我唔走……」我慢慢撐起身,「園長所指嘅另一件事,係咪同Cheryl有關?」
「冇錯。」無二點點頭,「但我唔建議你睇落去……你今日承受嘅事已經夠多。」
雖然無二係咁講,但今次我並冇照佢說話做,而係慢慢行去帳篷出口。我隱約聽到佢嘆咗口氣,最後都係選擇跟住我行。
離開巨型帳篷後,映入眼簾嘅係一個旋轉木馬。可以見到周圍除咗園長之外,仲有幾張陌生嘅臉孔,以及一個俾人綁住雙手、以及眼罩遮住臉嘅人──我認得佢呢身打扮。
「Cher……」我正想開口,但無二即刻制止咗我。
「阿聰,我哋咩都做唔到。」無二認真咁講:「你只可以睇落去。」
就喺下一刻,企喺Cheryl旁邊著住樂園制服嘅女人慢慢揭開Cheryl嘅眼罩。可以見到佢神情非常慌張,隨即就注意到佢面前嘅園長。
「陳……陳伯?」Cheryl睜大雙眼,用難以置信咁語氣問:「到底……發生咩事?」
「小妹妹,我哋又再見面啦。」園長微笑道:「等我重新介紹下自己。我全名叫做陳瀚洋──樂園代號係January……」
「……同時亦係『極樂園』嘅園長。」
(待續)
下回:殘酷現實。
同時亦係《極樂謊言》嘅最後一回。之後應該會出個短篇故事~敬請期待。
睇完又鍾意呢個故事嘅朋友,不妨分享出去同埋留句 #留言派嬲 ~我哋 100 SHARES 繼續,下集暫定星期四或五。
===================
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart
植入式廣告例子 在 【#01港聞】一人一個困擾你嘅植入式廣告例子 - Facebook 的推薦與評價
01港聞】一人一個困擾你嘅植入式廣告例子,小編先:#May姐雞汁…… #以下開放留言全文:http://bit.ly/2IUELtY 【#植入式廣告】 通訊局諮詢放寬免費電視 ... ... <看更多>