同女朋友出街時俾箭射（上）
今日，我約咗女朋友童童出街。
一個頭上插住好多條羽毛嘅印第安人，突然出現，喺背部抽出弓箭，就向我哋一箭射埋嚟。
我梗係呆咗。
千鈞一髮間，一個拎住盾牌嘅金髮男人出現，飛身用盾牌擋住咗支箭，兩個怪人就開始近身搏鬥。
路人都尖叫四散，我拉住女朋友跑開。
但我從來都對人哋嘅目光好敏感，跑開前嗰一刻，我遠遠望到，嗰個印第安人用一種仇恨嘅目光，望住我同童童。
我幾乎可以確定，佢要射嘅對象，係我哋其中一個。
遠離現場後，我不斷喺度諗，個印第安人到底係邊個呢？唔通我同佢有仇？冇人會識一個印第安人，而自己唔記得掛？
呢個時候，童童突然開口：「BB啊，前面嗰間奶茶好好飲，我哋買番杯丫。」
「吓？」我再一次呆咗。
童童又問：「你唔想飲咁多嘅話，我哋兩個人分一杯？」
我哋啱啱差啲中箭，好不容易先從混亂中跑出嚟，佢居然仲有心情飲奶茶？
童童見到我詫異嘅眼神，嘆咗一口氣：「咁……今日係最後一日啦嘛。」
佢咁樣一講，我又有啲明白。
唉，講番我哋嘅情況先，我叫阿邦，同童童一齊咗兩年啦。
聽日我就要飛去外國讀書，一讀就讀四年，仲有時差添。
童童好唔捨得我㗎，但我為咗前途著想，都冇辦法唔走。
所以，我應承咗童童，今日要專心陪佢一日，佢想去邊，我就去陪佢去邊。
童童好珍惜今日嘅時光，可能因為咁，即使受到咁大驚嚇，佢都想同我專心拍拖。
「我同你一齊去買奶茶啦。」我將印第安人嘅事拋諸腦後，可能係我錯覺啫，無啦啦點會得罪個印第安人。
但奇怪嘅事一浪接一浪，下午我哋去咗食Tea。
一個小朋友拎住碗楊枝甘露行埋嚟，同我講：「哥哥……」
我以為佢係老闆個仔，幫手上吓菜，我就伸手接過碗楊枝甘露。
呢個時候，童童突然大叫：「唔好啊！」
下一秒，小朋友喺碗下拎出一把好薄嘅刀，就向我拮埋嚟。
我梗係反應唔切，然後，另一把飛刀喺遠處飛埋嚟，同小朋友嘅薄刃相撞，撞開咗。
我下意識望過去，飛刀嘅主人，係一個著住黑寡婦嘅女人。
黑寡婦同小朋友搏鬥，童童就抓住我隻手，逃離甜品店。
一離開甜品店，我即刻問：「到底發生咩事？」
「可能係個天見我哋係最後一日，想我哋留低啲深刻嘅回憶掛。」童童雙眼亂轉。
我一眼就睇得出佢講大話，個小朋友擺明係嚟刺殺我，仲有特工級嘅身手同演技，保護我嘅人都相當強大……
問題係，我只係一個普通家庭出身嘅普通男仔，冇咩大成就，亦冇機會結下咩大仇怨。
點解會有咁多奇人異士，為咗殺我或者救我，打生打死？
童童攬住我，好嗲咁問：「我一陣仲想去睇戲，你有邊套戲想睇啊？」
我一手推開佢：「我都就俾人殺死啦，仲睇戲？」
「佢哋唔會畀你死㗎！」童童下意識答。
「佢哋？你知道嗰啲係咩人？」我捉到童童嘅破綻，好似發炮咁追問佢。
童童係咁喊，係咁叫我唔好問，平時呢一招都好有用㗎，但事關生死，我唔會俾佢蒙混過關。
結果，佢終於俾我問到受唔住，講出真相。
下集：https://bit.ly/3Cc5yxW
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #同女朋友出街時俾箭射
楊 定 一 一 切 都好 在 楊定一博士．全部生命系列- 也剛剛好。 過去 - Facebook 的推薦與評價
一切 生命過去所發生的，都是這麼的剛剛好。 一切生命所安排的，都剛剛好。一點都加不上，也減不了。 活在這裡!現在!也是剛剛好。 剛剛好。 走到今天，也剛剛好。 ... <看更多>