因為做故事要執舊物。
對1982年這位小朋友好陌生，又矮又神經，如果有機會見番佢，都想同佢傾下。當年上堂完全無法專心，不時上課發出聲響，自己傻笑，講粗口，掟粉刷，無停駁嘴，真係黐孖筋，連體育亦唔及格。位位老師都非常痛恨我，小息通常要罸企教員室。放在今日，真係躁鬱、專注力低落、認知障礙、思覺失調、過度活躍乜都齊，阿媽又冇話帶我睇專科醫生食藥，係阿爸有時會燒啲符俾我食，希望祖先會救下我，不過唔算有效。如果當年有黃巴士或正生書院會可能幫到我。
滿缸紅的成績表我見過，但到而家都未見過有人張成績表會被老師寫評語寫到咁，唔知自己點解會咁，好似鬼上身。老豆老母見到張成績表，好似又唔算傷心，除咗打鑊勁都冇話俾好大壓力我。而家睇番，反而覺得，無論幾頑劣，至少我無(能力)傷人、冇帶白粉、冇偷嘢、冇非禮女同學，個評語又使唔使咁毀滅性呢，操行使唔使俾丁呢？真係好傷人自尊心(其實當年冇)，好彩我亦冇俾佢毀滅。
不過話時話，至少自己係一個勤力及負責任的細路，除咗一次打風，咁多年中學小學，我係從來沒有遲到沒有早退沒有走堂請假的，當我認定自己個使命係每日要返學校搗亂，就連續好多年好準時好專心去完成呢件事，年中無休風雨不改，就算有病，都好似山區兒童咁每日堅持返學，鄭裕玲應該會好欣賞我。訓導處評語係自己無聊後加的，學生相係因為後來被淘汰出校，要搵新學校所以隨手就剪咗去報名。都諗住唔會攞呢張成績表去見學校吧。
正生書院 在 正生書院陳兆焯Chan Siu Cheuk - Facebook 的推薦與評價
感謝MM 很用心、詳細地記錄了同學在正生書院的故事、以及我們的辦學理念 特別喜歡這句「正生書院多年來跌跌蕩蕩的經歷，就如島上各人大起大落人生一樣」 🛣️ //. ... <看更多>