那天，花花要打歲半針。米米家姐其實下午也要去看醫生。
朝早陪妹妹去打針時，要除鞋度高磅重，要穿鞋。家姐就永遠比我們大人快一步。妹妹喊喊，伸出雙手的永遠最快就是家姐。
花花打針時，大家睇片就知，家姐寸步不離，打完針係米米一直聽醫生話幫花花禁住針口無離開手。但仍然邊逗妹妹。
回家後，再到米媽單獨陪家姐去睇完醫生。出發前米米問米媽，媽咪，我可唔可以今日用我自己錢買野。 我話好呀。 最後佢揀左去花墟，因為佢想買種子種野。（最後米媽話呢個我俾啦，送俾你）
點知米米仲話咁佢仲可以買。 我心諗你係咪想買野食呀。
最後，佢行完成個花墟，揀左一大紮玫瑰🌹花送俾嫲嫲，成$140！ 對佢黎講係好大筆錢。平時米米係從來都唔會用大人俾佢既錢買野架。
之後米米話想送花俾我，叫我任揀咩都得。最後米媽揀左鬱金香。
米媽好好奇再三問佢，你真係買俾我地？咁你就無得再用錢喇喎。佢話係呀。我淨係想買俾你地。
咁你唔買零食？我帶你去買零食？
唔駛啦，我用左錢喇，今日買花俾你地就得。
米就係咁既人。 爺爺係佢好細個時講過，爸爸媽媽爺爺俾你既利是錢要儲起佢讀大學，唔好用。一蚊一蚊儲。 米米到今日都真係無用過。 銀包既零錢係平時爺爺嫲嫲喜歡時突然獎佢，或佢柯到屎時賺到既屎屎錢🤣🤣🤣
呢兩日慶祝爺爺生日，自己鎖埋（驚花係咁開門）係房忙足一日，自己上IPad用語音搵中文字，去畫去寫去填顏色一張生日卡俾爺爺，連信封都自製，甚至再自己上YouTube 學整風車，自己剪剪貼貼整左個心心風車送俾爺爺。
米米，你既小小世界很大，你的心很大，你的愛很大。 媽咪因為你而感到世界圓滿。 米媽無所求，只望你和妹妹健康快樂平安就好。
不知怎，寫到文末米媽自己都眼淺。做了媽，淚水好似都唔值錢了。
米媽也願各位媽咪爸爸和小朋友都健康快樂成長。
#世界因愛而美麗
米媽會一直陪著你
#米媽日常
