［歲月無聲消逝］應該都真係值得高興吧。順手多謝各位讀者，好廢，但都係要講：冇你地就唔會有呢一刻。
1. 卒之上到去10000個like．傳說中，去到呢啲位，就可以叫做係跨過最低門檻，可以叫自己KOL了—雖則我係極之憎呢個名稱，但為求方便，有時我同唔熟嘅人傾計都會咁講。
2. BTW，廣告客戶可以留意，本Page嘅engagement 其實都係相當高的。唔敢話照高，但同啲相似或like數相近嘅Page相比（我當然有睇住），絶對見得人。
3. 呢10000 like，話易唔易，話難又唔難。頭一千自己朋友，當然簡單。之後嗰排有同01寫文，佢地會在Page推，錢又多，亦都玩digital marketing 玩得早同玩得好，幫助唔少。但01博評摺埋後，2018年2月開始，就on my own了。
4. 而我又唔覺得有必要講到點可歌可泣插神記咁。一切皆自願嘛。我當然可以話「我又冇波又唔似人咁靚仔又唔畀冧把又唔會寫啲潮文呃like」之類，亦係事實。但正如在職場，我唔會講「我又唔似人咁刷鞋上位」—因為我覺得係冇所謂的！只係我刷唔到咁解！真心的！我刷得到我唔介喎，唔使行咁辛苦嘅路。正如我有波或靚仔，我真係唔介意賣波賣樣的—就係冇丫嘛—當然到我有波或靚仔時，就會想人地讚我有才華架啦，人就係咁煩，窮人想你讚佢有錢食米芝蓮，富家子就想你讚佢有才幹肯捱苦。
5. 原本去到8000嗰時我想出篇文講，3月頭嘅事，但然後不到一個月已經去到9000，幾日之內變成10000．
6. 講真，呢浸，除咗廣大讀者，我只多謝一個人，蕭叔叔英式英文學會 Uncle Siu's British English Club。好似好奇怪，但真係只多謝一個人。至少呢浸係多得佢加持。實不相滿，打從我篇chop your mother （https://bit.ly/2RvL2mO）離奇隔咗幾個月再浮面（連周顯都收到！），蕭叔叔出咗個post背書我後，我應該幾日多咗千幾個like．可見蕭叔叔威力強大。更難得係佢自覺好似做錯嘢（實則完全冇），十分熱心咁問我可以點幫返我。我話你已經幫咗我好多了。所以雖然唔使我講大家都知，但蕭叔叔是好東西。
7. 不過你知我呢啲，把口就沙文，性格就港女（無數咁多人可以證明）。到忽然多咗like，哈，我嗰幾日又有啲不安。首先係，呢班新嘅讀者，係咪都鍾意我寫嘅文呢？定會睇完介紹覺得太失所望？但呢個都係小問題，反正呢啲東西，原本都不屬於我嘅。我知加咗你人工再減返半升幅係好痛苦，但我越嚟越學會睇化—嗰啲嘢原本都唔係你嘅，冇咁一半，你其實都係賺咗一半。
8. 更重要係，我打到手破，真係一篇文幾千字，三十篇就十萬字，效果其實都不及蕭叔叔講一句—你係我，會唔會懷疑人生，覺得自己好廢呢？咁辛苦寫文嚟為乜？
9. 不過我其實幾分鐘就諗通咗：即係，當我聽日忽然間中八千萬六合彩咁（停咗啦可？）。頂，咁唔通我又覺得，之前返工咁多年都搵唔到八千萬，等同白做咩，咁辛苦做乜— 梗係去投注站拎錢然後笑納啦。
10. 順手提下，同半年前我整理data 時相比（明顯係因為有客問），我個FB Page，仲有啲改變，唔知係咪關蕭叔叔班新讀者事。
11. 首先，嘻，我發現係多咗女仔。半年前大約係四份一女讀者，而家係三份一。
12. 另外，我自己都冇為意，原來我FB Page嘅讀者，多數都係後生過我嘅。佔最多嘅係25-34，多過35-44的。
13. 有關張圖：倫伯嘛，就算後生嘅讀者都應該知。首歌正係《無言感激》，倫伯金曲中嘅金曲。當然我無意為今日嘅倫伯辯護，但掉返轉頭，亦都冇人可以拎走我嘅回憶。我唔會否定甚至洗白自己過去，講自己當年「真係好冇品味」之類，面對唔到過去嘅人，就唔使講現在未來了。《無言感激》係第一隻可以打動我嘅歌—咁當然同年紀亦有關，太細個唔識呢啲嘢。當中仲有我同我老豆嘅感情，當年我8歲，唔明做乜倫伯唱親都喊，老豆解我知，我似懂非懂。我固然可以貼李克勤版（咪又係咁衰！），或者貼劉華嘅《謝謝你的愛》（咪又係咁衰！）。但，葉劉（！）話頭，連張圖我都悍衞唔到嘅，就唔好寫呢個Page了。倫伯而家係乜都好，難道我同我老豆當年嘅感情就係假嘅？我甚至天真地相信，倫伯當年唱嗰時，感情都係真嘅。時為1986年，你懂的。
——————————————-
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
