《日劇與韓劇》
老婆佢喜歡睇韓劇，而我就喜歡睇日劇，係陪伴佢睇左一輪韓劇之後，我發現左兩者係概念上有一個明顯分別，就係呢個分別令我更喜歡日劇。
有冇發現韓劇男女主角通常都好完美，好似《來自星星的你》既都教授、《愛的迫降》既李隊長、《太陽的後裔》既劉大尉等等，係我心目中都係一個完美男人，而女主角都一定係貌美如花，偶爾會有性格既問題，但都係一個幾乎男人見到都會迷倒既類型。
反之日劇好多小品，都會偏向男女主角係有性格缺陷，更甚既係好似電車男咁，成個毒撚咁款。
如果要形容，韓劇就係兩個閃閃發光既男女主角既愛情故事，而日劇就偏向係兩個看似平凡既人，但就係對方眼中顯得閃閃發亮。
曾經我寫過，女人睇韓劇就好似男人睇愛情動作片咁，對方係多麼的完美，可以完全滿足我地既幻想，但回到現實，完美男人，完美女人，可能存在，但應該唔係我地可以觸碰得到。
或者人大左，開始會知道人係無完美，更清楚自己係有好多缺點缺陷，想改都改唔到，我地希望從韓劇之中得到短暫既幻想，令自己覺得世界都仲係好美好；而日劇有時睇起上黎，真係多左份無奈同揪心，因為我地都希望，終有一日差勁既自己會係另一個人心目中發光發亮。
網上有一段話係講愛一個人係點，就好似你喜歡士多啤梨咁，只係士多啤梨，士多啤梨味雪糕唔得，士多啤梨糖唔得，士多啤梨奶都唔得，我地只係喜歡士多啤梨。
味道，就好似條件咁，你睇落佢係符合，但真正喜歡既，只係得一樣。
仲記得我結婚個日，我講過，我好清楚老婆係有咩缺點，有咩優點，仲係親朋好友面前將所有缺點都講出黎，我話，我知佢脾氣差，要求高，難服待，多疑多變，當時我老婆佢面都黑埋，但我最後講左句，我清楚所有條款，明白並接受，我希望同一個咁既你行落去。
我地唔係王子同公主，兩個完美既人係埋一齊幸福快樂咁生活落去，更似係史力加同費安娜公主咁，兩個都有缺陷，然後開展婚後既日常故事。
婚後日子唔算好過，因為性格係點就係點，唔會因為你變成人夫或者人妻之後就變成另一個人，生活上有好多磨擦同小事，一定會有唔開心，但結婚就係一種修行，大家可以互相影響，令對方成為更好既人。
仲記得我以前成日洗碗洗得唔乾淨，然後比老婆捉住話，我成日都會講，我咪洗左囉，佢話，你洗得唔乾淨即係無洗好，我再講，我有洗，唔係無洗，然後大家就會鬧交，發脾氣，甚至我話你咁叻你自己洗囉。
兩年幾時間，今日我洗既碗，有時都仲會唔乾淨，但我真係會比以前細心去洗，洗潔精好似唔駛錢咁用好多去做到對方既要求。
諗返起幾年前既自己，今日既自己真係好似好左，而呢種改變，自己係唔會自動自覺，只可以由一個你最信任同愛既人去改變。
韓劇既浪漫，日劇既感動之後，愛情故事，終將成為日常，而每日我地上演既唔係韓劇同日劇，而係一部港劇，一部描寫彼此成長，成為更好既對方既故事。
