《鏡與影的四十五分鐘 半場調整成勝負分野 熱刺對車路士賽後分析》
.
鏡與影的四十五分鐘,哩九隻字足以形容哩一場倫敦打吡,車路士作客熱刺雖然大勝一場全取三分,不過賽事過程並非如比數所料咁易食,上半場藍軍更可以話比熱刺迫到無乜太多喘息機會,勝在半場時杜曹一下臨場調整,加上對手應付不及時之下造成大勝局面,成功延續聯賽不敗走勢。
.
喺歐戰過後杜曹喺今場波作出少量人手調整,基柏取代左上場受傷既文迪為正選門將,防線換上堤亞高施華為中中堅,將基斯甸臣移為右中堅同魯迪加合組三人防線,同時將艾斯派古達移到右翼衛取代列斯占士,左翼衛就繼續由馬高斯阿朗素擔任,而中前場除左由夏維斯取代上場打正選既薛耶治之外,依舊維持前線既盧卡古同蒙特以及中場既高華錫拍佐真奴為今場正選十一人名單之中。
.
熱刺除左喺主場有優勢之下更有王牌孫興慜復出,開賽後非常主動地搶佔區域地帶,無球在腳時亦不惜體力由前場開始進行迫搶,同時整體地將防線推前向藍軍施加壓力,比起以往主要縮後打反擊今場波風格完全唔一樣,相信哩一點都未必係杜曹賽前所預料得到,亦令車路士班球員明顯唔適應哩種節奏,尤其喺一啲五五波爭奪時都處於下風,嘗試避開硬碰硬既身體對抗,打得相當吃力。
.
尤其係前線就只有盧卡古一位應付兩至三位白衫球員之下,蒙特同夏維斯所輸出既跑動空間並不足以為客隊創造進攻機會,喺中場明顯打少個之下加大左高華錫同佐真奴既負擔,如果唔係孫興慜把握唔到一下黃金機會,相信車路士早以成為在落後既一隊,有見及此杜曹亦馬上喺半場進行調整,喺夏維斯同蒙特之間選擇抽起後者換入覆蓋面更廣跑動量更大既簡迪上場,而賽事形勢亦馬上顯得一百八十度既轉變。
.
唔知係咪熱刺同時作出調整還是體力無以為繼關係,白衫球員半場出返黎明顯無晒上半場所作出既迫搶力度,講緊既分分鐘係連20%都唔知有無,三線距離亦相當鬆散,而喺簡迪在場加上杜曹刻意指示球員加大壓迫以及力量對抗之下,上下半場兩隊既形勢可以話完全調轉,熱刺只能夠透過後場一啲大腳長傳製造攻勢,並無乜太多可以組織既空間,相反車路士就多方向地由左中右三線進行進攻,都能喺主隊禁區製造到唔少具威脅既埋門,而其中施華除左為藍軍先開紀錄果球頂入角球之外,亦多次成功喺角球中擺脫負責防守佢既阿里進行頭槌攻門。
.
雖然最終都能大勝全取三分,不過球隊上半場既表現完全係喺水準之下,注意到蒙特近幾場個人都比較迷失,加上球隊狀態尚未處於穩定,喺種種因素之下杜曹都有必要作出處理,而喺黎緊對陣曼城之前都有場盃賽賽事會舉行,相信都會係一個調整同主力球員稍為休息既機會。
.
《岩睇既比個Like支持我地啊!》
作者 : BluexLion車迷手記
-------------------------------
同場加映《當歐聯冠軍成為上限 如何再度向上突破? 淺談杜曹與車路士今季的目標與前境》
https://s.fanpiece.com/A7Fkfzl
.
#Chelsea #車路士 #熱刺 #英超 #杜曹
https://s.fanpiece.com/er4gGPe
比錫達斯球員名單 在 BluexLion車迷手記 Facebook 的最讚貼文
【賽後分析】
.
杜曹走馬上任,經過一節操練課後就要馬上喺主場迎戰同樣戰績不穩既狼隊,雖然最終亦只能打成平手各執一分,不過單以藍軍球迷角度經已睇到唔少亮點,至少喺球員企位同戰術套路上都不再只係兩邊傳中,短短一課操練經已能夠作出改變,實在難免有少許期待車路士喺杜曹手中既發展。
.
賽前隨隊記者經已透路藍軍將會以三中堅應戰,而事實杜實的確擺出一個三中堅陣式作為十一人正選名單陣容,攻擊線上同時放入基奧特、薛耶治、夏弗斯以及奧岱四名球員,中場位置安排高華錫伙拍被解凍既佐真奴,而防線上就選用堤亞高施華、魯迪加、艾斯派古達以及捷維爾,如果單以以上人手黎睇你根本唔會發現會以三中堅陣式應戰,反而會估係4231為多。
.
與以往干地時期或者上季林伯特選用既343陣式不同,杜曹選用既類近係一個325或者3222既陣式,當然一切都只係名黎,如何演繹都需要由球員在比賽中用身體去表達,維持堤亞高施華、魯迪加、艾斯派古達為三中堅,奧岱同捷維爾各自擔任左右兩邊既翼衛位置,而夏弗斯就長時間拍住基奧特於禁區內外遊走,同時提供更大自由度比薛耶治擔當Maker角色,令成個陣容非常立體咁表現出黎。
.
一個較為高位既三中堅除左能夠為防線提升穩定性外,亦能夠喺控球上取得明顯優勢,加上佐真奴以及高華錫經歷過沙利既傳控體系洗禮後,喺小組短傳互動方面經已存在一定默契,於由守轉攻既時候,艾斯派古達會主動靠向右閘位置,釋出空間比擔任右翼衛既奧岱向前進攻,而堤亞高施華、魯迪加、高華錫以及佐真奴會組成一個方形小組,由其中一人作推進、短傳或長傳作為第一點發動進攻,而小組身旁亦至少有兩至三點靠近作短傳選擇,而另外其他球員就負責於前場接應長傳。
.
不過由於意識所限,喺體能不斷流放之下球員互動既情況就會愈黎愈少,經常等波到唔走位,令到只能傳一啲到腳波,哩一點相信杜曹會喺訓練中不斷提升球員們對走位既意識以及戰術上既理解;而雖然夏弗斯並未有交出任何入球同助攻,不過相對上交出左自加盟以黎表現最好既一場賽事,尤其係喺唔需要處理太多防守職務下,能夠發揮得出德國人既更大效果,同時奧岱喺新位置上亦有唔少令人難忘既畫面,相信佢亦有力於杜曹手上佔一職位。
.
杜曹亦有喺賽後表示今場波只係以球員經驗行先,並無考量人多人手上既選擇,相信黎緊佢將會各自派出唔同既球員喺賽場上作試練,了解球員既特性,意味住黎緊至少三四場既賽事都會相對上較不穩定,始終季中上任,面對既挑戰就一定會比完整一季接掌為多。
.
《岩睇既比個Like支持我地啊!》
作者 : BluexLion車迷手記
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 後場篇》
https://bit.ly/2T6r2YE
.
#Chelsea #車路士 #杜曹 #狼隊
https://s.fanpiece.com/TITR01T
比錫達斯球員名單 在 BluexLion車迷手記 Facebook 的最佳解答
《咎由自取的失分 抹煞前線的努力 車路士對修咸頓賽後分析》
.
由三分變一分,相信除左令一眾睇住直播既球迷氣憤之外,對場上經已付出足九十分鐘既球員黎講亦難掩一份失落,個別球員「自殺式」犯錯可以話埋下失分既伏線,亦同時抹煞左前線球員喺比分上既努力,其實哩啲學費都已經交左接近一季去到依加都仲交緊,身為主教練既林伯特需要負上不能推卸的責任。
.
繼續源用4231陣式,正選陣容上有佩利錫正式復出,令添姆雲拿可以回歸正箭頭位置,身後支援既亦繼續係夏弗斯,而蒙特就依然兼任左翼鋒角色,雙中場分別用左佐真奴配搭簡迪,至於四人防線就用上蘇馬同基斯甸臣為中堅組合,賽前傳出有小傷既捷維爾亦趕及復出同艾斯派古達擔任左右兩間,而門將就由基柏接替於國家隊訓練時受傷既文迪,堤亞高斯華就因倦勤而並無在賽事名單之中。
.
以結果論黎睇著眼點過份側重於個別球員既失誤而引致既失波,但其實今場波理應平均分為入球與失球兩部份黎睇,雖然最終都唔能夠全取三分,不過喺進攻層面上其實有唔少值得觀賞既看點可以分析,先講組織攻勢,過往車路士由後場開始組織主要都以短傳同地面戰為主,不過自捷維爾接任左閘正選後,好多時後場既波都會經由右閘到中堅再到佢腳下,而捷維爾既視野同能力可以省略左中場轉換直接將皮球傳上前線發動攻勢,比起中堅同樣以長傳方式唔同既地方係,哩位英格蘭左閘除左可以選擇向前傳上邊線之外,亦可以以拋物線方式彎入中路,變相令進攻套路更加多元化。
.
由於添姆雲拿偏好走向左路發展,多番見到佢成功接應到捷維爾既長傳,德國人回歸正前鋒後可以得到更大既活動活間,可以令佢專心於前線捕捉機會,而今場波兩個入球亦見得到添姆雲拿既個人質素,早前亦多次強調球迷們無需過份擔心佢會有步向莫拉達後塵既機會,因為兩者係截然不同風格類型既前鋒;至於喺佢身後既夏弗斯亦漸入佳境,繼續以前場多面手既角色串聯攻勢以及為隊友製造機會,更同雲拿一樣正式取得英超入球,而佐真奴亦終於「擦出」助攻。
.
略略講完組織同入波喺進攻層面上既野之後,就係時候到令人氣憤既失球部份,而喺哩部份之中亦可分為兩個範疇,除左場上球員既失誤之外,另一個位就係林伯特既安排同臨場部署上同樣都存在失誤,先講前者,睇返三個失波,除左最尾禾確特彈射命中隊友改變角度入網果球略有幸運成份之外,前兩球都係由於球員個人失誤所造成,先由夏弗斯於中後場區域推失波所致,當時睇到哩個畫面之後第一時間令人聯想起巴克利過往既犯錯,同樣地係喺接近哩個位置推失波,其實唔係唔比你向後推,但係喺哩個位推真係好危險,基本上一推失就等同伏左後面既隊友,哩方面夏弗斯就真係要交下學費。
.
至於第二球失波,亦係大眾球迷著眼同車迷們氣憤既一球失波,蘇馬回傳力度不足派出「醫院波」,同時基柏喺禁區內撲救存在猶豫,撲救失敗後雖然有基斯甸臣試圖解圍,但最終都被對手以半空門方式射入,如果單計責任的話,蘇馬同基柏兩者難辭其咎,前者犯錯後無嘗試起跑跟返轉對手彌補自己既失誤,返而覺得龍門應份地幫佢補鑊,至於基柏既心理狀態其實都已經打唔起,多次自我犯錯或被防線「放伏」到就連自信心都無埋,而其實喺哩球失誤之前兩者都經已出現過誤會畫面,當時蘇馬呼喝基柏出黎將皮球沒收,其實果下對手都唔算壓迫得蘇馬太西利,理應自己由能力轉身再組織過,而基柏本人都覺得無必要出龍,蘇馬幾時變左後防大佬連出龍都可以由佢叫?場外人都睇到兩者明顯存在心病,對一條防線黎講絕無半點得益。
.
最後就講到林伯特,要講既野亦唔會比球員少,先講防守佈置,佢都執教過左一季時間,球隊依然喺防守死球時存在明顯漏洞,今場波對手兩下死球時都能輕鬆地喺禁區頂位置施射,而哩個區域係並無任何藍衫球員進行防守,變相只要解圍不遠,對手就可以有空間輕鬆起腳,防守唔洗教都唔識教係兩件事黎,而林伯特好明顯係後者;令一個問題就係臨場調動,其實球隊喺下半場已經開始失去壓倒性優勢,尤其係喺六十分鐘打後形勢已經交到修咸頓為主導,但感覺上林伯特好似無乜目標咁,換完薛耶治入黎就等完場咁,去到下一個換人已經係要數到八十六分鐘既占士,果時其實未被對手扳平已經係好彩。
.
你要縮既,其實理應六七十分鐘要開始換人縮,如果你要谷多粒既,就早啲換艾巴咸入黎跑下,唔係去到九十分鐘先換佢入黎踩下草咁,你臨完場前先換佢入黎請問有咩用?感覺上林伯特喺球隊仲係些微領先3:2果時係完全無方向,完全無任何為球隊再鞏固形勢既目標;最後一樣想講既就係喺戰術安排上,喺國際賽前對水晶宮時都有睇到同講過,果場波球隊既中前場除左做迫搶之外,亦好肯落腳去制止對手製造攻勢,講緊既係對手連半場都未過到時已經被打斷,果時明顯見到球隊係有刻意咁做,但今場波完全見唔返哩樣野,中前場肯落腳既就只有簡迪一個,其餘人就淨係企位迫之後就再無其他跟進動作,都講過咁做既話變相令對手好輕易咁透過短傳就破解到你哩招,無系統性既迫搶只係掛羊皮賣狗肉,亦無助為後場減壓。
.
學費唔係唔想交,而係交到有冇意義,都經過左一季多既時間,陣容上亦都有補充同提升,但內容上依然都好似維持原狀咁,失既波都依然繼續都係咁,根本上只係等邊位球員犯錯,而林伯特就好似永遠立於不敗之地咁既樣,如果係咁的話前線入幾多球,後面都真係同你失番咁多球。
.
《岩睇既比個Like支持我地啊!》
作者 : BluexLion車迷手記
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 後場篇》
https://bit.ly/2T6r2YE
.
#Chelsea #車路士 #修咸頓 #英超
https://s.fanpiece.com/nnT7mUh