【喺夢入面同個女仔出軌】Ch.3
上次講到，我第二次重返夢中。
(Ch1: https://bit.ly/31xG7X3)
(Ch2:https://bit.ly/2Clh1SB)
我喺夢入面睜開眼，個女仔就瞓喺我旁邊，好深情咁望住我。
「好嘢！又再見返你喇！應承我，今次唔好咁快走。」
到底佢係咪女鬼？但我同佢無緣無故，就算係都冇理由要搵我，睇佢個樣幾清純，一啲殺傷力都冇，就算係鬼，應該都唔會傷害我掛？
「你醒咗就起身食早餐啦，我已經煮好咗喇。」佢好興奮咁由房行咗出廳。
呢個場景咁熟口面嘅？我頭先咪就係食完早餐再瞓覺，入到嚟個夢又食早餐！？
成間屋都好夢幻，基本上所有傢具都係全白色，十足十啲示範單位咁。
「我好耐冇煮過嘢畀你食喇，睇吓好唔好味？」佢煮咗份All-Day Breakfast出嚟。
我暫時只能夠以「佢」嚟講呢個故事，因為仲未知佢叫咩名，如果我突然間問：｢係呢，其實妳叫咩名？」我驚佢突然間打回原形，嬲到變番個鬼樣。
所以我以靜制動，佢叫我做乜就做乜，食完每一啖都話好味，氹佢開心。
但我一定會搵機會打探一下夢境入面嘅我，同佢到底係咩關係。
「請問洗手間喺邊？」我突然問。
佢即刻好錯愕咗望住我：「吓？咪玩啦！你係咪太耐冇返嚟，連廁所喺邊都唔記得呀！」
我好有急才咁話：｢哦⋯啲嘢好食到我以為去咗間餐廳啫！」
佢竟然笑住咁配合我：「先生，洗手間喺嗰邊，你慢慢柯啦！」
當我一入到廁所，望一望塊鏡，輪到我錯愕⋯⋯
我唔係變咗另一個男人，我依然係我，但打扮，身型，甚至身高都完全唔同。
平時一頭亂髮，而家恤咗個All-Back，面型同輪廓因為瘦咗嘅關係而比較突出，大肚腩唔見咗，仲比現實高咗10cm⋯⋯目測有180cm，另外仲有比較私隱嘅改變，唔方便公開。
望住鏡入面嘅自己，既熟悉但又好陌生，好似參加完形象大改造咁，前後好大對比。
「哎⋯⋯」頭突然痛一痛，腦入面閃過一啲畫面。
我同個女仔都身穿校服，兩個人拖住手行，我餵佢食啖雪糕，佢餵我飲啖汽水。
原來我同佢由中學開始已經係情侶。
現實嘅我中學讀男校，根本冇呢啲機會，估唔到夢入面嘅我，竟然有咁青春嘅經歷。
由中學開始⋯⋯即係「佢」同「我」已經拍咗拖好耐，到依家都仲喺一齊理應關係算幾好，但點解佢個樣成日都咁傷心？
「你冇事嘛？做咩無啦啦大叫？」佢打開咗廁所門。
我嘅身體有股力，不受控咁攬住咗佢，仲喺佢耳邊輕聲講：「係我，我終於可以再攬多妳一次⋯⋯」
佢收起咗個傷心樣，好用力咁攬番住我，好激動咁問：「你到底去咗邊，點解你突然唔見咗，你講畀我聽吖，我點先可以搵到你。」
當「我」同「佢」攬住嘅時候，我又有種局外人嘅感覺。雖然呢個係我嘅夢，但呢個身體彷佛唔係屬於我。
我醒了。
我隻貓跳咗上我塊面度。
毫無先兆，我又番返嚟現實，但眼角仍然有淚痕，有種好強烈嘅空虛感。
我攬住身邊仲瞓緊嘅女朋友，延續頭先嘅感覺。
一次我可以當純粹發夢，但重返第二次，我相信仲會有第三次。
/
(待續，如果仲有人睇)
先講聲唔好意思，呢排都忙住寄書比大家，希望讀者們快啲收到書。
每晚簽書入書、每朝去排隊寄，所以冇乜時間寫文，短短哋睇住先。
照以往一樣，如果想繼續睇故事，留言：「睇」，等我知道有人追緊。
100個「睇」就出下一篇（記得Like埋）。
********以下很重要*********
喜歡故事，支持我寫作
可以去我網上書店買本書：https://sapeiar.boutir.com/
幫助莎比亞儲老婆本同買貓罐頭
謝謝~
讚好及追蹤 莎比亞
Follow IG: sapeiar
