新香港倡議不過舊酒新瓶
心態不當，行為表面一致，結果都會大打折扣。協助中共坐大，係香港前人責任，而家唔為東亞長遠地區安全挺身而出，香港民族將來國格永遠唔會成熟，就算去到新香港安居樂業，呢個世界都唔會有人睇得起香港人，而香港人亦會喺無盡悔恨之中度過餘生。沈旭暉訪問所講嘅各自努力去增加資本，目的係為新香港做準備，但民族經濟理應係為日後戰爭爆發，補給線唔會為敵方所斷絕而啟動。而加密貨幣又好，傳統產業又好，大家都知講錢永遠都係重要，但關鍵係要諗清楚有咗錢之後要點樣運用。簡而言之，於我而言，香港人從來都唔缺business idea，真正缺嘅，只係對大局最準確嘅判斷——當判斷準確，每盤生意每個崗位都會得到努力嘅意義。
新香港之說，深得人心係可以理解，但一走了之，根本不切實際。香港受中國威脅，固然同地理位置有關，但中國一日唔解體，東亞一日唔由日本鎖定秩序，佢都可以重整旗鼓，再次向世界滲透。一帶一路計劃參與國家，好多都唔係同中國接壤，一樣雞毛鴨血，更唔好講歐洲國家比利時，Brussels而家正係佈滿中國間諜嘅城市。我深信，香港理應為東亞變天出一分力，而要佔一席位，就絕對唔可以繼續用九七前香港人嘅心態去應對局勢。
我絕對認同，「不論黃、藍，正常一個人，當然明白香港發生咩事」，但我最希望做到嘅係拉近大家嘅理解同視野，改變大家一遇到困難就只係諗住縮嘅慣性思維。自給自足，我講過，民族經濟戰線，我講過，有能力者及早移民，我直頭會鼓勵，但我非常著重領土國家所盛載嘅價值，因此唔會選擇喺大家已經展示出無比決心之際，繼續降格香港為城市。經過反送中一役，我地已經企咗起身，已經返唔到去，點解香港唔可以堅持落去，升級為主權國家？點解援引種種理論之後，中國天朝想像，香港獨立禁忌，仍然會限制得住一個學術根基紮實嘅學者？每次遇到呢啲人，我都會退一步諗，其實大家對香港嘅愛，係咪真係癡心錯付，但每次思考過後，我嘅答案都係一樣，就係我地唔應該縮，因為我地首先就係為保住呢個地方而開始戰鬥，而夢想亦始終係將來可以喺呢個地方共存共榮。
沈旭暉對香港係有真感情，呢點我一直感受到，然而，佢提出嘅建議，其實係違背咗好多香港人嘅意志。民族情感理應會令個體之間扣連，甚至定義個體嘅生命意義，但大家對於民族嘅想像難免會有差異，而此中嘅差異就會造成對於香港前途、東亞形勢以至世界秩序意見分歧。目前，香港仍然有好多人仍未氣餒，有反共到底嘅熱情，呢點係我嘅觀察成果，亦係我親身感受，所以我仍然相信民族建國係可行之路。香港要建國，需要沈旭暉類型嘅人幫手，但可惜嘅係，領頭人物講求嘅係志氣同學養，能力再高，人脈再廣，未準備好去接受民族命運嘅人，心態只會停滯不前——逃避，所有學術導向嘅結論都係失敗主義，面對，則所有學術導向嘅結論就可以為香港所用，帶黎真正希望。
沈旭暉認為，新香港係會製造「多贏局面」，又提及「須知特設城市背後的國家，不可能完全不顧中國態度」，但其實我認為中共係唔配得到任何勝利，因此照顧中國態度，絕對唔係香港人嘅義務，亦違反香港人心。一國兩制從來都係有利中共嘅措施，而中共失去香港白手套，等同自斷雙臂，只可以玩返閉關鎖國。故此，他日香港人離開中國自立，失去嘅亦不過係一傾頹在即嘅獨裁國家嘅生意，得益理應係比損失多，而沈旭暉亦應該知道其中利弊。將來中華人民共和國將會灰飛煙滅，而北京亦可能只係成為諸國之中其中一國嘅首都，以顧及現今北京感受嘅思維自我設限，正係沈旭暉無法發揮所長嘅原因。
最後，如果真係要另覓新地建設新香港，我希望係香港人奮戰過後，贏得世界尊重，不得不做之時至出現嘅最後方案。所以，新香港呢條出路，從來唔會係我嘅首選，因為能戰方能退，而大戰之後大局既定，買地反而係屆時最易達成嘅目標。有機會再長文補述文中曾經提及嘅去中心化理論應該如何善加利用，希望有助大家去除中國必勝之迷信，理解香港嘅現況同走向。
盼自由歸於這裡，首要條件係勇氣。意識到前路艱難，都要無畏無懼，至會做到為信念從沒退後。建自由光輝香港，新生民族應許之地，應當係香港本土。
沈旭暉訪問 在 【私人空間】鄧小樺訪問沈旭暉：你為何不快樂？（上） 的推薦與評價
從 訪問 中，及平時的視頻，我感到沈教授憂國憂民，有種抑鬱的情緒!相信好多港人都有。祝願大家健康，平安!放開心情，保重身體! ... <看更多>