【卡比戰土魷】
紅磡上車去土魷（土瓜灣），到今時今日我都仲要問客點行，馬頭圍道一帶改到亂七八糟，可行嘅路線又多，唔問清楚好容易鬧交。雖然有啲人好鍾意自作聰明，第一句就話「乜司機你唔識路咩」，唔明白司機唔識得讀心術，但只要好聲好氣，乘客都會明白係自己柒，再講返自己想點樣行。
今次難得遇到一對母子好乘客，上車仲有講有笑，話題離唔開改路改到傻嘅土瓜灣區，同唔知幾時冧嘅沙中線站。「我睇都要儘快搬，呢度樓價遲早跌，一個唔好彩行過時冧樓壓到就死得。」媽媽話，有得話搬就搬，都唔係個個做得到。大人講嘢，細路仔最鍾意插嘴：「點解會冧樓嘅？係咪有飛機撞埋去呀？」我震驚於呢個細路仔嘅聰明同應用能力時，媽媽已經開始訓練：「唔係呀，今次係呢度地底住咗怪獸，佢已經成日塞住條路，仲可能整爛個地下，等我哋跌曬落去㗎。」「係咪即係好似卡比獸咁呀？」「係呀，你當有隻唔聽話嘅卡比獸喺地底啦。」
細路仔仲問緊點解唔捉隻卡比獸，點解卡比獸要整爛地下，可惜我哋已經到目的地，無得聽媽媽嘅答案。落客後我即刻用最高速度飛返出尖沙嘴，因為唔知卡比獸幾時會出招整爛地下，方圓十里路過嘅人都會受到牽連，無咩必要我都唔會去。
IG：lazytaxihk
白告
