【荷蘭生活知多啲——讀書篇 （上）】
IG: @ally_blahblah
https://instagram.com/ally_blahblah?igshid=1jtemurbno3q7
香港人/華人一般嘅留學熱點離唔開英美澳加，通常都係因為當地學校知名度高，而且多其他華人，有咩事都叫有個照應。但畢竟呢啲學校學費會貴，而且生活費唔平，一般家庭唔係個個負擔得起。
其實若果想要出國接受優質教育，唔一定要去英美澳加挨貴學費；唔少歐洲國家都有將好嘅高等教育，例如荷蘭、德國、以及其他北歐國家。呢啲國家嘅大學，學費一般會比英美澳加平得多。另外，由於華人留學生唔太多，反而更容易能認識其他國家嘅學生，認真開拓國際社交圈子同鍛鍊獨立生活嘅能力；畢業後亦會因為認識亞洲情況/語言、但競爭唔多，反而成為有利嘅就業因素。
今次就同大家講一下，喺荷蘭讀書有咩要留意：
（一）語言
荷蘭官方語言係荷蘭語（Dutch），但一般人，尤其係大城市度生活嘅，最起碼都能夠講非常流利嘅英語；只要你肯講英文，喺呢邊讀書同生活絕對唔會係問題。一啲教育程度比較高嘅人，更會講多國語言。筆者身邊唔少荷蘭朋友，閒閒地可以講德語、法語、西班牙語、甚至瑞典語。事實上；荷蘭語同德語非常接近，當中好多詞彙亦係由法語「借過黎」，加上荷蘭人自知國家細，要靠不斷增強競爭力維持經濟發展，所以唔少荷蘭人語言能力非常強，方便到其他歐洲國家工作/經商。
（二）普遍教育程度
根據世界經濟論壇嘅研究，荷蘭嘅普遍教育程度係全球第三，僅次於新加坡同芬蘭【註一】；2018年嘅資料顯示，荷蘭25-64歲嘅人口入面，超過三成有大學學位（OECD平均係24%）【註二】。但要留意嘅係年輕一輩除左有大學學位，唔少擁有最少一個碩士學位！筆者喺荷蘭幾年嘅經驗黎講，發覺唔少大公司請人嘅最低要求已經要至少碩士學歷，難怪咁多年輕人學歷越來越高！年輕人有碩士嘅普遍程度，誇張到如果你只有大學學位，身邊嘅人會講笑問你 Why did you stop （studying）？
（三）學費及生活費
學費
大學：歐盟學生每年不多於€2100（大約18000港元左右）；
非歐盟學生€6000-15000不等（55000-140000港元）
碩士：歐盟學生每年不多於€2100（大約18000港元左右）；
非歐盟學生€8000-20000不等（74000-180000港元）【註三】
個人經驗：筆者第一個碩士係阿姆斯特丹大學University of Amsterdam 國際關係（一年全日制），當時學費係大約€14000（130000港元左右）；依家喺萊頓大學Leiden University 讀金融法碩士（兩年兼讀），一共學費係大約€18000（166000港元左右）。要留意番荷蘭嘅大學會定期調整學費，一般每兩年一次。相對於英美澳加，荷蘭學費相宜，有啲科仲比香港平添！
生活費
喺荷蘭讀書嘅生活費因人而異。影響因素包括居住地區、生活習慣、飲食、交通等等；以下係參考數字【註四】：
- 簽證/居留許可（非歐盟學生）：€210，一次性費用
- 住宿（阿姆斯特丹）：每月€350-€800
- 一般生活費用：每月€400-€500
- 保險：每月€35-€100
- 書籍：每月€50-€100
- 公共交通工具（自費）：€40-€100
個人經驗：筆者第一個碩士一年連學費大約用25萬港元左右，平日大部分洗費用於參考書、膳食及交通。由於好少用單車，每月交通（用月票）大約€90，住宿€450，學校飯堂一餐€5-10不等。一年只外遊三次，一次到英國倫敦，兩次到比利時布魯塞爾歐盟總部專訪寫論文。
由於學費及物價定期調整，加上目前歐元高企，估計黎緊一兩年想要喺荷蘭讀書嘅朋友可能要預番一年30萬港元左右（非歐盟學生），預多好過預少。
（四）學校VS學科
華人社會一般先睇學校後睇科，但黎到歐洲就唔一定！喺荷蘭，唔少大學會有比較「拿手」嘅科目。「學校唔出名，但學科好強勁」嘅例子比比皆是。例如 Wageningen University & Research 係全球最頂尖嘅「調理農務」大學之一（唔係講笑，真係Agriculture & Forestry）；Leiden University則係全歐洲數一數二嘅法律學院，學術界嘅前輩好多都會聽過，喺歐洲，荷蘭萊登與英國牛津堪稱雙子，都係好幾百年嘅老牌學府；University of Amsterdam 則以 Communication Science （都係全球數一數二）同埋 Social Sciences 著名。
以上只係幾個順手拈來嘅例子。呢幾間大學雖然喺香港唔太出名，整體嘅國際排名亦唔太高，但原來喺行內大有來頭，萬萬不能忽視。當然唔少國際生會比較著重學校嘅國際排名，方便回國後搵工。但有意留喺荷蘭的話，學校喺當地嘅聲譽同口碑亦非常重要。 另一方面，香港人普遍「讀嗰科唔一定做嗰行」，但荷蘭會偏向「讀嗰科做嗰行」（詳情會喺【荷蘭生活知多啲——工作篇】講解）。所以有意去荷蘭讀書進修嘅朋友一定要做好資料蒐集，睇清諗楚啊！
寫住咁多先，之後再講下呢邊讀書辛唔辛苦，學生生活、交通及住宿、兼職及實習、就業情況同埋簽證。
【註一】https://www.wittenborg.eu/dutch-are-3rd-most-educated-nation-world.htm
【註二】http://www.oecd.org/education/Netherlands-EAG2014-Country-Note.pdf
【註三】https://www.studyinholland.nl/finances/tuition-fees
【註四】https://student.uva.nl/en/content/az/living-expenses/living-expenses.html?cb
讀書篇 （中）https://www.facebook.com/allyblahblah/photos/a.276125036087574/1219379955095406/
讀書篇 （下）
https://www.facebook.com/allyblahblah/photos/a.276125036087574/1223448181355250/
荷蘭搵工血淚史 （上）https://www.facebook.com/allyblahblah/photos/a.276193166080761/1228741134159288/
荷蘭搵工血淚史 （下）
https://www.facebook.com/allyblahblah/photos/a.276193166080761/1228743614159040/
以上內容只係個人分享，如有疑問，以官方資料為準。
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活
