2018年，多謝你！(長文但係係我嘅心路歷程)
又到左一年一度嘅回顧時間，其實我個樣好貪玩但係打從心底我係一個宅男，每年倒數如果冇工作我都會喺屋企晨早瞓覺，而家我就攤左係張床諗緊2018年究竟完成左幾多樣野。
2018係好豐收嘅一年，我總共飛咗34個trip，飛行公里超過350,000，有大約200日左右唔喺香港。
「離地自由行1、2」
一個人完成左好多不可能嘅事，踏足左呢一世仔都冇諗過會去嘅非洲，一口氣去咗四個國家，仲要係以豪遊嘅方式去感受左好多我呢個年紀唔配有嘅經歷，住喺非洲大草原入邊Glamping同獅子近距離接觸，坐熱氣球欣賞動物大遷徙、坐全世界最貴嘅火車旅遊遊南非，仲去左世界上其中一個最危險嘅城市約翰內斯堡、見識到原來非洲有企鵝，同埋坐直升機欣賞世界三大瀑布之一嘅維多利亞瀑布。「離地自由行」比我見識到呢個世界可以有幾咁大，自己有幾咁井底之蛙。一年可以有兩個屬於自己嘅節目係TVB，雖然唔係翡翠台，而係J2出現，我已經覺得好幸運好感恩。
「發夢都冇諗過嘅工作」
再嚟就係接觸左好多唔同類型嘅工作，冇諗過會玩到咁大有泰國地產發展商邀請我去泰國睇樓宣傳樓盤，更加冇諗過成個意大利最大嘅遊艇公司會飛我過去摩納哥參加私人演唱會，同preview佢哋嘅遊艇，呢一啲經歷我諗我係自己28歲之前係從來冇諗過會發生，好似睇緊「荷里活」嘅電影橋段。
2019年我繼續希望自己可以努力去試唔同嘅航空公司，希望俾更多嘅報告大家睇，好似我一個小康之家出身嘅人，都可以玩到唔同類型嘅頭等艙同埋商務艙同埋貴價酒店，我相信只要你肯去做一定做得到。
多謝你哋一直陪我行呢條路，多謝。
