《有一種無賴，叫鄭中基》李專
恕李專孤陋寡聞，我真的沒見過，身邊有人覺得鄭中基唱歌難聽，反而被他真摯的歌聲冧到毛管戙的，就有一大堆，當中包括我自己。
＜人若然忘記了愛＞＜晴天陰天雨天＞＜閉目入神＞＜我代你哭＞＜無賴＞，好歌一首接一首。
當年鄭中基出道不久，就有幸與張學友合唱＜左右為難＞，傳媒封他為張學友接班人；Paco說他有望成為最受歡迎男歌手，很快被人捧到天咁高。
我們常常以為只有低谷難頂，但其實瞬間得到的高潮，也不是每個人都受得起，尤其對於一個只有廿幾歲的𡃁仔。
每日成為眾人的焦點，背後的壓力一定遠遠超過喜悅。
結果，鄭中基起得快，跌得快，負面新聞獲獲新鮮獲獲甘。
其中最大件事，莫過於2000年，他在長榮客機醉海鬧事，最終被美國FBI拘捕。
自此之後，形象直插谷底。
還記得2003年沙士期間， 在電視機裡見到他與盧巧音主持一個超低質的「搞笑」節目《開心新班子》，表面上為港人打打氣，實際上只是九唔搭八的節目。
當時我望著公仔箱的鄭中基，有點替他難過。
雖然星途灰暗到這地步，部分的確有點「自己攞嚟」，我卻覺得，為何那麼有才華的人，最後要做啲冇人識笑嘅小丑戲？
但謝天謝地，後來他的喜劇細胞得到發掘，因而有機會接拍不少出色的喜劇，最終在2013年更憑《低俗喜劇》贏得「香港電影金像獎最佳男配角」。
上台致辭，他說：「由我出道開始，畀人印象唔係幾好，因為我爸爸係個……唱片公司老闆。」單是這句，已經哽咽。
「而我，自以為自己唱得幾首歌，好懶叻。咁我亦都冇令大家跌眼鏡，我真係周不時都出事。好彩我一世都好好運，畀我遇到好多好錫我、好支持我，同埋冇放棄我嘅人。我記得出事之後，第一個搵我拍戲嘅係劉偉強先生……咁我仍然令到佢好失望，因為我拍《愛君如夢》，第一日拜神就遲到，因為我又飲酒撞車，去咗court。
「劉德華先生同我講：『浪子回頭金不換，你而家開始要諗下自己跟住落嚟要點做、要點行。你仲有大把時間，不過你真係要諗清楚。』所以我將我自己覺得最叻嘅唱歌，我將佢放低咗，去咗拍電影，由我唔識嘅嘢開始做，一路畀人鬧……亦都畀我學識堅持，到今日，大會頒呢個獎畀我，我覺得香港電影圈呢個大家庭開始接受我。我唔會同大家講我繼續努力，因為講係冇用，我會繼續做畀大家睇。」
看到這裡，我有一刻覺得鄭中基真心正。
不只是唱歌和演戲，還有做人。
承諾很容易，只要夠衝動就得，所以這個世界，好多人講就天下無敵；做就有心無力，每次話改話改，最後都係得個講字，但真正願意為了自己和別人的人生，洗心革面，甚至甘願放棄自己最喜歡的事情，重新上路，又有幾多個？
鄭中基是其中之一，由昔日的「無賴」變成現在已經回頭的浪子。
曾經看過一句好正的說話：「在Google上輸入『故事』，可以得到152,000,000條結果，但輸入『結局』，卻只能得到55,500,000條結果。可見，並不是每個故事，都有結局。」或者鄭中基歌唱的故事無疾而終，的確有點可惜，但我們知道還有一個更好的故事等著他，已經足夠。
希望鄭中基繼續努力，就像你的歌曲《有種》這樣：「好的東西／定能留低／我信最尾／我還未毀／我放得低／拿著更覺矜貴／笑對亂世／難道我會失禮」。
P.S. 一直很想寫三個人：張繼聰、麥浚龍和鄭中基，今天終於滿足了自己三個願望。希望大家喜歡這個系列。
＿＿＿＿＿＿＿＿
○ 承諾很容易，只要夠衝動就得，所以這個世界，好多人講就天下無敵；做就有心無力，每次話改話改，最後都係得個講字，但真正願意為了自己和別人的人生，洗心革面，甚至甘願放棄自己最喜歡的事情，重新上路，又有幾多個？
FB Page：李專 Lee Chuen（每日18:45上載文章）
IG：http://instagram.com/lee.chuen
