//#長文 // 海洋公園水上樂園全攻略 (下)
去水上樂園玩,感覺好青春!
@waterworldoceanparkhk 玩一次都唔平,目前未知有冇annual pass
根據官網嘅描述,好似價格可升可跌,有時仲會有早鳥優惠
真係要好好哺住先有著數
咁難得入去玩,梗係要做好準備!
⭐儲物篇⭐
一入到去有好多locker
Regular Locker $120/day , Family Locker $200/day
每人帶少啲嘢,幾個人租family lockers其實都okay嘅,總之盡量輕便
租咗後,記得影低locker號碼,同手帶上嘅QRcode, QRcode相片同樣可以開locker,唔使得一個人可以去locker攞嘢
⭐行裝篇⭐
著三點式當然好,free fall只能穿貼身泳衣、泳褲
所以著防曬衣好似好d,唔使驚走光
著水陸兩用涉水鞋最好,拖鞋有啲設施都唔著得,要用手穿住
除咗 free fall 嘅三條梯唔准着之外,所有設施都可以
😷😷 帶布口罩吧,除了在水中不用配戴外,其他時間都要帶
一定要帶防水袋,裝必要用品,特別係有小朋友的,帶小朋友零舍多野😂
唔好帶貴重嘢,有啲設施連電話防水袋都唔可以帶,要租一次性迷你locker$20/次
帶漏啲咩嘢唔使驚,係威威水地帶旁有裝備店
場內有救生衣,唔使帶水泡畀小朋友
⭐沐浴篇⭐
更衣室有分男、女、Family,有沐浴露提供
Family係一間大房入面有齊廁所同埋浴室,私隱度高
大約有10間左右(唔知有冇另一個Family Room)
但因為family一定有3-4人,沖涼時間就長少少,都較難等到㗎~
類似嘅淋浴間數量幾多,高峰時期都需要排隊,秩序良好
⭐交通篇⭐
海洋公園正門有免費接駁巴士,記得上網預約
如果想揸車入去,記住預先係網上登記訂位
⭐飲食篇⭐
🥤🍡🍜 場內有 food court型式嘅餐廳同自助售賣機等,提供各式食品飲品🍲🍜🍝🍔🥤🧃☕🍵
仲有啲咩問題隨便留言問😊❤️
海洋公園水上樂園帶咩 在 小小豬Kinsey Facebook 的最佳解答
期待左好耐….小小豬終於有機會嚟體驗「海洋公園水上樂園」大玩特玩。依位小朋友就緊係興奮,除左有得玩水之外,仲有兩位至愛嘅姨姨陪佢玩,咁仲唔超級盡慶。
好啦…講下我地玩左咩先,我地入到場第一時間就去左室內二樓嘅「漂流探秘」,其實就係坐水泡玩漂流,佢水泡嘅款式都有單人/雙人/幼兒雙人選擇,係落水位置就可以自由選擇。基本上穿上水泡係度漂漂下都幾Relax,間中又有啲射水設施,所以都有啲刺激,小小豬都連漂三轉先肯上水。
之後我地去戶外嘅「激流旅程」,大小朋友都著住救生衣係激流入面漂流,水流唔算急,但水力都幾大,要企定定都唔係咁易,都幾刺激嘅。不過我覺得瞓係水上面睇風景個感覺真係好正。
繼續去戶外嘅「涌浪灣」玩,小朋友著住救生衣係度玩人造浪,不過啲浪會係指定時間先有。依度啲浪就唔算大,所以嚟輕輕鬆鬆浸下身都唔錯。
嚟到必玩17m高嘅「八彩天梯」,只要夠膽同身高1.1m就可以玩,小小豬係表姨嘅鼓勵下終於肯去,而我呢……老啦…年紀大,都係企定定等影佢地好啦…哈哈!小小豬話頭向前腳在後然係瞓係水墊上SIR落去,初時都冇乜嘢,只係由水管SIR出嚟嗰下有好大嘅離心力係有啲驚,不過都係好好玩,好刺激嘅。
之後我地就去二樓嘅餐廳食午餐,以主題樂園嚟講佢嘅價錢都唔算貴,大約$65-$90左右,而且食物質素都OK可接受,唯一就係可能遊人都比較多,所以等取餐都就耐左少少。
食飽飽就繼續去室內三樓玩「天海灣」,同戶外嘅涌浪灣一樣都係人造浪池,不過依個就大好多,同埋啲浪勁好多,所以小小豬係度都玩左好耐。
最後就去隔離嘅「威威水地帶」,初時小小豬話佢大個仔唔玩BB嘢,只係行去望下,點知最後又係玩到唔願走,佢來來回回玩嗰兩條三層高嘅長滑梯,一聽到叮叮聲就衝落去個大水桶等淋水,總之就全程上上落落,睇見佢都覺得攰…哈哈!
其實仲有最刺激嗰幾個遊戲一係唔夠膽,一係超多人排隊,所以冇玩到,但整體上係好玩嘅,唔好話小小豬,我都玩完都嚴重冇電。由於今次係體驗半日場,所以小小豬話佢完全唔夠喉,未離開就已經問我幾時再去,仲叫我趁佢12歲前仲係小童價入嚟玩多幾次,最好就係買年票等佢可以隨時有得玩哦(但…..好似係冇出年票….哈哈)
等我嚟個小分享先💕💕
✨記得要預先網上預約Shuttle Bus,係海洋公園門口上車,每隔10-15分鐘一班,車程大約8-10分鐘就到。渣車人仕都要預約停車場泊位,不過樂園初期停車場好似唔開,有需要可以留意官網。
✨最好提早預約LOCKER,尤其係四人家庭,因為特大儲物櫃唔多,而我BOOK嘅個家庭款最多可放2個背包,所以要用啲方法先可以塞晒四人物品入去。
✨儲物櫃區位置就唔分男女,拎齊嘢就可以去更衣室換衫,當中有八間家庭更衣室,入面有齊洗手間同淋浴間,而且房間都幾大,都好方便嘅。
✨建議大小朋友都可以著水陸兩用鞋/扣到腳後嘅涼鞋 (唉…我有訂左兩用鞋不過送唔切落嚟,所以今次用唔到),因為除咗 Free Fall嗰三條梯唔准着之外,其他設施都可以著住玩。如果著人字拖就要係大部份滑梯型設施都要除低,穿响對手度玩啦。
✨泳衣泳褲外面可以加TEE或防曬衣但不能有鍋釘、拉鍊或金屬扣等。不過要留意玩Free Fall就只能穿貼身泳衣同泳褲。
✨口罩除左係玩水時唔洗戴之外,任何時間都要戴住,所以建議要帶定多幾個替換或用可重複使用嘅布口罩或運動口罩。
✨大部分滑梯及設施都可以用小型防水袋放電話,咁就可以影到靚相。如果有需要用GoPro拍片就要用手腕帶扣好,唔可以使用手柄或自拍棍。
想了解更多詳情及訂票,可瀏覽官方網站 ~> https://waterworld.oceanpark.com.hk/
Special Thanks
香港海洋公園 Ocean Park Hong Kong
#WaterWorldOPHK #SplashintoAdventure #LetsGetSplashed #海洋公園水上樂園 #探索自然激浪無限 #激浪無限瞓身玩
海洋公園水上樂園帶咩 在 Facebook 的精選貼文
#水上樂園 💦幼兒篇💕玩樂分享
好開心奶油爸有水上樂園正式開幕前優先體驗飛,啱晒最鍾意玩水嘅奶油仔!奶油仔未夠三歲,又差少少先100 cm,究竟有咩啱玩呢?
佢就玩左 👇🏻👇🏻👇🏻👇🏻
1️⃣漂流探秘(室內):
坐水泡沿住河慢慢飄呀浮呀,奶油仔最愛呢個!
2️⃣威威水地帶(室內):
分左兩邊,一邊啱幼童,一邊就小童。有好多玩水設施,噴水,水簾,滑梯等,奶油仔好鍾意屯門共融公園個玩水設施呢度都有😂
感覺如果小朋友怕水,可以先去幼童個邊熱下身,水深只係浸到腳。
不過奶油仔就有DD怕大水筒倒水(佢一向唔鍾意太大聲),所以唔係玩左太耐就去左戶外。
3️⃣湧浪灣(戶外)
阿娘細個最愛嘅人造浪灘!而家呢個超靚,旁邊有好多沙灘椅,播住輕鬆歌,又有日落景🌄結果我地留係呢度最長時間,因為奶油仔唔捨得走😆
4️⃣激流旅程(戶外)
趁太陽落山前,玩埋戶外激流,類似室內漂流,但唔用水泡同水流較急,好快玩完一次。唔識游水穿浮衣可以都玩到。
雖然數落唔係好多樣設施,但其實非常夠奶油仔玩得盡興🥳已經不停話要再去玩過!
今次阿娘雖然無得玩埋一份,主要負責睇袋同影相,不過見到咁好玩嘅設施同咁正嘅氣氛,都好興奮!!!坐完月最想就係去玩急流漩渦😍
唔方便濕身,主要來照顧小朋友嘅家長,都有非常多好舒服嘅等候位置坐低休息~
出左story都收到大家嘅問題,官網有講嘅我就唔重覆~其餘喺度一次過happy share:
1️⃣帶BB車入園內方唔方便?
-樂園場內設計上係方便嘅, 非常多無障礙通道同有lift。唔需要兜好遠嘅路,都可以去到唔同遊樂設施。我哋今次都有帶BB車,主要因為我哋喺夜場,奶油仔習慣八點瞓,有架車掛袋同俾佢瞓會輕鬆啲~
但正式開幕後,如果人流較多,帶BB車就可能無咁方便,因為每個遊樂設施等候位置都唔大,未必夠位泊咁多架BB車,容易阻住地方。
2️⃣室內冷氣凍唔凍?
室內恆溫,怕凍嘅奶油仔完全無問題。無落水嘅阿娘就流汗😂所以唔怕小朋友凍親。
3️⃣着唔着鞋好?
着住水陸兩用鞋/涼鞋好D呀!因為奶油爸腳板底係湧浪灣個度刮到少少,無流血嘅,不過始終新起好,有D位較為未磨得平滑。
4️⃣樂園餐廳嘢食質素如何?
又唔錯喎!$100內有主食加野飲。我地食室內百味洞,環境較熱(濕左身嘅人都唔會凍親)同四圍都好大音樂同水聲。感覺黃昏時段的話,去戶外餐廳食氣氛正D~
5️⃣搭咩車去好?
我地係海洋公園搭shuttle bus去。本身想簡單一程的士入去,但有早一日去嘅朋友報料塞車塞左半個鐘,的確我地去個日,深灣道都塞左陣。
正式開幕安排以官網為準哦~記得睇清楚先出發: https://waterworld.oceanpark.com.hk/tc
謝謝收看!
題外話,爸爸電話用左防水套,但唔知係咪平野,影出來嘅相好濛,全部相自動落filter咁,我唯一嘅獨照好似80年代影咁😶
香港海洋公園 Ocean Park Hong Kong
#育兒 #育兒日記 #親子 #hkmama #hkmum #hkmami #hkmom #hkbaby #香港媽媽 #香港媽咪 #親子blogger #孕媽媽 #懷孕 #懷孕日記 #水上樂園 #親子好去處