［海洋公園人工佔收入45%，養企鵝好貴？］其實係員工好貴，踢英超定打NBA呢？
TL；DR：你入場睇睇熊貓扑嘢定睇高層？
1. 繼續鞭屍，鞭完海獅鞭鬆獅。頭盔先。其實太民粹，好似好仇富咁。但大膽假設咗，小心求證。歡迎反駁。
2. 分析員嘅嘢，最忌就係執住一個數無限演繹講故事，不幸地正係我而家做嘅嘢。但冇計，已經盡做，唔係上市公司。而公平講句，海洋公園披露都還算可以（政府科水喎），至少好過迪士尼。
3. 想講係，小友睇咗我篇文，就問一個好簡單嘅問題：「點解海洋公園蝕錢？啲錢去晒邊？」我地就冷血分析員，少講意識形態，講數字。當然有時又會見樹不見林過度演繹。（＊）
4. 留意返，公園6月結（最Q憎!），圖中嘅所謂2019，係Jul18-Jun19。咁你都見蝕6億。你可以想像，Jul19-Jun20可以有幾慘烈。真係仲唔明嘅，諗下反送中幾時爆發，同埋肺炎幾時爆。中晒。之前都蝕6億，你可以想像嚟緊嘅業績（Jul19-Jun20）會蝕幾多—而海洋公園先8億book．所以當然要搵水。
5. 但呢啲通通都討論過，自己搵返舊文（https://bit.ly/3bqJ9z1），半年前已話你知，嗰時都未有肺炎。
6. 但我地睇返樓下張圖，仲係應該OK嘅舊年。你見收入，17億，至少按年係升的，not bad
7. 「咁啲錢用晒在邊呢？係餵安安好貴定電費好貴？」（小友原文照錄）。
8. 我當時都未睇細節，就答佢「折舊」。但原來唔係喎！
9. 好啦，圖中冇，但年報入面有，鍾意自己睇（https://bit.ly/2YWuNnx）。折舊，Depreciation，在「其他費用」嗰6億入面，佔咗4.2億，同17億收入比，多多地啦，但先天生意模式，咁多機器呀乜鬼，一定係咁。另外仲有1.7億係法律費用，一次性，不理。
10. 返返樓上，仲見到1.8億財務費用，其實都借埋好多錢，但都不是太重要，反正冇得搞，唔通唔使畀？
11. 戲肉啦喎，嗰15億嘅經營成本，到底邊啲東西最大舊？「係餵安安好貴定電費好貴？」睇年報第134頁（https://bit.ly/2YWuNnx）
12. 答案，就梗係，人啦！
13. 呢15億入面！超過一半係人工！8億人工。仲係按年升咗一成，唔知多咗人定加人工，不重要。
14. 其他，十分濕星。咩企鵝呀安安呀之類，食得你幾多丫，又唔似啲高層咁要食米芝蓮。動物成本（＊＊），1300萬，真係人類零頭都未夠，十分經濟。維修保養，當然都唔會少，但2億。電費？加晒咩水電煤（煮企鵝？），1億唔使。
15. 最大，都係人工。而人工8億，佔咗17億收入嘅45%！
16. 係咪偏高？我估係。但證據？其實冇乜。只係想當然。但，呢啲機構，就梗係會偏高。輸錢唔使上身，「自負盈虧」但實有人救，咁你話會係overpaid定underpaid？
17. 另外，請幾多人？好似話2000人。當然收入唔會平均分佈。但，8億人工，即係平均一人近40萬一年，三皮嘢。而我好似聽啲朋友講，低層人工絶對唔吸引。咁去咗邊度呢，你話？
18. 隨手比較，話做銀行好搵，恒生人工平均（當然平均好誤導）都係60萬唔夠一年。中銀香港多少少。大家樂呢？一年一人14萬咋！（當然，有埋大陸人嘅）。
19. 當然，其實唔同行業比較，好似冇乜意思。但，感覺啲人工，都係偏高。而實務上係冇人覺得自己份人工偏高，只有其他人係overpaid．所以資本主義世界有樣好好嘅嘢，叫做競爭。你係嚴重underpaid嘅，做乜唔轉工？
20. 但大鑊飯嘅機構，就冇呢回事。所以正常by default 係overpaid嘅。
21. 最後，17億收入，8億人工，人工佔收入45%，係咪偏高，都真係難講，唔同行業好難比較。偏偏迪士尼香港係冇出一份完整嘅年報（有嘅話我知）。但，感覺就好似幾高下了。
22. 銀行呀快餐店就一定唔會有。咁可能科網會有？咪玩。Facebook 所有嘅cost加埋都冇收入45%啦
23. 所以啦喎，問我，點睇都係減人工啦。斷估都係啲高層肥大啦。
24. 你問我，人工開支佔收入咁多嘅，我只諗起一個行業：球會。你英超西甲嗰啲，咪會人工佔咗收入過一半。
25. 但，我入場我開電視，係睇C朗美斯。咁你入海洋公園，睇熊貓扑嘢定睇高層扑嘢先？
26. 歡迎補充。但擺明仇富呀下，唔針對前線員工，除非你話我知個個都三四皮嘢，「咁就針對埋佢地」。
（＊）事實係只吹水唔講數字就成為維園阿伯，但只講數唔講大圖畫又變成冇想像力算死草，兩者平衡唔易拎。
（＊＊）認真，計飼料定計埋買嘅價錢？使唔使好似球員咁Amortize？跟返隻企鵝預期壽命咁（＊＊＊）？
（＊＊＊）開心大發現！原來啲動物真係要折舊的！年報（https://bit.ly/2Lme05t）99頁有講！2-15年！拿，呢啲就真係「公司寶貴嘅資產」！Balance sheet 上面有的！你公司年報「資產」有冇你？
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
