呢排我諗個個心情都唔太好，大人細路都屈住屈住，之前都話可以住返一晚酒店，開心下放鬆下，但而家⋯點敢住？所以就決定約埋好友 Mini Bubble Corner 一家，參加清新地嘅「半農半旅」活動，去親親大自然，想小朋友們放下電，爸媽們可以渡個小假🥰
成個行程其實好輕鬆，我地大概14:00係白沙灣碼頭搭船去清新地有機農場，去到農場就會有工作人員同我地講解下呢兩日一夜嘅活動。跟住就帶我地去我地夜晚要瞓覺嘅「蒙古包」啦🙂職員一早幫我地分哂住邊個蒙古包，之後就約咗一個時間地點，我地就係蒙古包入面休息一下啦！
呢個時候，梗係影下相啦📸蒙古包入面有冷暖氣，有電制，入面仲有兩張氣墊床，一個小型帳幕，仲會有隻熊熊係送比小朋友㗎！另外，我地仲有個小露台，露台有個小型廁所仔，VV嘅話係到解決就最方便，但poopoo嘅話就要去返洗手間，不過洗手間就比較遠，所以呢個小廁所都係一個窩心嘅設施，去完VV後，用隔離支水沖一沖，就可以啦！
之後就會集齊所有半農半旅參加者，有個有機耕種講解，跟住就到我地落手落腳去啦！親手收割我地夜晚晚餐要食嘅有機蔬菜同香草🌿。芊嶠同劻霖都好開心，每人負責收割唔同嘅蔬菜，爸爸就梗係負責收割香草啦！因為有啲香草樹枝位係有刺㗎！所以大人嚟收割就會安全啲！
收割完，就到講解夜晚整「炭燒香草田園春雞鍋D.I.Y.」，仲會教埋基本生火方法，大家真係要打醒十二分精神聽清楚點整呀！跟住就會分配食材，大家返到去就要各自各清洗同處理啲食材啦！嶠媽就幫手洗菜，嶠爸就好努力咁整個雞鍋，芊嶠同劻霖就⋯同埋QB齊齊係蒙古包到玩下先啦😂
其實整個雞鍋唔算好難，生火嗰到除咗講技巧，就係要講快，著咗火之後就要諗辦法keep住團火，唔好比佢熄，等啲木燒著咗之後再加炭，最後就梗係放個鍋上去啦！雞鍋就好似打邊爐咁，煮熟隻春雞之後可以加菜，加麵。你唔好話，一家四口食哂隻春雞同埋啲配菜，真係飽到上心口😏
之後就梗係小朋友繼續係蒙古包入面玩，4個爸媽係到吹下水啦！係一個咁靜嘅環境下吹水，真係好享受，呢啲回憶真係⋯幾時會再有？🙈之後芊嶠夜晚就去咗QB嗰邊瞓，我地就早早瞓咗！第二朝8點，我地就要整自己嘅早餐啦！你整「抹茶金時鬆餅D.I.Y.」，芊嶠同劻霖自己落手搓麵團，真係自己早餐自己整👍🏼整完入爐嗰陣，就係我地返去收拾行裝嘅時間啦！
快樂嘅時光過得特別快，大家夜晚用完嘅餐具同個鍋，記住要擺返係下面嘅屋仔外呀！跟住就可以去享用我地親手整嘅鬆餅，再飲埋清新地為我地準備嘅香草茶，又係一大享受！食飽早餐就係free time，大家可以去餵下半仔，玩下公園。11點我地就坐船出返白沙灣碼頭，成個旅程就完結啦！
🌾Nature's Harvest 清新地 嘅半農半旅活動，Let's Hygge Club (Hygge 係丹麥語，係一個享受簡單美好生活方式概念。扛造一個與親朋好友相聚嘅快樂共處空間、品嚐新鮮健康嘅美食、享受停機時間、為簡單嘅事實感動和喝采、延續生活上嘅小確幸)🥰。想遠離繁囂，放鬆一下心情，親親大自然，半農半旅活動絕對係一個好好嘅體驗活動😌
#清新地有機農場 #半農半旅 #蒙古包 #親親大自然 #自製田園春雞鍋 #生火體驗 #抹茶金時鬆餅DIY #芊嶠與劻霖成長日記
清新地有機農場 在 清新地有機種植園 - Facebook 的推薦與評價
親子 · 難得爸爸放假，決定帶Chelsea玩返日最後揀左去Nature's Harvest 清新地依到都幾岩小朋友玩，可以自製鬆餅、盆栽有導賞員帶你參觀田園種植，仲會即場泡製香草 ... ... <看更多>