【 NEW FACE #1 ── 鄭雋熹 】
新欄目「NEW FACE」登場，每次重點介紹一位新人。
第一位是 HeiCheng 鄭雋熹。
他於澳洲悉尼Macquarie University主修傳播學，2017年5月畢業後返港，同年入讀無綫電視「第29期藝員訓練班」，完成課程後正式入行當藝員，分別在《金宵大廈》和《十八年後的終極告白》兩度飾演少年版的 陳山聰（Joel 1002)；《十八》裏的沈敬一，因為角色有血有肉，加上標緻五官，鄭雋熹開始令觀眾認識。現時他是J2節目《安樂蝸》固定主持，又與程浩駿、 Oman 林浩文、 Lucas 姚宏遠、陳俊堅和關耀儁組成Nobody Production 人棄組合定期自導自演短片，爭取更多曝光。
「由細到大我都鍾意唱歌、跳舞，諗住做歌手，所以大學時代就主修Media，因為驚如果做唔掂，都可以去做幕後。返到香港之後，試過Send啲Demo畀人，奈何都係冇回覆，咁啱見到訓練班個廣告彈出嚟，媽咪就話：『喂，不如你試下啦！』我話唔得㗎喎，因為我唔識做戲，阿媽再話：『試下先啦，未必得嘅！』咁好彩就入咗去讀，先發現原來演戲都幾好玩，咁就專心做一個演員，點知有導演搵我做主持，一開始我都驚自己應付唔到，亦的確最初係有少少困難，因為講稿就係得咁多，點樣可以做得有啲唔同？我而家就將某一啲Item用戲劇嘅方式處理。」
「演員係好被動，尤其是喺TVB。So far入行兩年幾，每次PA搵我，做古惑仔、警察、傻仔，我都盡量演得似，就咁聽會覺得，做演員就應該係咁樣，但可能喺TVB嘅生態係，你要幫自己搵一個定位，原來你演二世祖好似，以後監製（開劇）要搵二世祖呢，搵阿熹啦，或者有智障角色，搵阿熹啦，反而唔係演乜似乜、你做到戲，佢哋就會搵你，呢個唔知係好事定壞事，我而家都仲諗緊，應唔應該將自己定型。我好鍾意張衛健，佢有段經歷我好深印象，佢當年參加新秀之後，捱足八年仲未做到主角，佢好想要一個機會，佢就問自己：『你係咪真係咁好先？唱歌係咪真係咁好聽先？做戲係咪真係咁勁先？跳舞係咪真係咁威先？如果每樣嘢都唔係做到好好，人哋唔用你係必然。』所以喺TVB，就係不停要你進步、增值。」
「《十八》呢套劇好好，我哋可以演一啲有血有肉嘅角色，但大多數我哋都係企喺後面，咁樣都會灰㗎，每日都會磨蝕意志，返到去公司，又睇到前面（演員）咁樣做，你又好想去做，但你又冇得做，呢個因素亦都係促成咗我喺訓練班嘅時候，同幾位同學都覺得：咁樣唔得喎，我哋要喺後面做幾多年？既然我哋咁鍾意做戲，又想多啲人識，又過到戲癮，就自己去拍一啲短片（人棄組合）。拍咗之後，公司入面多咗人識，好多前輩，例如徐榮哥哥、振朗，同埋東東（何遠東）都有睇過，同我哋講話Keep住呀，團火唔好熄呀，唔好頹呀，要做㗎。」
「如果有得加入《開心速遞》當然好，我好欣賞嘉洛 周嘉洛 Kalok，因為我都好鍾意演喜劇，我都有喺現場睇佢，佢除咗節奏（掌握）得好之外，佢兼顧到好多嘢，佢記對白好快，我問：其實你一日拍咁多場戲，係即時（準備），定還是喺屋企做足功課？佢話：『其實做咗咁耐，我係即時（背對白）！』我就好奇佢點樣做到，呢啲真係經驗，我喺現場見到佢同幕後、同對手合作，我覺得佢係一個好好嘅學習對象。2020年我好想做嘅事，我乜都想演，但我覺得自己喺喜劇上嘅節奏同情緒拿捏會好少少，所以如果有啲喜劇嘅角色，我都好想去試下，始終入咗行兩年幾，點樣完全投入去一個角色，真係未試過，好想試下。」
攝影：Nicky Jai
【 ARTIST OF THE MONTH #1 ── 柯煒林 】
https://bit.ly/2AVLAgW
【 ARTIST OF THE MONTH #2 ── 盧鎮業 】
http://bit.ly/2CIreHm
（22062020）
＃游大東 ＃游大東影視筆記 ＃鄭雋熹 ＃游大東NEWFACE ＃十八年後的終極告白
游大東newface 在 游大東影視筆記- 【 NEW FACE #1 鄭雋熹】 新 ... - Facebook 的推薦與評價
【 NEW FACE #1 ── 鄭雋熹】 新欄目「NEW FACE」登場，每次重點介紹一位新人。 第一位是HeiCheng 鄭雋熹。 他於澳洲悉尼Macquarie University主修傳播學，2017年5月 ... ... <看更多>