女人一生，只為搵一個住私樓嘅男人（上）
「你住邊㗎？」
我第一次喺交友Apps俾女仔問，我以為只係一個再普通不過嘅問題。
於是我好誠實咁答：「黃大仙。」
「係咪現崇山？我覺得嗰度好正㗎，又近地鐵站。」女仔講咗一個新樓盤嘅名。
我答：「唔係，我住黃大仙上邨，仲近地鐵站啊。」
屏幕上突然彈出系統訊息：「此用戶已離開，無法傳送訊息。」
個女仔一言不發，就離開咗個Chat，我都唔知發生咩事。
但連續幾次，我講完自己住公屋之後，對方都會變得好冷淡，甚至馬上消失。
我意識到問題所在，下一次再有女仔問我住邊，我就直情話自己住現崇山，唔止係私樓，重要係貴價豪華私樓。
自此之後，我認識女仔嘅過程都好順利。
冇幾耐，我就約咗一個叫詩詩嘅女仔出嚟，佢幾靚女，我對佢好有好感，佢對我都好熱情。
我開始追詩詩，佢就提出，想去我屋企睇吓。
我梗係猶豫啦，因為我根本唔係住現崇山，係住黃大仙上邨。
我係做地產經紀嘅，咁啱呢個時候，我接到一個賣盤，有個客想將現崇山嘅單位賣出去。
我拎住鎖匙，靈機一觸。
我先上個單位度睇吓，上一手租客留低嘅傢俬都幾齊全，我只係用咗幾百蚊，買啲床單被鋪水杯牙刷，就將間屋佈置到好似有人住邊咁。
再曬幾張我自己嘅生活照，擺埋喺櫃頂，fit晒。
然後，我好安心咁邀請詩詩上嚟。
「嘩，呢度好大啊。」詩詩一入嚟，對眼就發晒光咁。
我好謙虛咁答：「唔算好大啫。」
「個景都好靚，嘩，嗰度係咪獅子山嚟？好神奇啊。」詩詩指住窗外個景驚叫。
獅子山好神奇咩？你平時行好多地方，都會見到獅子山㗎啦，你鍾意上山都得添。
但對住心儀嘅靚女，梗係唔可以咁講。
「我希望，生命中最靚嘅景色，可以同你一齊分享。」我含情脈脈咁望住詩詩。
吻下來，豁出去。
嗰日之後，詩詩就成為咗我女朋友。
溝女可以好難，亦可以好簡單，只要你屋企望到獅子山。
我同詩詩講，話我屋企人好少全部唔喺度，所以唔係成日帶到佢上屋企。
詩詩都好體諒我嘅難處，冇再要求上我屋企。
我估，佢都係想證實我係咪住現崇山啫。
我哋嘅感情發展得非常穩定，詩詩經常表現出想同我長久發展，成家立室嘅願望。
唯一一個問題係，同詩詩拍拖，真係有少少貴。
佢好鍾意食嘢，專門食啲貴嘢，話咁先至「有Taste」。
而我作為一個男人，作為一個「住現崇山」嘅男人，冇可能要求AA制㗎嘛。
咁搞法，我個個月入不敷支，必須要搵啲外快。
但錢呢啲嘢，唔係你想搵得多，就會搵到多啲。
我更加勤力，帶咗更多客去睇樓，但真係租樓買樓嘅客，都冇增加到。
我同中學時嘅兄弟食飯，我就呻詩詩洗好多錢，搞到我入不敷支。
兄弟嘆氣：「你至少有女朋友。我去識女仔，個個聽到我住公屋，都走夾唔唞。」
「吓，你讀Law畢業㗎喎，未來嘅大律師，啲女都唔識貨？」我驚訝。
兄弟答：「你都識講係『未來』啦，依加咪又搵緊兩萬蚊，喺律師樓做緊奴隸……啲女話，我有排先買到樓，同我一齊冇將來啊！」
我手上，仲有好多條私樓甚至豪宅嘅鎖匙。
我借咗一條畀佢。
冇幾耐，呢位兄弟就溝到女。
我赫然發現，我擁有嘅，唔係一層樓嘅鎖匙，而係通往女人心嘅鎖匙！
下集：http://bit.ly/3tMGmcW
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #女人一生只為搵一個住私樓嘅男人
