《志明與春嬌》中的霧之戀
-
「有啲嘢唔係一晚就要做曬，我哋又唔係趕時間。」-張志明
-
後巷煙霧瀰漫嘅環境，
襯托住模糊不清嘅曖昧關係。
-
喺DAY4，張志明陪無家可歸嘅余春嬌嘅嗰一晚，志明喺漫春天嘅床上面從後攬住春嬌，然後講咗呢一番說話。去到電影嘅結尾，所有觀眾都會知道，嗰晚志明唔係「唔想」，而係「唔得」。
-
喺兩性關係入面，「口是心非」好常見，超級常見。人傾向會粉飾自己嘅行為，唔比其他人知道自己心入面真正嘅諗法。因為長輩同社會都話比我哋聽，「認真你便輸了」，主動同毫無保留，只會令人遍體鱗傷，因為世界充斥住謊言、抽水同背叛。就好似張志明戴咗前女朋友惠英比嘅綠帽，同你稱兄道弟嘅朋友，背後講你嘅傷心事嚟開玩笑，雖然無傷大雅，但人習慣會保護自己。
-
明明鍾意，但話唔CARE，明明已經唔鍾意，但話大家關係無問題，春嬌嘅好朋友Brenda明明唔靚，但演孖K嘅谷祖琳偏偏話佢好省鏡。《志明與春嬌》劇本嘅重點，就係所有角色嘅「口是心非」。
-
春嬌問志明究竟幾時開始鍾意自己，志明話係喺第一日佢去交台費嘅時候，佢知道春嬌唔順路，察覺到女方鍾意自己，所以男方「鐘意你鍾意我」。春嬌同樣迷戀於口是心非，以為對方唔搞自己係愛嘅表現，正正因為口不對心，譜出咗呢段浪漫嘅都市戀曲。
-
口是心非，因為忍唔住主動嘅一方，通常都係輸家。而既然唔主動，人際關係就係旁敲側擊嘅藝術。如果你對一個人有感覺，講乜嘢、去邊度、做啲乜、其實都唔重要，因為你只係想見佢，想同佢傾多啲偈，製造多啲兩個人相處嘅空間，爭取多啲了解嘅機會，所以志明會無啦啦同春嬌講華富邨UFO，而春嬌又會無啦啦喺條街度玩蝸牛，拗檔嘢係咪真係賣緊貼紙。
-
"in55iwi"，志明就算係要同春嬌示愛，都要對方解碼，因為咁樣可以令自己處於一個介乎於認真同遊戲之間嘅態度，當被對方出賣或者拒絕嘅時候，都無咁傷，可以全身而退。
-
有啲嘢你可以呃到人，但你永遠都呃唔到自己。究竟要「分開」定係「一齊」？喺志明同春嬌相識嘅DAY7，編劇極巧妙咁喺便利店入面幫兩位主角玩多次「口是心非」，講嘅唔係兩種煙應唔應該一齊擺埋入同一個膠袋，而係兩個人願唔願意向對方表明心跡，鼓起勇氣同對方喺埋一齊。
-
幾多關係成於曖昧，但亦有好多關係敗於曖昧，敗於唔肯主動行多幾步，最後不了了之。因為怕傷害，最後令自己受到更大傷害。但唔好唔記得，真正重視同愛你嘅人，從來都唔會忍心你去受傷，說話可以係假，唯情是真，撥開雲霧，始終會遇到愛你嘅人。
-
《電影港義》新書預購連結：
＊隨書附送限量版Postcard一套兩款＊
預購連結：https://bit.ly/2WGNozA
-
*4月27號喺電影中心仲有多場新書分享會！時間夜晚七點至八點，有我同影評人月巴氏 / Work Super Guy嘅對談，今次係WALK IN嘅！留意！
