【香港小姐？唔係掛？】
香港小姐選舉，原來真係香港嘅（悲慘）縮影（我自己諗😜）
對於喜歡歷史又鐘意記住啲無謂嘢嘅人，以我所知香港嘅選美都至少有八、九十年歷史。唔好講到塘西、麗池或者東方選美嗰啲（我會唔會太老呀😅），就係講五、六十年代嘅工展小姐，標淮同作用好簡單，就係靚同推廣代表嘅廠商嘅產品。選出黎嘅美女，係點都有一個責任同代表性。而我真係覺得香港小姐嘅發展，係同香港本身嘅情況真係好相似。
去到七十年代，電視嘅新世界，無線開始做就咗香港小姐。當年的確係一個社會話題，係一年一度盛事。無知嘅會討論嘅就係邊個靚，邊個醜。當年香港經濟同工業起飛，其實香港小姐嘅function真係唔只係要靚咁簡單。當時嘅香港小姐嘅責任的確係代表香港，作為親善大使，去推廣香港嘅軟實力嘅一部份。
如果記性好嘅朋友，一定會記得當年雖然無觀眾一人一票（工展小姐係有㗎😄），但係啲評判一定係嗰啲社會好有地位嘅官商名流，而司議亦莊諧並重。總之，選出黎冠軍係唔多會點醜，同時又大方得體，亦唔會令香港人出醜嘅。情況就同殖民地政府一樣，民主就一定無份嘅，但係個政府點都唔會點條黑路你啲香港人行一樣。
咁由七十年代開始到九十年代初，大家都知香港小姐冠軍繼續都係香港嘅軟實力代表，而亞季軍或入圍嘅亦唔小成為影視名星。亦即係話無論個社會或者主辦單位都好注重厘件事啦，同時亦代表緊香港嘅世界地位係依然無變，重好似越黎越好。
但係一去到九十年代中期，就多咗個所謂「美貌與智慧並重」嘅無謂slogan。但係個節目嘅性質已經完全變晒，香港好似唔需要有一個親善大使喎。無論節目主持嘅庸俗低級，以至評判嘅質素差劣（同時觀眾都係無得參與，就算有都會有所謂嘅專業評審😓），可以話係完全代表咗九十年代香港人，自己唔知自己想點，而命運又唔响自己手嘅情況一樣。結果選黎嘅香港小姐，一係就學歷超高，樣貌普通（靚唔靚真係好主觀嘅，所以我用中性啲嘅形容😆），如果唔係就相反。就等如當年拜金庸俗，有錢就無內涵，有內涵就無錢嘅香港人一樣。
同香港响世界上嘅地位一樣，越搞越差嘅香港小姐選舉去到二千年代，係無人會理，亦唔會有人關心嘅地步。只係一個機構自己搞，自己玩，自己笑，自己慶祝😰。
到咗近幾年，好似香港咁樣，唔知係唔係驚搞搞下會玩完。香港小姐開始提出「真民主」，又觀眾一人一票選出冠軍。不過，當觀眾或者市民慶高彩烈嘅時候，第一次就失手，死server。到第二、三次嘅時候，「民主」响香港小姐選舉真係可以「成功落實」嘅時候，選出黎嘅可能又真係代表到香港人嘅...真‧諗法（即係黃絲啦😝）。
結果係點，今年咪完全代表咗香港嘅政制囉，一班唔好話係官商名流，直情係「甩皮甩骨」，完全代表唔到觀眾嘅評判去揀。都唔緊要，最後要由一個人有兩票去拍版決定！
我作為一個中坑麻甩佬，我唔識品評今屆香港小姐靚還是醜，橫豎一陣間就唔記得。我只係覺得香港社會已經夠衰啦，都唔好再講什麼「香港親善大使」或者「美貌與智慧並重」啦，點解當誤樂都唔比香港人開心啲呢？點解係都要講嗰句香港人至憎嘅：「我話事！」？
#認真你便輸了
#香港悲慘縮影
#唔識中文嘅火雞姐
#下年你就唔記得
#孫泳恩張瑪莉朱玲玲鄭文雅
#我個腦只係覺得厘啲先係香港親善大使
火雞姐觀塘 在 火雞姐嗱喳麵 的推薦與評價
火雞姐 嗱喳麵, Hong Kong. 368 likes · 1 talking about this · 133 were here. 用心做好嗱喳麵(車仔麵)香港的味道！三間分店分別觀塘成業街30號地下/ 九龍灣九展 ... ... <看更多>