Search
【蓋世辭典：貿易信用保險】
做生意同做朋友一樣，好多時都要講個「信」字！而家商業交易好多都係以貿易信貸方式進行，企業會為客戶提供彈性付款條件。不過有時真係人算不如天算，客戶生意周轉不靈找唔到數，分分鐘影響埋你公司營運，真係有力場都未必幫到！
「貿易信用保險」係為企業而設，保障企業避免因客戶欠款而影響營運，減低業務風險。呢類保險同時可以降低企業嘅信貸風險，有助企業向客戶提供更有競爭力嘅銷售條款，吸引新買家，亦提高佢哋開托新興市場嘅信心。
#貿易信用保險 #保險詞彙 #一探究竟 #燕嗦秘笈
【蓋世辭典：償付能力】
償付能力可以話係反映保險公司財務穩健程度嘅其中一個重要指標，用嚟衡量保險公司係咪有足夠資產履行保險合約責任，對保單持有人作出賠償或支付其他利益。
為咗保障投保人嘅利益，保監局會審視保險公司嘅財政狀況，確保保險公司符合《保險業條例》有關償付能力嘅規定。除咗審視保險公司嘅財務報表同其他報表，保監局亦會要求保險公司定期匯報償付準備金嘅水平，確保佢哋有充足嘅資本營運相關保險業務。
#償付能力 #保險詞彙 #一探究竟 #燕嗦秘笈 #蓋世保鑑
【蓋世辭典：保險科技沙盒】
家居抗疫嘅日子教曉我哋點樣善用科技去應付生活上嘅種種不便。同樣，疫情亦推動保險界跳出框框，引入科技，便利投保人。
創新係要實踐嘅，保監局推出「保險科技沙盒」，畀保險公司喺受控嘅環境中，以先導形式試行保險科技。最近就有公司獲批，試行透過網上視訊設備，向客戶講解產品內容同銷售，等投保人足不出戶，都買到需要嘅保險產品。
創新得嚟都要安全，呢啲試行項目，都要符合一系列原則，例如要有明確嘅試行範圍同條件、要具備足夠風險管控程序、要有完善措施保障客戶等等，想知多啲可以睇：https://bit.ly/2A1bWx0。
#保險科技沙盒 #保險詞彙 #一探究竟 #燕嗦秘笈
