【追戲到大陸】
——《我不是藥神》短評幾句：
我講唔到俾你聽呢套戲有幾精彩，一定係年度最愛電影頭幾位，下半套戲感動到我係喊到停唔到，散場成個男廁係人人都喊到眼腫腫。一個關於“法律不外乎人情”嘅故事，賣假葯可以救到千萬人，反之賣真藥就害人不淺，到底要拉嘅人應該係邊個？
成套戲笑中有淚，初頭真係笑到拍曬手，估唔到後尾零煽情都感動到癲，同類故事嘅《續命梟雄》都完全比下去。正因為角色眾多但人人有所發揮兼有細膩描寫，睇到後面係完全投入曬角色視點，扣人心弦。你可以睇唔起《戰狼II》同《紅海行動》狂收，但呢套低成本狂收三十億係真心言之有物同有共鳴（不難預視係昔日大陸，明日香港），果種感動連日韓都未必拍得出。
片尾見原來有HAF投資，希望香港有得上，就算一定唔收得，希望亞洲電影節有機會睇到，唔排除睇第二次。
——《狄仁傑之四大天王》
當年《神都龍王》喺上海睇IMAX震撼到癲（香港冇上IMAX），尤其3D最難忘。今次徐克技術上再有突破，3D效果之正直頭冇咩邊套近期荷里活片比得上佢，仲要連字幕都融入埋3D營造另類“爆框3D”效果係正嘅，而成套戲學埋迪記咁全full screen，大型打鬥極正。
前大半段故事都好緊湊（一開場就嚟料），但個佈局搞搞吓真係簡單複雜化，喺大陸唔可以出現怪力亂神鬼鬼怪怪下，夾硬用幻術都解釋唔到發生咩事，無厘頭玩到King Kong都出埋直頭有人睇到笑，而結局拖泥帶水，都難及上兩集咁簡潔。
亮點，馬思純妖女裝已經好正，真樣古裝look見人真係睇到心心眼😍😍😍雖然，我唔知佢個角色設定想點😂
【十週年放映活動，搞唔搞得成睇你支持喇】goo.gl/6o8hpk
‼小弟本新書完咗書展，都仲可以搵我買架 🇭🇰 | goo.gl/J9QdBR
‼台灣書局亦已上架，可去文中連結購買 🇹🇼 | goo.gl/xzCymP
【IG請follow】www.instagram.com/travelerwithmovie
