*嚴禁劇透*
*粗口自行過濾*
*可瘋狂話戲屎但免外表批評人身攻擊*
[1230隔夜超短劇評][TVB][金宵大廈 EP01&02][夢]
[讚] 本身都打定輸數，預咗無綫播嘅劇就算係喺2130播，都唔會恐怖，但今次個氣氛又真係做得唔錯喎，有啲寒。會唔會係因為本身預咗喺周六周日播，所以冇咁多限制呢？其實拍乜都好，如果乜都就住就住就唔會好睇。
奶仔方紹聰係呢兩集最出嘅演員，當然個角色係好發揮，但做癲佬嚟講奶仔係捉到路，同類角色從來未失手過，甚至佢做正常角色我都覺得佢有一吓會發癲。另外，林子善同埋陸永都係好正，放喺度成套嘢生猛咗，但又唔會好阻到其他演員嘅發揮。話時話，好似未見過佢哋兩個同場，一拍埋先發現原來兩個演員嘅做法都幾似，睇得好舒服。由喜劇（我當咗陸永都係）tune 到去做正劇角色係難嘅，你見有好多做喜劇出色嘅演員都搣唔甩陣味，但佢哋兩位就好順暢，唔知有咩方法呢？
用打手機遊戲去介紹金宵大廈係個猛鬼地方都幾有趣，都希望之後可以再交代吓或者有橋段係關事。不過林老師嗰本《夢遊》似乎都好關鍵，希望放得落去嘅嘢都有用啦，如果唔係煞有介事咁講又好似失咗焦。
[彈]
講返個開頭先，用新樓銷售嚟做開波，之後Alex又有講到話自己一個人冇得公一份婆一份去買樓上車，膠罐又係話自己過唔到壓力測試買唔起樓，講咗一大輪，之後就再冇講到有咩關係，希望之後可以多啲嘢，如果唔係成段都幾浪費。
阿蕭嘅情緒變化真係勁大，明明畀Alex玩完一輪之後好嬲，嬲到惡言相向，仲話佢八婆唔知係咪前世欠咗佢，但轉個頭就鍾意咗佢。擺到明係前世情綠我知道，但都唔好轉得咁勁呀，中間乜都冇發生過，阿蕭只係見到發咗幾十年個夢嗰個女人好似Alex咁樣樣咋喎，仲要一開始話個夢裡面嘅女人幾十年都害到後失魂，做乜無啦啦會變咗做夢中情人呢？轉變得太離奇。雖然係奇幻劇，但都唔可以唔跟邏輯呀。
不過再弱啲嘅都仲有，就係純情男彭彭，喺街度見到小魚，截咗蔡san糊，幾個鐘頭就愛上咗佢，接受唔到佢做雞/PTGF，但係接受到佢同自己見第一次面就上床，喺劇本乜都冇講嘅情況下，最合理解釋係佢真係癡線，但劇本成日話人癲線就冇嘢好講，亦都冇嘢好睇。
不過最好笑就係要爆錶行嗰個賊頭，畀阿蕭講兩句就信，又真係打算放過佢。唔好咁啦好唔好呀？直接係靚寶打救佢哋咪得囉，橫掂大家都應該相信黑貓靚寶係有異能。
陳山聰做呢啲有朝氣角色比較吃力，拍埋去陸永同埋林子善度尤其顯得佢唔係好自顯。嗰句阿蕭精神乜乜乜乜，都好老套。希望呢啲都係舖排佢嘅上一世出現而做，如果唔係都幾慘。
[演員表] 陳山聰 飾 蕭偉明 / 李施嬅 飾 Alex / 林子善 飾 膠罐 / 歐陽巧瑩 飾 Mia / 黃子雄 飾 佳爺 / 陸永 飾 蔡San / 康華 飾 Yuki / 劉江 飾 林老師 / 黃致豪 飾 水哥 / 趙希洛 飾 何太 / 鄭耀軒 飾 東東 / 黎振燁 飾 Jack / 方紹聰 飾 彭彭 / 趙樂賢 飾 丁滿 / 鄭恕峰 飾 刀疤 / 黃文意 飾 小魚
#1230隔夜超短劇評 #TVB #金宵大廈 #葉鎮輝 #羅佩清 #陳山聰 #李施嬅 #林子善 #陸永 #歐陽巧瑩 #黃子雄 #康華 #劉江 #黃致豪 #趙希洛 #鄭耀軒 #黎振燁 #方紹聰 #趙樂賢 #鄭恕峰 #黃文意
猛鬼大廈遊戲 在 《猛鬼大廈》遊戲宣傳影片 - YouTube 的推薦與評價
由Genuine Studio製作，以香港背景而寫的一個關於公共屋邨的鬼故事。 ... <看更多>