關於 環球科技大學欠薪 ，我們在網路上蒐集到這些相關的討論、資訊與評價

【龔成問答信箱】（Q21801-Q21820）

Q21801：

龔 Sir, 岩岩上完你的投資班，多謝你悉心既教導，真係獲益良多！

我上完堂之後有d問題想再請求下你

1. 想問下「盈利」同「股東應佔溢利」分別在於咩？因為我記得你講過佢地是不同的，尤其想自己計 EPS等等數據既時候應該點揀？

2. 另外見到有同學問你增長率既時候，你用左年度化增長率 (上堂時都唔見你講過）而唔你用複式增長率 (CAGR)去計，想問下應該咩時候用邊個？

因為增長率不同，有代表性盈利可以差好遠

e.g. 388
年度化增長率:
5年增長 (9.11-4.76)/4.76 = 91.4%
年度化增長率: 91.4%/5 = 18%

CAGR:
(9.11/4.76)^(1/4) -1 = 17.6%

感謝龔 Sir!!!!

龔成老師︰

1) 財報上「盈利」，多數係包含「股東應佔溢利」和「非股東權益」。前者，就係股東真正可分到的盈利部份，也是你用來計算EPS用的。

後者，係一些非集團可佔有的盈利部份，這部份會在集團盈利中除去。

2) 其實2者係一樣，個計算方法如下。

(9.11 / 4.76) ，再開方(5-1)，只後將答案再減1，就係得出個增長率+17.6%。

你見之前18%，只係我將小數位進左位，其實背後答案係一樣+17.6%。

------------------------------------------------

Q21802：

龔sir你好，我想請教一下你。我買股票已有一年多，但資產不是升值很多，甚麼很多資金都放在股票裏拿不出來。因此想問下你我而家的投資組合是否有問題：

0005 @800股 (36.28)
883 @4000股 (8.11)
1211 @500股 (192)
2013 @2000股 (12.6)

3800 @1000股 (3.65)
6618 @100股 (110)
9633 @600股 (66)
9988 @100股 (287)

我覺得我買ge股票都好散，每隻都買小小咁，如果我而家加注，應該買邊隻？另外，我亦考慮買一D收息股或儲蓄保險，有穩定的資產增長。

麻煩龔sir有時間可以比Ｄ意見我！感謝！

龔成老師︰

投資股票，就等同買入一間企業，就算再優質的企業，要時間去升值。1年只係一個短期的時間，你唔好預期會有明顯的效果。

我地係投資增值時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時持股，大部部都係有質素和增長力。若你係年青至中年人士，這些股票係合適。

但收息股(包括匯控 - 0005)類，就不宜持有太多，因為佢主要係收下息，增長力較弱，會拖慢你財富增值效果。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

中海油(0883)質素中等，不宜持有太多。

其次，我發現你好集中係潛力股類(除了0005, 0883, 3800外)，佢地雖然有增長潛力，同時風險都較高，不宜持有過多。

就算你偏向年青，潛力股都只可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你先要加大翻平穏增長股部份，令組合更平衡。

而持股中，保利協鑫能源(3800)係較麻煩一隻。現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21803：

呀sir! 其實我好認同您 投資係長線 唔係短炒 所以我將來投資果喲優質股 我都會長擺係到 如非必要都唔放

不過 我想問下呀sir 您之前提過升一倍放一半 但如果我只入左一手 放一半會出現碎股問題 甘係唔係代表其實我要係低位入兩手或以上？我用緊富途牛牛做買賣 佢又好似唔比賣一半

另外呀sir 您堂上講到話一隻股票 好似港交所（388）佢既質素甘高 甘佢股價一定長期向上 甘如果我宜家唔入市 將來佢升到好高（假設$600）

甘我係唔係會錯過宜家既入市時機？

同埋呀sir ，我上星期又買左喲新股票，暫時有：
9988@$203 一手
2638@$7.83 一手
VOO @377.04 兩手

我黎緊會繼續定期定額投資VOO 同埋留意大市 入呀sir您上面推薦既優質股 如果長遠甘做 係唔係一個好既投資策略？

唔該呀sir 因為黎緊畢業要搵野做 要係搵野做前學識投資 問既野比較多 唔好意思 唔該您呀sir

龔成老師︰

其實優質股，只要佢一直質素都無明顯變差，我地長線去持有，永遠都係最有利。

而升一倍放一半，主要係比一些較保守投資者，等佢地可以先收回成本。或者一些初學者，佢地未能完全掌握何為貴，才會用這個策略去沽貨。

至於港交所(0388)這類優質股，長線預期係會一直上升。但我地唔可以因為咁，就不理價值平貴，直接入貨。因為若然買貴左，雖然最終都會升，但成個回報就已經差好遠。

因此，我地都要緊守平貴原則，去有計劃地入市。如果你好驚真係會錯失入貨機會，你可以用月供儲貨，咁就可以。但當股價去到異常貴，好似之前比亞迪(1211)成本2XX，就會連月供，都不適用。

而我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你還未畢業，相信是一個年青人，你現時正值財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應該要進取少少，可以較集中「平穏增長股」和「潛力股」。港燈(2638)係收息股，增長力唔高，你不宜持有太多。

至於其餘2隻，都係適合。但長線計，我地唔好成個組合，只集中係2, 3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

將來你投身社會，可能會較忙。但唔好因為離開左學校，但忘記了學習。投資係需要持續學習，提升自己知識，才會做得好的。

------------------------------------------------

Q21804：

你好岩岩上完你第6堂, 好有沖動去用你條FORMULA去中銀網選股, 不過我好貪下, 會先唔用PE

自己篩完一堆搞左兩個鐘之後, 有隻見到好想問下你意見: 8137 - 洪橋集團

另外想問問，除咗你堂上教的公式，有冇一D網站/一條公式岩宜家用可以快搵到D一次性受疫情影響的股票？ 比如之前問你果隻大快活

就會因為PE/ROE問題而篩走左，甘可惜左反而

龔成老師︰

洪橋集團(8137)雖然過到大部份篩選準則，但你要留意佢過往股價都幾波動。

而且，市盈率都一直維持偏低水平，代表市場對佢睇法好一般。你再仔細睇，佢盈利其實主要來自一些公平值變動，唔係實際收入。

因此，佢投資價值，並不如表面睇咁高。

之後課堂，我會教你點睇年報，你就可以理解到，這隻股票箇中問題。

網站方面，暫時我見都係中銀個網會較好用。至於這個篩選並唔係完美，的確會有可能篩走一些優質股。也會好似8137，誤入一些投資價值一般的股票。

但這個已經算係較有效率方法，特別係對初學者，會較易掌握。

之後，你再配合基本面和仔細分析財務數據，已經好大機會，找到一些有價值的股票。

------------------------------------------------

Q21805：

龔sir，您好。我經常留意你的facebook，特別是龔成問答信箱。最近買樓問題很煩惱，可以請教一下您嗎？

本人33歲，先生(33歲)，育有一對年幼子女(幼稚園)，目前2人合共有現金200萬，先生月入5.4萬(5年後可加薪至8萬)，我是sales,平均每月3萬幾，沒有股票、物業。

現在同家人一齊住，大概還可以一齊住5年。之後搬出來，會請工人。我們現打算置業，有幾個唸法:

1. 直接買3房，但只可以買到30+樓齡的舊樓，八成按揭，只可即刻自住。(擔心舊樓不保值)

2. 唔理地區、大細，買400萬樓，5成按揭，放租，之後換樓(擔心之後樓價升，難換樓)

3. 買2房半新樓，八成按揭，即刻自住，有機會再換3房。(都係擔心難換樓)

目前呢5年沒有迫切住屋問題，只是先生錯過左兩次置業機會，擔心樓價再升難而置業，而且即使現在開始供樓，也要供到退休了。現在儲了一筆首期想盡快上車

現在未置業，每月開支約3萬。若置業後搬出來住+小朋友返學，每月開支大約7.5萬

最終目標有一套三房樓自住，有機會再置業作收租用途。請問龔sir我應該點做好

龔成老師︰

以你現時情況，用方法1和2都係可以。

至於3，我就唔係咁建議。因為好多時新樓都會有一定溢價，令你變相買貴左。

方法1，30+樓齡唔一直定無投資和升值潛力，但就好睇個物業本身質素、地區、交通配套、是否大型屋苑等。另外，你要留意佢幾時會做大維修，這個潛在成本，你必需要注意。

至於方法2，都係可以，先買一間較細屋，去以資產追資產，從而減低樓市波動，對你將來換大屋的風險。

但大前題，你這間細屋，都要有一定質素和升值能力，最少升幅能跟大市同步。之後，你再利用月供優質股，去累積更多資金。到有一定數量，就可以入市，以細屋換大屋。

由於這間是你自住屋，所以入市與否個重點位，係你是否"供得起"。只要你確保可以長線都"供得起"，而佢又符合你長線生活所需，咁就無問題。

最後，我建議你置業時候，要考慮埋個財富組合的平衡性，唔好過於偏重任何資產類。否則，會有過度集中性風險。

最好你係置業同時，一定要留一定優質股進行增值，成個組合才算平衡和健康。

------------------------------------------------

Q21806：

Hi 龔Sir, 我想問下美國有機會加息嗎? 如果加息對香港樓市有冇影響？ 謝謝

龔成老師︰

過去一段長時間，全球維持一個較低利率水平。但長遠計，息口必然會重新回升。

雖然，我地唔知幾時會發生這件事，但都要為這個情況，作好準備。

香港樓市現時處於合理區頂，但當出現加息，市民供樓成本上升，必然會直接影響入市資意欲，令樓價下跌。

但我認為香港樓，長期香港樓市，依然會維持向上，好難跌好多。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

------------------------------------------------

Q21807：

請問1029鐵貨前景如何？我多年前0.8買入，後來0.3又買，前後有十几萬股，近解套之際政策降温，又面临大股東賣股份……是福是祸，宜守定是宜走换一隻其他的股票呢？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

鐵貨（1029）經營採礦業務，專注在俄羅斯遠東及中國東北地區開採、開發及經營工業商品項目。

佢擁有多個項目組合，著重於開發礦場、生產及加工鐵礦石及鈦鐵礦，過往業務只是一般，雖然都有生意，但盈利上落較大，有時出現虧損，投資價值唔算好高。

整體分析，只是一般般。賣出會較好。

------------------------------------------------

Q21808：

我有3個問題想請教老師：

1. 新手投資 + 加強儲蓄能力 想問我可以先睇老師邊啲既書藉，除咗實體書，會否有電子書可以係iPhone睇？

2. 關於投資盈富基金既平均買入價, 以下係我唔同時間唔同價位買入，但平均買入價一路上升，請問個原理係點樣，因為越買越貴就唔敢買..

$24.18x500
$27.42x500
$29.26x500
$28.2x500

3. 請問如何計算到宜時既股票屬於貴定平？

龔成老師：

1）你可以睇《80後百萬富翁》
《股票勝經》
《財務自由行》
之後再睇其他。

上述都是最入門及適合你的，另外，我部分書有電子書，如《股票勝經》
https://www.enrichculture.com/products/9789888395767

2）最重要睇長期的，月供往往要5年以上，最好都3年，因此你預需要因為短期的價格上落，影響左策略，只要大方向正確的就得，當然，如果我地評估到現價貴，就可能會減少金額或停止月供，但在一般情況，你保持月供就得。

3）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21809：

龔成sir,想些問題想請你指敎！小弟剛出社會 有十幾萬美元在投資 我睇左好多關係財富嘅書籍 知道汽車其實係負債

因為會令你現金流出，但我最近對某品牌汽車感有興趣 ，想擁有自己嘅汽車 但我知佢係負債 唔應該擁有 但我真係好中意 每次見到架車 都好想要

但同時又知道唔應該擁有 每次心情都好忐忑 如果係你會點做令自己舒服啲

龔成老師︰

你要分清楚，何謂「想要」和「需要」。

「想要」純粹係你個人感覺，或者想滿足自己一些欲望。

「需要」係有一些客觀因素，你係要持有這個物件，以達成某些實際目的。

簡單咁講，如果你係自顧人士，開車接單送貨。「汽車」就係你生財工具，可以為你創造價值，唔係一個負債。

若你只係覺得鐘意、或者只係想用佢作消閒娛樂，無創造出實際價值，就係你負債。

我唔係話，你完全唔可以用錢，去做一些娛樂性消費，但我地要平衡。最好係先做投資增值，有空閒錢，再考慮消費，咁會較好。

你其實可以用一個方法，就是「定目標」。

例如完成了一個財務目標，例如有$20萬、$100萬等等，你就可以用買車去獎勵自己，這樣就可以平衡，同時令自己更有效追求目標。

我地運用財富的法則，「先增值，後現金流」。

------------------------------------------------

Q21810：

成哥，我本身有留意8473，因為睇佢符合轉主板條件，0.4買左佢，點知港交所轉例，改做盈利要三年8000萬，

而家跌左，我仲未賣，而家心情好灰。

其實我買之前都覺得佢唔係妖股，係靠實力既股票。我個人認為彌明生活百貨管理得好好，我自己作為男仔陪女朋友去呢間鋪都覺得佢好，

另外佢作為零售，在疫市黎講算係好強，加上佢籌備緊做美容院，我個人認為佢會有發展空間，雖然買貴左，但我認為可以繼續持有，呢種心態正確嗎?

我明明有睇你書，但我輸左俾人性

龔成老師︰

你用生活所見，去初步分析一隻股票，係正確。但記住，我地是否投資一隻股票，主要考慮佢長線企業質素。

而能否升主板，跟企業本質無關，雖然轉版能提高了市場價值，但在更多時間，只是炒作，因此，你唔應該作為考量點。而且，這些消息好易相關股份，成為炒作對象，令股價被不合理推高，要小心。

彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險。投資係可以，但不建議太大注。

另外，政治相關因素，都會令這股波動，要明白股價風險，政治因素是好難預測的。如果你持有太多，宜減。

------------------------------------------------

Q21811：

首先多謝你之前的指導，另外想問1088中國神華及3339中國龍工前景如何，可長期持有嗎？

還有3658新希望服務，剛抽到一手，是優質股嗎？

龔成老師︰

中國神華(1088)始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望，主要係收息的。可長期持有，但不建議太大注。

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

新希望服務（3658）係中國綜合物業管理及民生服務運營商。

佢為住宅物業、商務物業及其他類別非住宅物業提供物業管理服務，亦向非業主提供增值服務（包括案場管理服務。現時在管樓面面積超過1000萬平方米，物業管理項目全部位於中國一線、新一線和二線城市。

近年企業發展不差，生意與盈利都有一定的增長，不過，企業規模始終不是好大，獨特性未算強，投資價值算是中等，未算好吸引。

你只係一手，唔算太多，可以長線持有。

------------------------------------------------

Q21812：

老師，想講吓投資以外的事。我今年29歲，本身在一間蚊型工程公司工作，人工比大學同學低幾個point。

不過最近老闆想移民，所以佢想我留低幫佢打理生意，等佢走咗之後生意可以繼續營運。(我原本想完成part time master degree 就揾工)本身公司响香港得3個員工，

啫係我，我上司同埋我同事。上司都有好大機會2年之後移民，之後就應該由我接手大部份公司業務。老闆將我人工加咗50%，

而且會有分紅(公司營利嘅某個百分比)同公司股份俾我地。我諗咗幾日，決定試吓留低，因為我覺得接手一盤生意機會唔係人人有，如果可以學習營運整間公司，

相信都係好難得嘅經驗。雖然老師嘅新書有提及只有辭職並全職創富才是財富增值的最佳方法，但我仍想嘗試一下營運這間公司。老師有何看法呢?

龔成老師︰

其實我覺得係一個唔錯的學習機會，你可以親手營運一盤生意之外，仲要唔係孤身作戰，而係有有經驗架人指點，我覺得有嘗試的價值。

我書中講全職創富，除了自己做生意外，都仲有其他幾個方法。所以，你都要睇翻，自己本身個大方向係點。

如果你係想向做生意方向發展，這個是一個唔錯的學習機會。

加上你現時29歲，最緊要試多D野，保持進步，從你長遠人生的角度，這次是很好的進步機會，會對你成長有用，加油！

------------------------------------------------

Q21813：

你好，我而家計劃緊置業結婚及提早退休

本人28歲 與另一半工作穩定，總月薪約50000，扣除開支及家用，每月可儲25000。

資產方面
- 2層內地二線城市收租物業，總市值約180萬，租金回報約2%。2013年以約40萬購入，預期該地區具長遠發展潛力，每年增值約8-10%，
近年內地樓市升勢強勁，正猶豫是否現時賣出一層套現。

- 港美 優質+潛力股票+主要指數ETF，總市值約40萬，科技類（eg科網、半導體、電動車）約佔40%；傳統金融、醫療、能源、消費品類約佔50-55%；
另外投資約5%黃金、白銀ETF+加密貨幣。持倉變動甚少，期望長期穩定增值10-15%。

- 已累積3年股票投資經驗。

- 現金約70萬（包括應急資金20萬）等大冧市掃平貨

- 負債約10萬

- 已購買足夠保障的危疾、醫療及人壽保險。

目標一：預期在5年內以首置、高成數按揭買入市值800萬內市區樓作結婚自住之用。

目標二：希望40歲前累積1000萬淨資產（當中包括1層香港自住物業）。

我可以用咩方法完成以上目標？
唔該成哥

龔成老師︰

首先，係開始投資計劃前，你要睇翻你負債部份。如果個息率係較高，你要先處理好，否則會拖低長線投資效果。

現時你持有2間內地物業，租金回報率只係一般。雖然你預期有增長力，但由於你計劃5年內要在香港置業，如果再加上這2間內地樓，你成個組合就會偏左係物業類，會有過度集中性風險。

若果你覺得這2個物業，長線升值能力會唔錯，你保留都可以。但往後新資金，要集中係股市，以免太偏中係單一資產類，因而造成風險。

現時你每月儲蓄和現有資金，可以用優質股去增值，為你中短期買入香港物業和長線退休，去作準備。

你可以投資「平穏增長股」和「潛力股」，去創造一個增值平台。你先用每月5成儲蓄，即是用$12500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，現有50萬現金和每月儲蓄，就等大跌市機會出現，才大力度掃貨，並長線投資。

我假設投資回報有10%（連股息再投資），你每月投資$25000 + 90萬資產(40萬股票和50萬現金)，若你在5年後買入物業(假設你會動用120萬)，到40歲時大約會增值至680萬。

再加上你3個物業，相信都有機會，可以達成1000萬的目標。

------------------------------------------------

Q21814：

現有9988, 700, 388, 有考慮1810, 其他要研究下，總是留不到现金？！

2382, 1177, 2845 可幾錢考慮買入

未有時間可上你堂，你那些書我應該睇呢？

龔成老師︰

你上述的持股，整體都係較有增長力。但你要明白，佢地增長潛力大之餘，不確定性都會較高。

若佢地發展理想，回報當然好。但當發展不似市場預期，股價就會有較大向下調整的壓力，你要主要這個風險。

現在舜宇光學科技（2382）、中生(1177)和GX中國電車(2845)，算係合理區頂至略貴水平。

你最好等佢地回多1成，才開始小注入貨，值博率會較高。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21815：

你好龔成老師，本人最近先開始投資屬於初哥。

現在持有以下股票：
700騰訊 $625 600股
300香港交易所 $459 400股
941 中國移動 $52.8 1500股
1177 中國生物製藥$7 3000股
1810小米 $24.5 400股

請問以上股票是否可以一直持有？

最近騰訊業績是否不大好？

這些股票您有什麼意見給我，可以在什麼地方注意，還請老師指點迷津。

龔成老師︰

你以上股票，都係有質素，但有2個問題，想你注意翻。

首先，你才29歲，應以增值為主。中國移動(0941)係收息股，增長力好一般，不適持有太多。

另外，你而家太偏重左係潛力股(0700,0388,1177,1810)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。但由於你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

至於現有持貨，由於優質，故不用沽出。只要用新資金，去慢慢拉平均個價，咁就可以。

騰訊（0700）發展正面的，業績都無重大問題。

只是近期中央打壓大型企業，令佢股價較波動。但相信政府，應該唔係想佢地做唔倒生意。只係希望加以規管，在可控和對整體經濟安全的條件，去賺錢。

此股有長線質素無大變，你記住我地投資一隻股票，係睇佢長線質素。一些中短期因素，如果無令佢長線質素轉差，就算股價出現波動，你都唔洗太在意，你照長線持有就可以。

------------------------------------------------

Q21816：

老師，我溫習緊notes，有d唔明

1) 388，823 屬於水桶幾？佢地係特殊例子，高派息率，但潛力較大

我這2隻都持有，比例應該怎樣配置？

2) 原本我一家打算去澳洲，但佢封關，無得入境。

為了移民，於是賣樓，但當時打算入籍澳洲後才買澳洲樓

所以去年10月賣出hk大單位，今年1月時買入hk細單位收租,大約每年2.7厘回報

手持hk 100萬用來買股票，亂咁買左d, 依加上左你既堂，想學習下點樣配置

另外，澳洲封關，現打算去UK, 原因為亞仔升學，因亞仔（小二）越來越討厭返學，亂做功課，成日欠交，但佢好聰明，無乜溫書都有85～100分，只是不適合被填鴨

如果去UK, 用hkd 100萬做首期，還是keep on買股票？

sorry寫得有d亂，因為原本去澳洲移民，依加轉UK...近日都好較心亂

龔成老師︰

1. 港交所(0388)係水桶1，而領展(0823)係水桶2。

一般水桶1，派息比率係應該偏低。因為這些企業，都尚在發展階段，需要保留較多盈利去作發展。

但港交所(0388)由於佢業務性質特別，本身行業又係有壟斷性，唔需要留太多盈利，都可以維持其優勢，因此佢派息比率會較高，係正常。

房托類根據規定，佢必須派出最少90%盈利作股息，因此我地會視為水桶3。但領展(0823)有點特別，佢有別於其他房托，只係用組合物業收租。

領展還會定期翻新有潛力物業，去提升佢價值，從而令租金有所增長。因此，我地會視為水桶2，有派息之餘，都有平穏增長能力的類別。

若你係中年人士，港交所這類水桶1，最多可佔組合40%，若你投資能力較一般，可以再下調。水涌2會作為力，再配以少少水涌3，就算得上係平衡。

2. 當你完成課程後，你可以因應自已能力、年紀和風險承受力，去試下配置。如果不懂定平貴，就先月供或分注。總之，唔好急住去投資，要量力而為。

再有唔問，就係INBOX再問我。

至於，100萬點樣用，我會比較偏向建議你用來在英國置業。

從投資角度，你應該考慮這筆資金的機會成本，投資係乜野地方，先可以將佢係合理風險之下，利潤最大化。

若以香港樓和香港股市做例子，現時租金回報率低，股市值博率較高，故資金應留係股市。

但由於你要移居異地，應該先以安頓好生活，減低不明朗因素為優先。加上英國普遍樓價，無香港咁貴，值博率都會較接近。

因此，如果你找到合符你長線生活需要的自住物業，又可以供得起，咁你置業先係可以。到你未來生活一切安定下來，有閒錢時，才再投資增值。

而一刻，你應該保留較多資金，去處理你英國新生活上的問題。優先從生活上考慮，投資放後少少，我相信會較好。

------------------------------------------------

Q21817：

龔兄(1)千萬富翁本書最尾詳解5條致富方法， 如果我唔跟次序去睇得唔得， 先睇股票後睇其他ok ?

(2) 你嘅書裏面提到有錢人經常運用財富系統[借]去創富, 假設我已經做曬自身風險評估，想問下如果我先買咗自己嘅信貸評級報告，

然後先去銀行或者財務公司，咁樣係咪好過佢哋主動去查我嘅信貸記錄(聽人講畀人主動查好似會對評級有影響) ? 其實喺銀行借同喺財務公司借邊度合適? 如何取捨?
感激解答

龔成老師︰

1) 實戰編，你可以先睇你目標的類型，係可以的。

但建議你最終係要睇晒，有助於你了解和幫自己定位，去計劃將來。

2) 以我所知，銀行定你自己去做評級報告，係唔會有分別。至於借銀行定財務公司，一般銀行利息會低D，而且會較方便。財務公司唔係唔得，但你要了解清楚是否持牌，和產品相關細節。

如果係整體成本較低，你都可以考慮。

通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

但現時大市只係合理區，明顯未係機會，若想用借貸投資，建議再等等。

------------------------------------------------

Q21818：

你好龔成老師，本人48歲，丈夫49歲，有250萬現金本身做定期存款多年，現在因為冇利息，希望賜教方法，唔想有風險或者超低風險，

有一層自住樓，（欠按揭80萬），有150 萬股票，有110萬銀行保本保險儲蓄，一層大陸順德細樓（已經付全數）50 萬，20萬基金（低風險），謝謝。

我是主婦，丈夫做生意，有一個三歲小朋友，自住樓約值700 萬。

股票包括 5，2018，3175，405，700，270，2888，1733，2318，1800，1833，6088，2314，6127，2845，2812，2820，2238，1658，1186，3800。

龔成老師︰

其實就算投資最穏健和保守的股票，都係會有風險，只會係多與少的分別。

若你係完全唔想承受任何風險，你可以投資定期，儲蓄保險、美國國庫債券、IBOND等低風險產品。但缺點係，佢地增派息率唔高。

以你現時年紀，應該都要做少少財富增長，才算理想。但若你真係唔想承受太多風險，只買上述產品都係可以。

如果你可以承受少少價格波動的風險，你可以將部份資金，投資「收息股」。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

大市現處於合理水平，那250萬資金，你可以先用多50-80萬，以"分注"形式慢慢入貨。餘下資金就等大跌市機會出現，才大力度掃貨，並長線投資。

至於你現有持股，其實好多波動性都好大。以你較保守的投資取態，佢地唔係咁適合你。

騰訊（0700）、平安好醫生(1833)、昭衍新藥(6127)、GX中國電車(2845)、三星中國龍網（2812）、ＧＸ中國生科(2820)都有質素，但係不確定性較大，股價預期會好波動，建議你不要持有太多，甚至將佢地全部換成收息股，或者一些適合你的產品。

平安(2318)、粵海(0270)、瑞聲(2018)、IT HON TENG（6088）、廣汽集團（2238）、中國鐵建(1186)係平穏增長型，波動性會細D，但風險會比收息股高。你自己再衡量下，是否持有，還是同樣換至其他地方。

Ｆ三星原油期（3175）我無對這基金有特別研究，佢係追蹤油價相關的指數。

中短期油價會好波動，風險高。但長遠計，油價唔會好似現時的低位水平。

因此不是無投資價值，但你最好仔細了解這基金和佢追蹤的指數先。同埋，一定唔可以大注。

易大宗(1733)、渣打(2888)投資價值不高，建議換至其他投資項目。

保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

餘下無提及的股票，都係收息股，若你可承受少少價格波動的風險，長線持有就可以。

最後，你要留意持股總數，以你資金收量，組合大約10-15隻股票好了。過多你會好難定時審視和管理，對你會不利。

------------------------------------------------

Q21819：

你好！龔成老師，本人38歲想請教一下如何調整現有投資組合，邊D適合長揸，邊D應該沽出/減持？

股票組合如下：

香港中華煤氣有限公司 (3) 3024股@ 17.30
思捷環球控股有限公司（330）600股@ 50.00
中國建設銀行股份有限公司—Ｈ股（939）3000股@ 8.00
金利豐金融集團有限公司（1031）4000股@ 6.00

工商銀行—Ｈ股（1398）4000股@ 7.00
醫渡科技（2158）1000股@ 65.15
京東健康（6618）50股@ 71.00
阿里巴巴－ＳＷ（9988）500股@ 250.00

另外如果想加入比亞迪電子（0285），吉利汽車 (175) ，阿里巴巴－ＳＷ（9988）作長線投資，現價可入嗎？謝謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應以增值為主。建行(0939)和工行(1398)只係收息股，增長力唔高，不宜持有太多。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

金利豐金融(1031)質素一般，建議慢慢換至其他優質股較好。

醫渡科技（2158）有潛力的，可長線。但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

你現貨可持有，但暫時唔好再加注了。

其餘持股，都係有質素和適合你年紀，長線持有就可以。

至於想再加入比亞迪電子（0285），吉利汽車 (175)，都係可以。比亞迪電子（0285）現價偏貴，回多1,2成才算合理區頂，才可開始小注。而比亞迪電子（0285）現價算合理區頂，無貨可先小注，到有明顯回調，才正式入貨。

阿里巴巴(9988)雖然現價合理，但由於佢已經佔你組合較高比重，個別企業不應佔組合15%以上，否則會有過度集中性風險，故你暫時不要再加注。

另外，你而家太偏重左係潛力股(2158, 6618, 9988, 0285, 0175)，佢地雖然有增長潛力，同時風險都較高，不宜持有過多。

你算年青，風險承受力較高，但潛力股也最多只宜佔組合約5成，餘下應集中係平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q21820：

你好，龔Sir, 很後悔不早點認識你的專頁，因為跟住你的投資方法，幾個月已經見到明顯的增長，真心感謝你願意將你的心得經驗不吝分享。

現有一問題在猶豫：（現37）6年前買了一份投資保本的保險供10年（還要供4年）因當時幫朋友無留意回報，現發現每年投入5萬，10年後多1萬，

而且供滿期後再放多5年先會多20萬，現在停供會蝕7萬，但因今年（最遲明年）會置業需要資金，請教阿Sir會如何安排？謝謝

龔成老師︰

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

因此，你要視乎翻你持有的投資保本的保險供，當中的特性，以及本身的預期回報，其中保險的作用。

從投資角度計，你保本保險回報，唔算理想。

同一筆資金，若利用優質股去增值，長線好大機會可以跑嬴這份保本計劃。

當然，你這計劃的好處，就係保本和較有保證回報。而投資股票，股價始終會有波動性，有一定風險。

但由於你係有實際置業需要，而資金又不足，那你只能選擇停供。

以你37歲，應先做好增值部份，我較建議先用優質股增值。但若你係好保守架投資者，買儲蓄保本保險，都係可以，但最好不要太多。因為佢會拖慢你財富增長步伐，你要明白這點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21381-Q21400）

Q21381：

龔Sir 你好！ 請問如何計算企業價值呢？

700 騰訊為例，用NAV (778M/9.6bn no. of share)去睇，2020 佢只值八十幾蚊人仔，化返做HKD 都係一百蚊左右。

而家股價$600, 係咪當中包括左好多市場情緒同對未來憧憬既估算？想請教你通常點去量化。 感謝

龔成老師︰

你上述所講的價值，只是企業的「資產價值」，這是衡量企業平貴的其中一個方向，但絕對不是唯一的方向，同時，並不是所有企業都適用的。

在些企業，其資產價值與盈利能力、長遠發展未必有太大的關係，市場會較著重企業的長遠發展力，多於擁有多少資產。

簡單來說，有些資產有一定的市場價值，有些資產無太大的市場價值。有些企業長遠的發展及盈利與資產有一定的相關性，有些企業則無太大相關性，有基本的資產後，長遠的發展較受大環境影響，而不是有多少資產。

騰訊(0700)偏向係潛力股類，市場會著重將來，而不單是過去資產，同時會著重其業務價值。

至於點去計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21382：

老師現年48歲，月入4萬8，想每月投資2萬

有一層做咗400萬按揭嘅樓，已租出，租金可cover 每月銀行還款。

有現金50萬
冇股票（因曾輸過）

有保險基金單50萬
想5年後移民，想喺呢幾年做進取嘅投資！睇咗你嘅資料，但遲遲未決定到點入手！

銀行職只又不時想我買保險產品！
請問有咩建議？

龔成老師︰

我地進行理財，應說建立一個平衡的組合，你現時有物業、保險基金、現金，但就缺少了股票，因此應該增加翻股票。

你過往投資失利，相信是由於未了解股票最基本原理，只要你往後明白，投資股票就是持有優質企業，長線持有等企業成長，就得。同時，要建立平衡組合，不是賺差價。

另外，你話「想5年後移民，想喺呢幾年做進取嘅投資」，要留意，財不入急門，加上5年時間不算長，反而不能過度進取。

以你現時情況，我建議你以「平穏增長股」 去創造一個增值平台，在這5年為你的財富增值。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以選擇投資這些平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

到你將要移民的一年前，再慢慢沽出手上持股套現，就可以。但唔好到要走個一刻才一次過沽貨，咁樣會令股價波動性風險大大提高。

至於"保險"只係理財中防守部份，買足夠保障就可以，增值可以留比優質資產(如優質股、物業等)去做，個效率會較好。

你現時那份保險基金單，可以睇翻基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，只回報係比主要投資市場高，就可以考慮繼續投資)。

------------------------------------------------

Q21383：

Hello 龔sir!我現有大概HKD3百萬現金及數百萬股票。

一個人租樓住（租每月HKD20K），無小朋友，考慮3 年內退休，其實應唔應該再考慮買樓自住（死後層樓冇用）？

如買樓就無晒現金同要賣股票了(50 歲,就退休好難做按揭)，變咗3年後唔夠錢退休。。。

繼續租又好似好唔安穩因為租金會一路升，同業主可能會收樓...矛盾中 (退咗休會想讀吓書，所以都有不少洗費)

龔成老師：

以你的情況，租樓會較好，第一，你現時做按揭未必做到，因此去唔翻現在的生活質素，第二，你無後人，因此投資物業的誘因會減少左。第三，買樓後會用盡資金，反而風險提高左。

租樓雖然較好，但坦白講，每月$2萬的租金，長遠都會對你有一定的生活壓力，所以，可能要轉一些較平租的地方。

如果利用$300萬，投資不同的工具，收息股、低風險基金、年金、債券等，建立一個組合，如果能平均有5%現金流回報，$300萬即是每月收息$12500，都算是可以幫你提高現金流。

當然，你到時可以再利用手頭上的股票，進行配置，調整一下，如果持有一些現金流強的類別，就可以增加你到時的現金流。

你要思考一下長期的收入及支出情況，是否要調整生活質素，又或要日後想方法增加收入，或略為延遲退休。

------------------------------------------------

Q21384：

我大學嗰時讀嘅Investment，好似無乜用。

龔成老師：

大學課程，其實我都有讀過「財務系」，坦白講，學校教的是學術，我會認為有基本作用，但睇巴菲特相關書，以及年報，會有用得多。

------------------------------------------------

Q21385：

我想問阿sir，睇youtube聽講你以前未價值投資法時，試過儲一筆錢又蝕左佢，儲一筆又蝕左。

其實，因為我剛剛炒衍生工具蝕光了投資户口的錢，一陣約見了心理醫生了，想問下你當年總共蝕左幾多錢？

同埋蝕左幾多次，可以分享下你的心路歷程嗎？

我蝕左本金十萬，還有14萬儲起在家人到，以前都試過買牛熊證蝕曬錢，所以無將所有錢拿去投資

因為以前蝕曬錢，所以好幾年吾再投資，今年2月入返市，你都知呢排跌市，一買就蝕，實在無法子，又買返衍生工具，結果賺13萬，但後來又蝕返，想追又一直蝕，最後 total lose

睇醫生是因為炒牛熊證心理承受吾住了，需要求醫，好後悔買返衍生工具，但跌市蝕自己又控制吾住

龔成老師：

我20年前，都是短炒者，投機，玩幾年，輸足幾年，當年未算好有錢，相信蝕$10萬左右（其實唔記得），但當年已是全部身價，應該話輸左幾次身家。

之後我明白，衍生工具原本發行商食水好深，散戶只有做水魚，所以，我決定以為唔玩衍生工具。之後只做優質股，長線投資，就開始不斷賺錢。

我之後做銀行同證券行，見大部分輸錢的客，都是偏向短炒、玩衍生工具的！

當然，你問我有無人贏錢，是有的。但就我觀察，長線投資贏錢的人，比短炒的較多。

你這類人，我在過往做銀行時見唔少，因為玩衍生工具輸身家，所以，點解我現時，不斷強調再強調，不要短炒。要買優質股長線持有！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。

因此，我相信長線投資，是真正助我地贏錢的方法。

我建議你倍止所有衍生工具投資，你現時同賭錢無分別！

之後，慢慢儲現金，月供一些穩健的股票，或ETF，例如盈富（2800）、高息基金（3110），我相信是適合你的。

------------------------------------------------

Q21386：

龔成老師你好,多謝您一直鼓勵我地要投資理財,同時經常比正面的信念我地,實在感恩, 自從留意你FACEBOOK後

本人33, 由2019年開始投資,開始時都有小小升調,但最近大部份買入的股票都回落,現時股票價值同入的資金差不多,之前跣時用了大部份資金,現時手持現金好小,

以下是我的股票組合,希望你能給予意見應該如何調配, 感恩

2800 @ 25.82 4000股
3067 @18.52 4700股
1038 @53.72 1600股
0066 @43.95 1706股
1177 @7.21 2800 股

3033 @ 8.005 1600 股
1810 @26.65 400 股
3188 @52.6 200 股
1038/3067 虧得最多,是否需要減持,謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

股票中短期上落好正常的，不用太過理會，睇「企業長期質素」就得。

現時你的組合，都是有質素的，可以持有。但我見比例上，潛力股類別開始有點多，你要注意翻，因為這類股的風險較高，股價上落會較大，因此在比例上不能太過多。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你一定要睇長線，不要太著重短期股價，同時由於現價仍唔平，所以如想加注，一定要慢慢分注。

最後，如果你現時持有現金比例太多，就不要投資住，儲下現金先。

------------------------------------------------

Q21387：

龔成, 您好! 手上持有渣打2888 兩年 - 500 股 @HK$54唔係好多, 見派息不好, 又沒甚麼特別消息.......是否應該放晒佢呢? 謝謝 (私人回覆OK)

龔成老師：

渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議考慮其他更有質素的銀行股仲好。

因此，你可以考慮部分或全部，轉其他。

------------------------------------------------

Q21388：

您好！現時手上有800股1928(金沙)於$32時買入，現考慮趁行業復甦前增持。

不過看過它2020年剛出爐的年報，它的年末現金由2019年的24億美金，大跌至8.6億；這個數字比起它的流動負責14.1億還要少。

一直以來您都看好澳門博彩股，但面對現時的情況，自己對它變得有所保留，甚至企業本身「捱唔住」。請問您認為這個想法是否恰當？

龔成老師：

上述的情況，會令風險度略有提高，因此會少少扣分，但未至於對佢有倒閉影響。

第一，佢規模好大，品牌、資產、現金流強，要在市場進行集資，好易。

第二，佢負債比率未算好高，要再問銀行借貸，有好多空間。

第三，佢持有的酒店等資產好有價值，如果真的經營環境差，要賣出套現救企業，絕對可以。

第四，佢本身現金流好強，只要澳門好翻少少，佢都有一定的現金流，不斷有資金翻。因此，唔需要太過擔心。

------------------------------------------------

Q21389：

龔sir你好。Follow左你好耐，亦上過你堂，好遺憾無早啲認識你。

之前有買1211，但因為唔夠耐性錯過左佢爆升時間，之後16左右買吉利升左一倍都無放。

因為唔想再錯過，而家佢跌到得$20左右，請問你覺得吉利前景如何？值得再長揸嗎？謝謝

龔成老師︰

記住，我地投資優質股，一定會係長線。因為賣出股票最大的風險，就是買唔翻。

不少人會以為「若果現在賣出 到時再以低價買入」，中間可以賺到個波幅。

但「到時再以低價買入」？真的一定會預期中發生嗎？？？

就好似我經常說，700多年不斷上升，388升100倍。如果我地升少少就沽貨，而唔係用質素，去決定是否持有，我地就無可能賺到近100倍回報。。

所以，你現時長線持有吉利(0175)係正確。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂位，股價波動，現貨可長線。如果現價入貨，小注都得。

------------------------------------------------

Q21390：

老師你好，一直遵從你的指導每月將資金一半用來月供，另一半用來儲現金等大跌時入貨。

由於不知道等到何時大市才大跌，可能一等就半年甚至一年或更長時間，就覺得把這筆現金放在銀行的回報率太低了。

請問老師有沒有推薦的現金替代品，可以令這筆現金可以比放在銀行有更高的回報？謝謝！

龔成老師︰

無錯，我地唔會知道下一個大跌市，係何會出現，可能係1,2年後，但同時間可能就是下一天。

因此，我地最理想係持有現金去等待，因為現金流動性最高。

若你將這筆資金，用來買了其他理財產品，要贖回可能需要些時間，甚至會被收取一定的提早贖回費用。

而用來先買部份較穏定的股票(如收息股)，我都唔建議，因為再穏定的股票都有波動性，到時會跟隨大市下跌，以你可投入資金減少。

所以，我建議你都係持有現金最好，最多可以將部份用作短期定期。我地投資唔好睇太中短期，要用整個組合的長線發展機會，去做考慮，因此用現金等待，會係較理想的做法。

------------------------------------------------

Q21391：

龔Sir您好，我夫妻倆在澳門從事教育工作

對於投資沒有太多觀念之前都是拿錢給長輩在國內買樓買車位。

1. 去年疫情開始後股票大跌後，開始學買股票，我該如何學起？

2. 該從你的哪本書看起？

3. 之前做過一些短炒確實賺到錢，但是現在回頭看若當時沒賣掉那些股票的話現在賺更多，現在決心要開始好好學理財放長線。

我現在這組合可以嗎？會不會太保守還是太高風險？

4. 我該繼續專心供一隻還是先分散幾隻建立好組合後再慢慢提高持有比例？

夫妻倆32歲 未有子女
夫妻倆年收入：約110萬hk

現有流動現金約: 20萬
儲蓄險：40萬
(今年剛繳完2025年後開始拿利息)

國內放租樓盤：廣州2樓、中山1樓、中山3車位
(租金拿來當作給長輩的家用，全部以交清貸款)

固定支出：
在澳租樓(11000HK)
兩人保險每年約:10萬hk
年收入至少15~20%捐給慈善機構
無負債

之前
每月供 5000
00066 港鐵 或 00388 港交所

現在打算每月拿8000出來月供股票

00270粵海 或00066 港鐵 $2000 2選1
00087 太古股份公司Ｂ或 港交所 $3000 2選1
9988 阿里巴巴、 00175 吉利汽車、01211 比亞迪$3000 3選1

現有股票 組合總值約16萬HK。組合總表現： 約+7%
分配如下

00066 港鐵@45.172 18.9%
00388 港交所@406.930 19.4%
00694 北京首都機場@5.240 7.28%
00883 中國海洋石油$7.648 10.02%
01398 工商銀行@5.240 3.32%

02588 中銀航空租賃@60.9 8.67%
02800 盈富@24.2 17.6%
00270粵海投資@12.240 2.4%
01810 小米集團 @28.109 12.33%

龔成老師︰

1) 就初學者而言，你要加強吸收知識，多閱讀理財類別的工具書，以及多接觸財經新聞，而進修相關課程亦是重要的知識來源。

另一問題是價格，初學者未能捕捉股價的高低，所以，策略上宜用分注買入的方法，將一注資金分成多注，然後在不同的價位分別買入，這樣就可避免一次過在高位買入的風險。

2) 你可以先睇我寫架"80後百萬富翁"、"財務自由行"和"股票勝經"，都適合初學者。之後，才看我其餘9本書。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

3) 正確，優質股的確係長線持有，才會有最理想的增值效果。

我地做財富增值，除左講增值能力外，也要注重成個組合的平衡性，當中要包含不同的優質資產(如物業、優質股等)。

你現時組合，明顯係偏重左係物業類，未來要增加優質股的投入，去令組合平衡翻。

而"保險"只係理財中防守部份，買足夠保障就可以，增值可以留比優質資產(如優質股、物業等)去做。現時供完的保險可以不變，但未來唔好投放太多資金在儲蓄類保險產品。

我先講你現時持股組合，北京首都機場股份（0694）、中銀航空租賃（2588）和中海油(0883)本身都有質素的，但只屬中等，不宜持有太多，暫時唔好再加注。

另外，我地組合唔好太偏重係個別企業或者行T%，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

你現時有個別股票，港鐵(0066)和港交所(0388)係超過這個比重，但由於佢地好優質，所以唔需要沽出，只要暫時不要加注，讓新資金慢慢調節就可以。

但盈富(2800)係一個包含55間不同行業的股票組合，故不受15%所限。

新月供組合方面，你可以用粵海(0270)，因港鐵(0066)已有一定貨。再加港交所(0388)，而餘下3隻，阿里巴巴(9988)會係3隻中波動性較低，如果你想進取D，可選另外2隻。

但現時比亞迪(1211)偏貴，不宜做月供。你可以用吉利(0175)或GX中國電車（2845）代替。2845這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

另外，我建議你加入一隻盈富(2800)，用佢做主力，可以令你個組合平衡性高D。

你現時用於月供金額，相對你們收入比例唔算高。以你年紀，應盡力做好財富增值，盡可能將閒錢，都放在投資計劃上會較好。

現時大市只在合理區，每月儲蓄宜先用一半去做月供。餘下一半和20萬就等大跌市機會，才入市。

4) 我地唔好成個組合，只集中係1,2隻股票身上。(當然，盈富除外。)

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21392：

老師，我今年32歲，有兩個小朋友，家庭每月收入30K，持有下列股份。

想問個倉比例合唔合適？有無邊隻唔應該再等？要唔要減持？

如果想睇你啲書，你推薦先睇邊本？
多謝！

9988阿里巴巴248 @300
9618京東集團327 @200
3888金山軟件60 @1000
0285比亞迪電子52.6 @1000
0327百富環球8.2 @4000

0880澳博控股9.8 @5000
3988中國銀行2.9 @120000
0914海螺水泥50 @2000
1530三生制藥7.55 @5000

龔成老師︰

我地係創建一個財富組合時，最重要係有優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時你持股中，三生製藥（1530）和百富環球（0327）質素算係中等，不宜持有太多。

安徽海螺（0914）佔組合比例開始多，不宜再加注。

另外，我地個組合唔係可太偏重於個別行業或企業，相同行業不可佔組合多於3成，而單一企業不要高過15%。

你現時中行(3988)明顯係佔比過重，而且此股主要用來收下息，唔會有太高增長力。以你32歲計﹐此股太保守，你應先做好增值部份。

因此，你可以慢慢將此股，換碼至其他較有增長力的優質股。

其餘股票都有質素，長線持有就可以。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21393：

龔Sir,我啲股票比較高位買入，家陣坐晒艇，想你幫忙睇睇

9988，均價285
1810，均價29.27
1833，均價116.7
1024，1手價291（250入見穿左240即斬，導致均價升到呢個位)

除左快手之前想短炒（但依家都變長揸），其他一直都打算長揸或再加注。

龔成老師︰

現時你全部股票都在虧損狀態，好明顯你投資方法上，出現左核心性的問題。

首先，記住我地投資係長線持有優質股，而唔係做短炒，去賺差價。

見你不少股票都是較高位買入，相信你較易受市場氣氛影響，同時你由於未有企業估值能力，因此在貴的價位買位。

這些股票雖然帳面值係虧損，但有質素，你可以守。但若個別股票，係佔組合比重好多，就要沽出部份去平衡風險。

建議你在再投資前，先學好正確的財富增值理念，和投資相關知識。你可以睇我寫架"80後百萬富翁"、"財務自由行"和"股票勝經"，都適合你這類初學者。

就算學好，在經驗較淺時期，我都建議你先用月供，或分注的投資策略。等你真正有企業估值能力後，先一手手買，會較好。

------------------------------------------------

Q21394：

龔sir 我而家20歲 Year2

兩年前喺Facebook見到你，努力儲咗兩年錢，今年開始Value Investing。

目前持倉
$70.45 一手領展
$44 一手港鐵
$26.5 一手2388中銀
$7.43 一手置富
$5.41 一手工商銀行

1. 想請問可唔可以比少少意見我嘅portfolio

2.同埋港鐵公佈業務去年虧蝕。現價會否太貴？ 我需要換股嗎？

龔成老師︰

1) 你現時持有股票，都係值得長線持有。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，以你現年20歲計，你組合持股有少少保守。置富(0778)和工行(1398)主要係用來收息，增長力麻麻。你現時應先著力增值部份，故這類收息股就唔係咁適合你。現貨可持有，但不要加注了。

將來，你可以加入一些潛力股，去提升組合增長力。例如中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，你投資經驗較淺，暫時不宜持有太多，大約3成好了。到你累積到較多經驗，才慢慢將比重提升至5成。

同時，現時大市只在合理區，資金唔好盡用。最好留有部份，等大跌市出現時，可以用來掃貨。

2) 我地去分析一間企業時，要用「長線」質素和發展去考量，唔係只係集中係1,2年數字。

上年由於疫情關係，對不少企業都造成嚴重的負面影響，港鐵(0066)也不能幸免。

但上年度佢虧損的主要原因，係因為物業重估數字，這只是一個會計上的數字。如果扣除這個因素，其實佢在營運上，是有錢賺的。

但睇翻佢長線，有質素。佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的，可長線持有。現價大約在合理區中上部，未算貴。但由於你有貨係手，如果想加注，要等佢回多1成以上，才出手會較好。

------------------------------------------------

Q21395：

老師你好， 因為不經意 在facebook 發現你， follow你 一段時間也有購買你的書籍， 對我不善理財的人， 實在獲益不少！

因為最近工作 非常艱苦 應該很快失業， 我先生已經因為身體問題，去年年尾已經失業！

所以希望用手上的現金資本，向你請教適合的投資方向。

以下是我的 財務背景， 請你多多指教!

本人50歲 ，目前仍然有Part-time工作， 但因為全球因疫情影響經濟，公司業績非常差。我應該估計會在兩個月內失業, 基於經濟問題及身體狀況，應該再有工作機會。

丈夫56歲 因為身體健康問題，2020年尾被迫退休

沒有子女

目前有資產如下:

1. 4個物業(1個自住，2個放租私樓及1個工厦放租)
所有物業合共市值 HK$2300萬

4個物業合共尚欠銀行貸款 HK$750萬
租金扣除每個月銀行供款差餉管理費及物業稅 (包括自住物業在內)剩餘HK$3600.00

2. 已經投資基金 (高風險 )$80萬
每月派息HK$3600.00

3.股票
過往20年投資股票,已經很有耐性等待，持有股票回報欠佳,種種原因，輸了很多錢 ！

因為近1年看 你facebook 和你的書本 所以決定賣了已經持有十多年 的股票， 希望重新再計劃好 ，才重新買股票作遠投資 。

目前手上只持有:
2638*5000
1038*1000
2800*1000

4.現金:HK$200萬
因為手上持有四個物業 ，仍然有銀行掛鉤存款，大概1.3%
即每月利息合共有HK$1500元

希望 保留100萬現金作為日常全活備用金

5. 人壽及各項醫療保險(所有共2人):HK$10,000.00

6.月供高風險基金: HK$5000*10年(2020尾開始供)

7.日常家庭支出:HK$20,000.00( 不包括保險和月供股票及基金)

8.投資目標:
希望利用手上200萬現金，投資股票，作為未來十年退休日常生活費。

若是中途此現金投資回報不夠支付10年生活開支， 五年後可以，減持基金換取現金 作生活費 或提取 保單內的 儲蓄 價值 昨日常生活費。

估計10後,我先生可以提取mpf大約有HK$150萬( 因為目前有接近100萬) ,希望盡量減慢賣物業資產的日期， 以作日後長遠生活開支。

9. 由現在至未來十年投資計劃-銀行月供基金:

月供費用HK$20000.00

目標 計劃月供股票分配組合內容:
1.2800盈富*$6000(30%)
2.2638港燈*$4000(20%)
3.1038 長江基建*$4000(20%)或1113長實， 請提供意見 二選一 ，那一隻較可取？
4.3140 領航標普500*$3000(15%)
4.3067 安碩科技*$3000(15%)

計劃年期: 3-5年(最少36月=HK$720,000.00)

拜託你提供意見，直接評價，我們目前的財務組合 是否恰當作為長遠退休計劃安排？

感謝你經常分享你的經驗和意見
期待你的回覆

龔成老師︰

以你和你先生的情況，由於未來就業收入不確定性較高，加上你們都較接近退休之齡，投資策略唔可以太進取。

你現時物業算係有正現金流，可持有。但考慮到若不幸有部份物業不能出租，會出現額外開支。

另外，你在整個財富組合中，太過集中物業類資產，因此在之後的財富配置，不要再增加物業類的比例，而之後亦未必適合投資太多地產相關類的股票。

係你成個財富配置上面，我地會保守少少。你係投資前，先儲下一筆最少等同半年開支的應急錢，會較理想。

而所講的高風險基金，雖然以派息率計，尚算可以。但你要了解這部份回報是否保證，而當中又有什麼風險，背後是投資什麼股票、債券或工具，你要了解清楚。

例如債券，佢是否投資的都是A級債券。唔好投資一些高收益債券，其實這些是一些評級不高的垃圾債券，風險不少。

至於現有持股可以，但佔整個財富組合比重太少。現時太偏重左係物業類，未來你要加大翻股票部份，令成個組合健康。

月供組合方面，盈富(2800)和港燈(2638)係可以，而長建(1038)和長實(1113)，我會建議你用1038，佢主要係投資一些公用事業，相對較穏陣，而且派息都理想。

而領航標普(3140)和安碩科技(3067)就波動性較高，以你現時情況，我唔係太建議你用。同時3140將會退市。

你可以在以下的「平穩增值股」+「收息股」去選擇。「平穩增值股」有平穏增長力，加若干股息。而「收息股」則主要係收息，無乜增長力，但波動性較低，會較穏陣。

但緊記，隨著年齡增加，慢慢要增加收息股的比例，去減少波動性風險。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只在合理區，資金唔好盡用。最好留有部份，等大跌市出現時，可以用來掃貨。

若然你在月供中途不幸失業，可以先停一停月供都無問題。所有投資的大前題，都係用閒錢。如果資金係用於日常生活或一些短期的必需性開支，就不要動用。要先確保好基本生活，才可以進一步做財富增值。

------------------------------------------------

Q21396：

龔成老師，本人27歲，文職工作，月入約$17000，現在想讀兼讀制大學（外國大學提供的課程，讀商業和英文的範疇，但在香港讀，有資歷架構QFlevel5,今年9月開學，學費共$12萬，讀兩年）

本人現持六萬現金，諗住半工讀。想讀大學的主要原因是增值自己英文的程度，同埋希望有張沙紙多點自信有多點保障。

但又擔心冇咩錢投資，因為要交學費同埋應該會少時間學投資（本人初學，只投資過債券），加上，27歲才開始讀又好似好遲又唔知讀唔讀得黎。

好迷惘，想請教老師意見，會否覺得我應該全副心機集中儲錢同學習財務知識/還是覺得值得一試去讀？先讀一個學期試下？

大學學歷是否很重要？
謝謝！

龔成老師︰

其實學習係無分年紀，但最重要係，這個學習所得到的，是否對你長線發展，係有實際的正面影響。

例如你現時工作的行業，要升職加薪係好需要一紙較高學歷的證書。或者課程當中某些知識，對你將來發展有好大幫助，你都可以考慮進修。

相反，如果你係純粹感覺有張紙會增加安全感，或者你是抱著"人有我有"心態"，我就有保留。你要先認清楚，這個大學課程是實質上，還是心理上幫助你。

另外，如果想增值英文，其實有好多方法，未必一定要上課程。而學習財務知識和報課程係無衝突，你係可以2者並行。

你自已先認清個情況，再決定這些錢，是進修，還是投資。

若然投資，你應該買入一些有質素的優質股，把握在年輕時，累積一筆較理想財富。債券增長力有限，不太建議你用。

------------------------------------------------

Q21397：

你好，我是新讀者，看見板面內容後，真係增長好多股票知識。謝謝你的無施分享。

本人43歲，有2個小朋友，同丈夫供緊層樓。之前貪快，已經係0175，3800，0788虧錢離場。

現手上有貨
2138 ：6000股
2333 ：1000股
0788 ：20000股 （1.27入）
3333 ：2000股 (22.3入）

請問這個股票組合適合嗎？想放棄3333 改入1516，3988適合嗎？

或是直接入你提議嘅3067（安碩恒生科技）好？
感謝你的意見。

龔成老師︰

記住，不要用自己的買入價作為何時沽出的指標。坊間經常用買入價作為何時沽出的標指，這是極度錯誤的。

沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，才可沽出。

你已沽出的3隻股票，除了保利協鑫能源(3800)質素一般，其餘吉利(0175)和中國鐵塔（0788）都係有質素，你係應該長線持有。

現有持股方面，香港醫思醫療集團（2138）都有質素的。不過業務中短期會有少少波動，除非你現時現金好充裕，否則我建議你沽出部份，去平衡一下你的風險。

至於，中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，你現時小注持有，都算勉強可以，但都要明白風險。

融創服務（1516）有質素的，主要在中國提供物業管理服務及增值服務。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

而中行(3988)而價合理，但佢主要係用來收息，唔會有太高增長力。以你年紀，這類股票只宜小注。

安碩恒生科技(3067)都有質素，佢係追蹤包含恆生科技股指數，有投資價值。

但留意你上述股票(除了中行3988)，普遍波動性風險都係較高。我地創造一個財富增值組合時，最重要係平衡性，唔可以偏些係一些波動性高股票。

以你43歲，都可以投資安碩恒生科技(3067)這類潛力股。但若果你投資經驗不多，或者較年長，比例就不宜太多。

同時組合上，應加入一些平穏增長股，並以之作為主力。這類股票波動性無咁高，但有平穏增長能，可以令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q21398：

Hi 老師，你好，想請教你，買咗以下股票，可以比一些意見嗎？

同睇到你post 又想月供，我39歲，月糧$19,000每月可儲$2000,如果月供可揀什麼？謝謝

778
$9.09 @2000
$8.92 @3000

11
$177.9 @400

1928
$44.55 @1200
$42.5 @800

9988
$285 ,$254.4 各1@ 100

1833
$117 @100

6820
$3.78 @8000

2400
$97,$90.4,$67.8 各1手

1918
$35.95 @1000

6088
$3.18 @6000

1024
$306,$283.6 各1手

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應先以增值為主。你現時買股票，都質素。

但當中，融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，自己要控制好注碼。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，現貨可持有，但暫時不宜再加注。

我發現你主要問題不在於選股，而是手上不少股票的買入價跟現價都有相當距離。雖然部分可以守，但你要預起碼等一段較長時間。

其實你的情況，都是不少投資新手會犯的錯。第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

所以，你暫時最好先用月供去投資，每月可以用$1500供盈富(2800)，餘下資金就儲起，等大跌市機會。

另外，你組合波動性股票係佔較多(1024, 6820, 9988, 1833, 1918)，故你長遠要加入大盈富(2800)比重或加一些平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

此期間，你要努力學習投資知識，要學好如何選擇優質股，點為股票定平貴。這些技巧，對你長線投資增值，係十分有幫助。

------------------------------------------------

Q21399：

你好，請問2352，順豐怎樣看

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有水資價值，但現時值博率唔算高，同時要控制注碼。

------------------------------------------------

Q21400：

龔成老師，請問1088 是穩陣的收息股嗎？見今年派息over 10%, 派息比率是100%

謝謝！

龔成老師︰

中國神華(1088)佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。

如果是收息的，都可以。但留意佢派息會跟隨利潤，而有所變動。因此，就唔建議太大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20721-Q20740）

Q20721：

呀Sir，我想問下BYD 2020份年報，我見到佢3個月內既應付帳達393億，而且銀行短債都有297億，相反佢手持現金得127億，佢又要燒錢去研發

會唔會令佢資產負債表有少少負擔又會扣小小分？

龔成老師：

其中一個原因，是因為佢生意造大左，你可以比較翻佢的存貨數字，比上年度增加，而一些流動資產，同時都增加，現金數目同樣有增加。

當企業生意造大，這情況都是正常的，我地最重要是分析佢是否在可接受範圍。

而佢的流動資產淨值，處於正數，同時比之前年度有增長，因此，我地從流動性風險的角度分析，佢未算有問題。

------------------------------------------------

Q20722：

老師，我講下我嘅情況先，我喺過去6年每年收入都大約80-100萬（獎金收入所以每年唔同）我係2015年買咗第一個物業，該物業而家大概帳面賺150萬

而且每個月放緊租，2020年用女朋友名再買入多一個物業放租（我有宿舍住所以所買嘅物業全部都放租）我認為樓市嚟緊就算冇爆炸性嘅升幅

因為香港地小人多嘅供求問題，我認為物業資產都係會緩慢地持續上升。我視投資係資產既增值。

但重要嘅問題係，我嚟緊七月開始工作崗位有調動，會降至年薪大約40萬，呢份年薪有可能長時間維持，因此我投資目標係打算增加左現金流先，再慢慢組織投資組合。

我明白大部份人都係［先增值後現金流］，但呢種方法套用我度是否適合？

個人財務狀況
-現時現金$70萬打算攞40萬出嚟做收息維持現金流。
-嚟緊年薪約$400,000
-每月開支約$30000

呢個情況買一啲好嘅債券會否適合我？

你的專頁和書藉使我獲益良多，再次感謝你浪費寶貴時間給我意見

龔成老師：

物業方面，不用有物業變動，但你收入減少，要好好計數，令你保持「供款」方面無問題。

我先從理論上，財富增長角度去講：

「先增值後現金流」，對絕大部分人，基本上都適用的，因為這是一個累積財富的大方向，利用年輕時的「可承受風險」及「金錢時間值的優勢」，增值左先，之後先著重現金流。

除非你這刻好需要現金流，否則，先利用增值模式，將財富先滾大之後先追求現金流，對你長遠人生最能夠令財富「最大化」。

所以，除非你承受風險能力較低，又或短期無法有足夠收入去應付支出，才考慮增加現金流類別。

我再加入你現實情況去分析：

你工作上的收入會下跌，這刻如果投資方面有現金流，你每月的收支會較健康。

不過，如果你年齡唔大，以及能承受風險，從「長遠財富最大化」的角度，你投資有基本增長類的項目，可能較好。

當然，每個人情況不同，你現時手持物業，如果希望每月供款順利，你現時利用部分資金投資，去提高現金流，是可以的。

因此，綜合來講，我會建議你取平衡，投資一些有現金流，同時又有基本增長力的工具，再加其他收息資產。

你可以考慮一些有基本增長力，同時又有股息的股票，例如港鐵（0066）、金沙（1928）、長建（1038）、希慎（0014）等，再加入一些收息股，都可以。

至於債券，你可以考慮有A評級的就可以。當然，點都要同時留有現金，暫時動用$30萬去投資上述股票，可以的，分注投資，餘下$40萬暫時留現金。

------------------------------------------------

Q20723：

你好，襲sir, 我因為某啲原因令自己財產盡失。我宜家想重新建立儲蓄，投資計劃

而家月入40000左右，想請教如何可以起步，希望你可以比建議我

龔成老師︰

過去的事就忘記它，現在只要用正確方法去增值，財富依然可以有唔錯增長效果。但緊記財不入急門，必須按步就班咁去做。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後

可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

如果你尚有一段較長時間才到退休之年，可用"平穏增長股" + "潛力股"作組合。現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q20724：

老師早晨，想請問1861我3.8入的，它有前景嗎？

龔成老師：

保寶龍科技（1861）由中國鋁罐（6898）以介紹形式分拆上市，主要從事設計、開發、製造及銷售各類汽車美容及保養產品。

即係業務包括汽車清潔及保養產品（如汽車內飾清潔產品及輪胎清潔護理產品）、油漆及塗料（如鍍鉻氣霧劑噴霧）、冬季及夏季特色產品（如製冷劑及冷啟動劑）以及空氣清新劑。

佢亦有設計、開發、銷售及製造個人護理產品（如泡沫潔面乳、防曬霜、保濕霜、除臭劑及洗手液）及其他產品，包括家居產品（如油漆及地板蠟）、包裝材料（如內浸管、閥門及紙盒）以及汽車清潔套裝及工具。

睇翻佢的營運模式，產品形式包括氣霧劑產品及非氣霧劑產品，並按ＯＢＭ（原品牌製造，包括保賜利、ＡＴＭ、已度明、ＮＩＳＳＥＩ、勝彩、狐狸、百麗時及派樂士）基準及ＣＭＳ（合約製造服務）基準出售。

佢亦在天貓及京東網擁有２間網上商店，分別為「保賜利旗艦店」及「保賜利京東自營旗艦店」。

業務穩定，但規模不大，唔算好有獨特性，以及未算最高技術類別。

企業質素中等，現價合理區中上部，小注投資都可以，長線都得。但唔值得投資太多，同時不是高增長類型。

你如果持貨多，一定要減。如不多，守住先，但預佢未必高增長。

------------------------------------------------

Q20725：

老師你好，本人而家39歲，大約有100萬現金、之前都係短炒皇，日日炒700 輪波幅、有贏有輸。

想問一問個投資策略應該點安排同埋應該幾時入市？

龔成老師：

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時應該分注投資一些優質股，騰訊（0700）有質素，不過現價唔平，所以最好分注去買入。同時，要考慮其他股，例如盈富（2800）等（現價已可分注），平衡翻整個組合。

------------------------------------------------

Q20726：

龔先生你好，遲左加入你fb，投資經驗尚淺，想問如果揀月供股價，比亞迪，盈富基金，同領展邊隻比較好d？還是有更好嘅股票？

龔成老師：

盈富（2800）較好，對不懂選股的投資者來說，是很好的工具。現價合理，可分注投資。

這是一個「平衡組合的工具」，當中有55隻成份股，對股票組合有平衡作用。

你可以以盈富作組合的核心，再加上其他股票，組合就更完整。

領展（0823）可以的，但金額宜比盈富少。

1211係潛力股，但現價仍貴。

或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20727：

你好老師，我兩年前月供0002 中電，到目前才持有一手，但因股價跌左好多，現時仲係蝕緊，但同時呢隻股未有減派息，我應該要轉第二隻股，還是keep 番？

龔成老師：

中電有質素，是不差的收息股，長線投資無問題。

佢在香港、澳洲、中國等地都有業務。業務穩定，現金流強，這類股適合收息。

雖然股息率唔算好高，但每年的股息都有少少增長，長遠收息正面。現價合理。你保持月供就得。

你可以供夠一手先，之後就停，原有貨持有。之後資金轉供其他，佢增長力始終不強，你應該建立一個更平衡的組合。

------------------------------------------------

Q20728：

龔sir, 你會否建議以碎股方式供股票呢? 融創中國你覺得可以嗎??

龔成老師：

可以，原理是不斷儲貨，由於分多次買入，買入價能平均，所以都是一個方法。

融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，同時明白這一定會令股價較波動，自己最好控制注碼。

------------------------------------------------

Q20729：

我想問中國軟件國際，謝謝你啊sir
我8.45入，係咁跌⋯

中國有贊（8083）你又點睇？

龔成老師：

中國軟件國際（0354）企業本質不差，但行業有少少波動，略有風險，但前景正面。現時大約在合理區頂位。

因為佢太多收入來自華為，這是核心風險，因為這是客戶集中的問題。華為久不久因中美因素，從而影響到這股，大部分都是中短期，當然有一些會發展至長期性。

長遠仍算正面，但無可避免存有風險，你要明白這股股價較為波動，前景可以的。其實只要你持貨不是過多就無問題。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

------------------------------------------------

Q20730：

龔老師你好，本人37歲，月入＄52000，有一層自住已買嘅公屋。每月保費同年金供款約1萬，每月最多可以儲3萬。

資產：
1. 有40萬永明投資基金，3年後可全取
2. 有70萬左右現金
3. 有7萬康宏基金，蝕緊中，原價值9萬8千，已放咗10年，仲有15年先後才可以取，如現在取，只可取2萬
4. 股票：
3000股領展，＄91.6買
600股恆生，＄168買
800股滙豐，＄79.5買
2000股信義玻璃，$22.1買
500股長江基建，$57.2買

請問我嘅股票組合可以點執？想5至8年後有500萬左右，求指教

有諗過買樓投資，但未等到樓市大調整，所以都唔知而家應該買樓定買股好？

其實最想5年後有比而家多500萬，8年後可財務自由。因為而家份工太辛苦，好忙加要周不時返夜。

龔成老師：

買樓都是一個方向，但不用急，因為如果你現時買樓就會動用了大部分資產，同時都會較進取。因此，你可以定5年後才決定是否買樓，最好是買樓當刻，你不需要賣出好多現有資產，等你可以有資產保持增值。

所以，這幾年可以集中在「增值」的層面。

你37歲，財富仍有增長力，但不用太過進取。

你可投資「平穩增值股」為核心，而「潛力股」少少就好了。至於「收息股」，其實可以不投資或不用太多。

現時你持有的匯豐（0005）、恆生（0011）、長建（1038），增長力不強，未必太適合你。

$70萬，暫時可動用$20萬-$35萬。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20731：

龔sir 之前2.4入左4000股四環醫藥00460 宜家keep住跌 應該放定係揸住

龔成老師：

四環醫藥（0460）好翻D，相信無之前咁差。

不過這股，2015年、2016年，曾經出現了核數師有「保留意見」的情況，反映盤數有問題，小心這股。

我對投資這股有保留。

至於業務上，不過不失，盈利變化大，有時有虧損，整體上，唔太建議持有這股，往往炒作多過實際。

------------------------------------------------

Q20732：

龔sir，我每月扣除所有洗費最多有$10000剩，想問下如果投資或儲蓄，應該點分佈會較好？

另外考慮緊月供股票，但涉及每月的手續費都貴，我如果供得少，條數好似唔化算，定一手手咁買好？

龔成老師：

首先，要有一定的備用現金。另外，要睇你本身的投資風險承受程度。

投資股票，要短期不會用的，或者是「閒錢」，買入股票後等長期增值，等企業成長。

例如你可每月投資$5000-$7000，如果月供貴，你就先儲現金，然後慢慢分注入一些優質股，總之你自行分注買入就得。

------------------------------------------------

Q20733：

老師，想請教下：1.為何最近各國央行的國債債息上升會使環球股市指數下跌?如此影響市場情緒

2.常聽量化寬鬆一詞, 說什麼印銀紙和增加流動性, 想請問量化寬鬆貨幣政策對經濟有何影響?

3.國債作為避險資產, 債市和股市之間有什麼關係?跟債息股息有否關聯

4.眼見很多商品價格上升, 看似通脹指標, 通脹是否對股市不利? 通脹是否源於量化寬鬆的結果

5.最後, 美元作為環球商品貨幣, 美匯的低迷對投資者來說有什麼啟示?請指教一下

龔成老師：

1）利息就是企業資金的成本，所以會影響企業營運，從而對企業不利。加上利息會影響企業的估值，因此對股市都會有下跌情況。

2）簡單來說，量化寬鬆印銀紙，市場資金多，就有利企業得到資會去發展，對經濟有利。

3）這是一個複雜的關係。兩種投資工具，會互相影響市場的要求回報率，從而影響兩者的價格。

4）通脹令加息的可能性增加，對股市不利。

5）當美元不斷印銀紙，價值自然減少，這情況將會持續，市場流動資金較多，投資市場上落較大，同時出現資產泡沫的可能性較高。

------------------------------------------------

Q20734：

你好，我是進階班學生，有問題不明白:

1. 由於這股在2020年發行了新股，當我想做比較和用EPS計估值時，以往每一年度的EPS應該怎去調整計算？將每年度的股東應佔溢利除以2020年最新總股數嗎？

2.我附上了1177的功課，用過去十年市盈率做估值，PE範圍是7.303至12.2。如果用價值網提供的2021年預測EPS去計，合理價是2.703 - 4.515；如果用過去五年EPS平均數0.396計，合理價是2.892 - 4.831。我的估價與你的相差很大，請你詳細用你的方法計給我看，謝！

3.你是用幾間大行的預測EPS和預測PE的平均數去計1177的估值，對嗎？

4.計高增長股票的估值時，要用2年後還是3年後的預測EPS去計？或者是1、2、3或4年後的都無所謂？

5.而選擇1、2、3或4年後的預測PE去計估值是否都是一樣原理？

6.你是否在課堂比我地的報告網，找所有大行的預測PE、預測EPS、P/S，然後計潛力股估值？還是你多數問私人銀行提供這些資料？

7.不過我在該下載近一年報告都找不到某些股票(例如中生製藥)的大行預測EPS和PE，是否其他網有？

8.請你詳細說怎計比亞迪的估值。

9.比亞迪的估值範圍？

龔成老師：

1）由於佢多次進行送股，令每股的價值，每股盈利的價值有所改變，因此，要調整先可以進行，而我發現不用財經網站都有不同的調整方法，十分不統一。

所以，最好的方法，就是以「總整數目」去計，而不計每股。

例如以總生意、總盈利去計算，得出整間企業的價值，最後才以最新的發行股數，去除一除，得出每股的價值。

2）由於佢近年的增長加快，所以唔能夠只用過往的市盈率，你要調整，比多少少市盈率佢先得。

起碼去到15倍-25倍，以反映企業的增長力，以及一些新藥令企業價值的調升。

至於EPS，同樣不能只用過往的數，要多用預估數值。

3）這是增長股，我會自行推算佢的盈利，計算2021年、2022年的數據作參考。

4）可以用2年，但去到3、4年，變數就太大，不是不可計，但明白這只是參考下。

5）要睇這股的增長力，你可以同時計，但明白愈後的數，不確定性愈大。

6）我自己都是用該大行報告網站的。

7）有些佢要比錢的，如果有需要，你就比。

8）用預測的盈利作計算，同時市盈率都會用預估。

9）1211係潛力股，但現價仍貴，去翻$120先算合理，起碼都$150。現價投資風險高，最重回翻先月供。

------------------------------------------------

Q20735：

然後十多年前也有投資三個半國內住宅的經驗，不過大部分的錢都是借貸回來，而當時開銷很大，因此每當我撐不住就賣一個，然後就這樣大部分賺的錢都用完了，而且還在十二年前貸了款50萬（當時尚欠48萬）最後也無力歸還，一直拖到現在

因此環聯評級下降到F，當時也錯誤地把已經還清的信用卡全部停掉，只剩一張。但是兩年前已經回到C（最近沒查過）。

因此現在想申請信用卡或貸款也不可以。而現在香港的信用卡欠4萬5，國內兩張信用卡欠八萬人民幣。每月利息也要3千多。

本人現年47歲，太太沒有工作，育有兩個1歲半女兒，我每月固定工資有六萬多，連佣金大概八萬。資產方面我有一份基金已供滿三年的共28萬，另一份每月供7800還有一年半共47萬

這兩份是準備兩個小孩大學的學費（到時候大約140萬，但是好像也不夠兩個出國）。現在的MPF有大約94萬，而我現在的工作雇主和員工都供5%，因此退休時預估共有1千萬左右（每年7.5%回報率）。

另外我的保險已經足夠她們以後的生活。去年因為疫情，舊公司只出一半工資，承諾今年六月前歸還連利息大約39萬，不過要扣掉欠租60000和兩個月保費48000，剩下大約29萬。

我準備預留三個月大約18萬做應急基金。也計劃把香港的信用卡先還清來改善信貸評級。所以可動用只剩5萬。

但是每月開銷蠻大，如下，
香港租金 20000 （跟父母同住，伙食不用管）
國內租金+信用卡 16000
香港信用卡 5000
小孩學習 6000
生活費 3000
保險 24000 （一年半後只需17000）
迷你倉 2300

所以每月只能剩3000左右。最近拜讀你的大富翁致富藍圖，裡面提到不管什麼資產做槓桿都肯定需要有一個好的信貸評級，也需要先購買一些資產。因此我不知道如何改善我現在的困境，畢竟我還是想擁有自己的房子。麻煩龔Sir了。

龔成老師：

你要從基本的理財做起。我相信你要買樓，不是短期的事，暫時不要太急做這動作，你要打好基本的理財先

第一，儲現金，所有野不要急，要儲多少少現金先。

第二，信用卡要準時還錢。不要再申請更多的信用卡

第三，你要做月供股票。

你可以考慮盈富（2800）。

另外再加1、2隻：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

你可以月供，去累積基本的財富。

到你一年半後，保費支出會減少，到時你可以加大股票的月供金額。

你做好這幾年的財務情況先，到你多點現金時，到時先考慮置業。

反而你大部分的資金都在強積金部分，相信你到時退休問題不大。

如果在退休前，你真的要資金去進行理財，可以考慮動用現時的基金保險等資產，但不要急行這一步。

------------------------------------------------

Q20736：

龔成老師，請問以下幾隻股有潛力嗎？咩價錢入手會較好？（全部都無持有）
1137、1833、6618
因我是新手 資金不多預4-5萬放股票先

另外我想月供2800，但我見佢3年的波動都好大 整體都無升，其實月供係要供幾耐先放？

如永遠持有，但我要動用資金時仍需要放出（例如結婚買樓）什麼時候放出才理想？謝謝

龔成老師︰

香港電視（1137）業務有前景，但有兩點存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？另外就是估值方面，我都好難講這刻的估值，只能話唔算平，如果投資，不建議大注。

京東健康(6618)、平安好醫生(1833)都係有質素和潛力，但問題係佢地是有危有機的類別，雖然業務增長好快，但這刻仍處於燒銀紙的狀態中。

估值上好困難，因為無實質的盈利數據作為基礎，市場只是估估下，同樣只宜小注。

月供係一個長線計劃，月供最少維持3年，並持有這些股票5年以上，才會有較理想效果。

我地買入優質股，唔係一直唔放。當去到好貴架水平，我地就會減持部份。或者你有需要動用時，也可以慢慢分段沽出部份，以取回現金。

------------------------------------------------

Q20737：

龔sir早晨，你好，我係投資新手，好多年前叫人講買過下股票493,點知一買就大跌市，一直keep到呢排先放到，都回到家鄉，雖然唔多錢，但都有d驚青，因為一直都覺得股票就係賭博～我從來唔賭錢，驚輸

直至到上個月睇你既post,學到d野，於時我下定決心要去上你既堂（已報5月班）

但我老公知道佐後好反對，覺得要用甘多錢來上股票好白痴，我好無奈，因爲我已經3幾歲，

剛有個小朋友，我份工不穩健～好想把握呢幾年時間做到你講既財務自由，
到時可以自己湊小朋友，而家我已經開始

供緊2800
持有823 [email protected]
1929 [email protected]
1972 [email protected]
3033 [email protected]
我有10萬可以用來投資，我應該仲有咩股可以買入？

我有聽你話留意1448，回返d就可以入

多謝你睇我既msg,因為我同身邊既人講，佢地都覺得我白痴，要俾錢上你堂！

龔成老師︰

我地人生中有好多知識，都係靠上課學習而得來。就好似細個架時候，我地上堂學ABC、123。大過出黎做野，會去返夜校進修一樣，都係正常事。

如果比幾千蚊可以在你一生，創造超過幾千蚊以上的價值，就值得。

我明白別人唔相信自已架感覺，並唔好受。但我想你知道，你身邊架家人，唔係想取笑你，而只係緊張你，先至會有咁架反應。

其實好多人，都停留係買股票就係炒炒賣賣，不服正業，甚至係賭博這個想法。因此，有咁架反應都係正常。

有機會，你試下比佢地了解下你架想法，慢慢咁理性討論，點解你覺得上我堂會幫到你。咁樣做，其實對你今後投資路上，都會有幫助。

講翻股票，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應用"平穏增長股" + "潛力股"的組合。所以，你持股都適合。

每月用5成去做月供，其餘先儲起，用一邊月供一邊儲蓄的策略。現時集中盈富(2800)係可以，更理想係加入一隻潛力股(但維持盈富作主力)，去增升組合增長力。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)、希慎(0014)、太古地產(1972)或
潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）。

大市現處於合理水平，那10萬資金，你可以先用一半，以"分注"形式，慢慢咁去入貨。餘下一半和每月儲蓄，就等大跌市機會出現，才大力度掃貨，並長線投資。

你要留意翻，部份潛力股已有輕微過熱情況。只有安碩恒生科技(3067)、阿里（9988）、中生製藥（1177）、福壽園(1448)勉強算在合理區頂部，可小注入貨，其餘要等等。但月供，現價開始係無問題。

另外，如果你長線都會投資恒生科技股，用安碩恒生科技(3067)會較好，費用率較低。

至於國美零售（0493），你沽出係正確決定。佢質素只是一般般。企業連續出現虧損，品牌價值遠不及從前，優勢不強，雖然正加強網上網售網絡，但仍有未知之數，整體的投資價值唔算高。

股票班見!

------------------------------------------------

Q20738：

老師。請問358江西銅現價合理嗎？

龔成老師︰

江西銅業股份（0358），質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力。

這是商品類企業，盈利會較為資源價格影響，股價較有週期性，你可以持有，現價合理，但預佢增長力不會太強。

------------------------------------------------

Q20739：

成哥，小弟首次置業，想系澳門買層樓，現在有兩個選擇：

1，買350至4百萬的唐樓 樓齡30年左右 呎數700-900呎

2，買5百萬左右的電梯樓 樓齡25-30年 呎數500-700呎

從單位的座向、採光、面積、地點對比，唐樓的選擇空間好過電梯樓

從以後樓換樓的角度對比，電梯樓以後再放出去的價值相對唐樓保值

我們兩公婆持有股票大概市值250萬 沒有負債 現金不多，現階段本人月入1萬3
（從事港澳船客運服務疫情影響公司出緊半份糧），老婆月入1萬2左右

首期最少比兩成（如買樓需要放最少三分一市值股票作為首期）打算自住為主，請問應如何做出選擇？現時值不值得入市？謝謝！

補充：現在每月租金支出7千2

龔成老師︰

初步睇，電梯樓應該會較好。當我地分析時，會以「資產長期角度、長期價值去分析」。

因為唐樓上左年期，可能會有不少潛在維修費用。而且，係銀行做估值都未必咁足。

再加上，作為自住樓也未必太方便。當然，你都要從交通、地區潛力等，去再加以評估。

至於是否入市，你可以跟同區物業比較下。作為自住樓，如果價格合理，而自己又"供得起"，基本上己經可以入市。

當然，我地進行財富配置，最好是做到「平衡」，例如股票、物業，都有一部分，你盡量做到這點。你賣出部分股票是可以的，完成置業後，加大儲蓄投資，慢慢增加翻。

------------------------------------------------

Q20740：

您好！最近我就留意藥業股，分別為石藥(1093)和中生製藥(1177)。對此有以下幾個問題：

問題一：石藥(1093)和中生製藥(1177)PE分別為23.792倍及56.35319。後者是不是股價過高?

問題二：對比其他行業，藥業PE值比其他高。您認為藥業來講幾多才算合理？

問題三：論2019年來講，石藥(1093)ROE較中生製藥(1177)高，理應前者較值得投資，
但後者較多人留意。請問你怎樣看呢？

龔成老師︰

1) 我地唔可以單憑市盈率高低，就判定一間企業比另一間平或貴。就算行業一樣，當中業務潛力等，都可以好唔同。同時，市盈率只反映過去一年的盈利，而我地要分析之後的盈利，更立體分析。

現價計，石藥(1093)在合理區中間，而中生製藥(1177)則在合理區頂至略貴水平。

2) 藥業未來發展係正面，但市盈率幾多少算合理，要視乎企業本質，不能一概而論。

3) 其實ROE係反映倒，石藥(1093)2019年賺錢能力較高。但我地睇一隻企業，唔可以只單單睇1,2個指標，或者只係1,2年架數據。要全面考慮長線質素，行業發展、財務狀況等，去得出一個全面架分析。

中生製藥（1177）本身己有一套完善的營運系統，集團己擁有多個賺錢的藥品類別。在高毛利支持下，可以不斷將錢再投資在新藥裡。這種經營模式下，相信長線發展可維持正面。

2隻股票都有質素，但中生(1177)相對潛力會較高。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。