《住家男人》
有日同班朋友傾計，大部份都已經結婚成為住家男人，傾傾吓突然講……
「嘩，最近超市買牙膏送好多野喎，又送飲品又送米又送紙巾咁，你哋有冇買啊？」
「傻的嗎？牙膏肯定去藥房買平啦，超市二十幾三十蚊一支，藥房十零蚊就有喇！羊毛出自羊身上，你估真係送比你咩？」
「係喎，上次我收工去買菜，收檔前一份菜五蚊咋，我買一份，個阿姐話見我咁靚仔送多一份比我，最後我五蚊拎咗六個生菜走，都唔知點食……」
「收檔菜一定無咁靚喇，食好野一定去街市上面有一間，佢賣嘅豆杯甜到呢！」
「個間我都有買，係喎，買丸記得去個檔，又平又好食！」
「妖，我早幾日去買雞湯，平時39.9三盒，原來仲可以平到12蚊盒！真係低處未算低啊！」
「39.9我都買開喎，好多野都公價，久唔久先會跌過條線，好似紙巾32蚊都算啦，唔通真係等佢減價先買咩？」
「唔係囉，次次紙巾一平我就買兩三條返去放……」
「有冇咁精打細算啊！」
一輪討論，其中一個未結婚嘅朋友反晒白眼，而我哋見到佢咁，亦沉默咗，平時講女講錢講動漫嘅我哋，竟然開始講買餸……真係幾年前完全無想像過。
自己住之後，一日三餐都要自己處理，由一開始早餐叫外賣或者落茶記食，中午返公司附近吃，夜晚又要搵野食，作為一個無飯家庭每餐都好自由，以外細個好鐘意出街食，但原來真係每餐都出去食係好悶，有時真係想自己煮返餐飯食吓，亦開始反思一個菜先個十蚊八蚊，出去炒變成四五十蚊，自己煮同洗都唔係咁麻煩姐。
以前放工去旺角行吓街，去信和睇吓漫畫，去油麻地睇玩具，又或者去商場睇吓衫同鞋，依家放工多咗機會去街市，由唔識講價，去到同個阿姐都熟咗。
同老婆以前會去行街，依家更多係去行超市，兩個人一齊睇吓嚟緊幾日食乜煮乜，行街亦多咗睇家電、家品，會諗屋企需要乜野多。
夫妻生活，人生就好似多咗對方咁，比起拍拖係好唔同，因為你做乜買乜都會諗多咗對方。係屋企洗衫拖地洗碗完成後會覺得自己身心舒泰，而兩個人返到屋企之後做好晒野，開個電視，沖杯茶飲，生活如此簡單就好開心。
不知不覺間我哋成為住家男人，唔單單再係一個只識玩樂嘅毒撚，如果以前睇今日嘅自己一定覺得搞錯啊，咁悶都得？
但今日嘅我如果可以同以前嘅自己講，我會話，你試吓啦，試完話唔定你都會鐘意呢。
