《追女仔就係SELL你自己》
因為最近寫緊本《罪愛》，超多現實嘅愛情觀出現喺腦海，我決定寫一篇關於「現實愛情」嘅文章，會用廣東話。
首先要講，千其唔好當我愛情專家，我最怕係咁，我係一個小說作家，我聽開好多故仔，關於男男女女關係等等，我最高峰一日試過收過百舊幾個INBOX問愛情問題，都要講句對唔住，唔係個個都覆，因為你就一個人SEND比我，而我就要一個人覆幾十甚至幾百個人。
我再次重申一點，世界上冇愛情專家，我只係「分享」。
入正題。
如果你生得似李敏鎬又高大又靚仔，唔洗睇落去，啲女比你溝曬架喇(係，係有小小妒忌，點解咁唔公平？嘿)。如果你生得似金正恩級數或以上「好少少」，可以睇睇冇妨，至少你會注重下儀容。點解要咁分類？因為98%嘅仔，都唔會係李敏鎬，都會衰一樣嘢，就係．．．
「冇、自、信」。
係，重有一點(今次寫得好隨心，後加返，嘿)，我講緊係「搵一個女仔拍拖」，唔係「搵一個女仔上床」，如果你係想搵SP，你可以上去啲交友APP碰下運氣，唔洗睇。
講返冇自信，你唔靚仔、唔高大、人肥、冇車、冇樓、冇錢已經係「注定」(當然，你可以變好，嘿)，但唔應該係「冇自信」嘅原因，你要識得SELL你自己出去先至係「重點」。我做咗十幾年SALE，老實講，「任何產品嘅『價值』都根本唔值果個『價錢』」，點解啲你會買？點解啲（又可愛又溫柔人又靚)嘅囡囡，一樣會買？
因為，一個成功嘅SALE屎，係會．．．「識得SELL產品之餘，SELL埋佢自己」。
一、唔好自貶身價
追女仔第一件事，唔好喺佢FB、IG留咩「SO SEXY BABY！」、「妳好靚好正好索呀！」，老實，未開始，你已經降低咗自己個LEVEL，囡囡要嘅「虛榮感」，唔洗你比，係佢啲兵比嘅，你要記得，你嘅目標，唔係做兵，係做佢個男朋友，你自己唔好將自己個「定位」降低。風趣幽默可以，重點係要佢留意到你，唔係要同其他人一樣「SO SEXY BABY」。
「銷售目標要清晰，唔係狗公嘅目的。」
二、第一印像
依家嘅第一印象，已經唔係見面，而係．．．「你FB張相」，唔該搵張好少少嘅相，唔洗靚仔架，可以係「型」或者「有品味」。唔好自戀，女人可以，男人唔得，就好似你見啲囡囡日日放自拍相冇問題，但見個男人日日放，你會想打七佢咁(隨心打粗口)。唔洗見樣都得，背影都OK，我唔建議用卡通又或者動物相，除非你養咗條中華白海豚，夠話題性。
「產品唔一定要靚仔，最重要有款有氣勢。」
三、講野要有營養
無論FB、IG、Whatsapp、Line咩方式聯絡都好，「今日妳食咗飯未呀？」用一兩次就可以，日日問一啲冇營養嘅問題，重衰過你問「今日妳食咗屎未呀？」，咁咩叫「有營養嘅說話」？好簡單，而且好重要，就係．．．「佢有興趣嘅話題」，當然，對你黎講可能冇營養，不過，話明「追女仔」，當然係「客戶需要」最緊要。追一個女仔，點都要做啲資料搜集掛？你唔係諗住咩都唔做，佢就會愛上你？韓劇好、品牌野好、公仔好，有啲可能係股票、世界大事等等，資料搜集完要MARK低佢，要諗多啲問題準備定。記住，你係「追、女、仔」。
「要清楚客戶嘅需要，唔係冇營養得淡笑。」
四、唔好變成兄弟FEEL
好喇，有返咁上下熟喇，就會出現一個「變成兄弟FEEL」嘅問題，當你變成咗阿哥細佬位置，好大機會會變咗EASON首歌「不聚不散 只等你給另一對手擒獲」，係，比人「擒獲咗」個囡囡，然後佢唔開心就搵你傾，你到時又要唱柏豪首「六天 日本 為你 準備」。所以，你要有意無意表明你係想追佢，適當嘅時候要表達關心，唔好熟咗就坐定粒六，有機會就要出手進攻。
「表明銷售嘅誠意，唔買都可試一試。」
五、知難而退
最想講依點，同時都係「最重要」嘅一點。兄弟，你要記住，你係「不斷升緊值」，男人年紀愈大愈有MARKET，女人反之(冇辦法，世界好現實，女人自己最清楚)，所以唔好冇自信，就算追唔到，都輸得有「尊嚴」啲，咪鬼死纏，唔係講笑，當你有一日有返咁上下「閱歷」嘅時候，佢已經唔會係你目標，你會有更多選擇，請相信你自己，記得．．．「女死女還在」。
「今次做唔成依單生意，唔代表之後冇下一次。」
寫咗一晚，都未寫到「約會」，嘿，有時間再寫。講少少，我有位空姐朋友，同個男仔第一次約會，個男仔話去「意粉屋」，空姐食完果餐就冇再聯絡。其實，唔係「意粉屋」有問題，而係．．．「你唔係想佢當你普通朋友，而係想追個女仔」，所以，門面嘢係要做嘅，點都搵間高級啲餐廳仔啦，好喇，下次有機會再講。
孤泣字
