隻狗幫我追女神（上）
呢個年代，做兵都唔容易。
特別係我女神芸芸，又靚又可愛，大把男仔爭住為佢服務，我要搵個進貢嘅機會都幾難。
好彩，呢次芸芸去旅行，佢要搵個可靠嘅人……梗係唔係陪佢去旅行啦，係照顧佢隻狗旺財。
大家都話，要追一個女仔，最好打動埋佢嘅家人同朋友。
芸芸成日話，狗係人類最好嘅朋友，今次我有機會照顧佢最好嘅朋友，為佢分憂解難，仲可以展現我充滿愛心同耐性嘅一面，絕對係大好機會。
為咗爭取機會，我即刻衝去最近嘅寵物店，買晒相關嘅寵物用品，乜嘢狗糧狗碗狗廁所。
然後影相Send畀芸芸，展現我「萬事俱備，只欠旺財」嘅誠意。
芸芸問：「你有養開狗㗎？」
「唔係，但我一直都好想養狗，我已經做晒資料搜集……」我講咗一大輪，芸芸終於決定，將呢個神聖嘅任務交畀我。
芸芸將旺財送去我屋企，仲交待我每日要拍片Send畀佢。
嘩，芸芸叫我每日都聯絡佢，呢個係從來未有過嘅待遇。
芸芸上咗機，我開始服侍旺財。
有一次，我清理旺財嘅大便，我忍唔住講：「旺財啊旺財，你記住對芸芸讚吓我，話我照顧得你好好，話我溫柔又有耐性……」
其實我都係安慰吓自己，我都知狗唔識聽我講嘢，亦唔識講人話。
點知，我聽到一把聲：「執兩舊屎，就想我幫你講好說話？」
我呆一呆，難以置信地望住旺財：「你聽得明我講嘢？」
腦裡把聲都有啲驚訝：「你聽到我講嘢？」
我好混亂：「你唔知我聽到你講嘢，你點解同我講嘢？」
糾纏咗一陣，我先搞清楚發生咩事。
據旺財所講，某啲「絕頂聰明」嘅狗，係有能力同人類溝通。
只不過，每隻狗、每個人嘅頻率都唔一樣，所以好多狗終其一生，都遇唔到溝通到嘅人類。
我恍然大悟：「即係我從來都聽唔到其他狗講嘢，但咁啱聽到你講嘢？」
「應該係啦，我主人都聽唔到㗎。」
旺財話鋒一轉：「既然你聽到，咁就快快手手，幫我去買我最鍾意食嘅罐頭啦。」
為咗巴結旺財，我馬上照做。
見旺財食得津津有味，我趁機問佢：「旺財兄，你都知我想追你主人，呢件事你點睇呢？」
「本來我覺得你襯唔起我主人，但你聽到我講嘢喎。」
旺財講：「雖然主人對我好好，但有時我唔鍾意食嘅嘢，我又話唔到畀佢知。我都想你做我嘅男主人，到時我想食乜玩乜都可以同你講。」
「如果我追到芸芸，你就係我嘅恩人……恩狗，你想點都得。」我馬上許下承諾。
旺財開始分析：「主人聽唔到我講嘢，所以你要我幫你講好說話，係不切實際嘅。」
「呢個我都知。」我諗一諗：「可唔可以用其他方式表達，例如芸芸嚟接你嗰陣，你就攬住我隻腳，扮到好唔捨得我咁？」
旺財用一種望白痴嘅眼神望住我：「你會唔會因為隻狗唔捨得一個人，而聯想到『我要同佢一齊』？」
咁又係，呢個年代，連「父母之命」都唔話得事，「貓狗之命」邊會有用？
旺財話：「不過，我了解主人嘅喜好，我可以通水畀你。」
我嘆氣：「我都知佢喜好啊，佢每次出post我都有睇，我知道佢鍾意去邊間餐廳、著咩牌子嘅衫……」
「但每個人都有啲嘢，係唔想畀人知。人對住狗，係唔會掩飾嘅。」旺財神神秘秘咁講。
我即刻出去買咗一堆美食玩具，進貢畀旺財。
下集：https://bit.ly/3fQbB0b
將專頁設定為「搶先看」/ "See first"，最新故仔馬上睇！
終極邪惡：https://goo.gl/cF1Q9A
第一次撞鬼：http://bit.do/fdmiL
#短故 #短篇 #小說 #陳美濤 #廣東話 #粵語 #tomatochan #隻狗幫我追女神
男仔 想追你 在 【女仔對男仔有好感】3招測試女人是否都鍾意你的技巧！ 的推薦與評價
... 男仔 有好感#女仔口不對心#女仔面紅#對住鐘意既人#女仔唔主動搵你#女仔想溝你的暗示#怕羞女仔#女仔俾signal #女仔比暗示#女仔太主動#女仔 ... 追走啦| (愛情)( ... ... <看更多>