罐頭人生（下）
上集：https://bit.ly/3bpKGbr
第一世，我果然係富二代，係一對有錢夫妻嘅獨子，佢哋對我如珠如寶。
但去到十歲，狗血嘅劇情發生喺我身上。
父母突然發現，原來當年醫院掉亂咗嬰兒，我根本唔係佢哋個仔。
佢哋毫不猶豫咁將我趕走，努力補償親生仔。
我返去親生父母身邊，但親生父母已經離咗婚，阿爸變咗一個酒鬼，每日飲完酒就打我。
終於有一次，佢酒後錯手將我打死，嗰年我先十二歲。
離開罐頭後，我馬上意識到，我根本唔係小朋友，而係一個行將就木嘅老人。
但對親生阿爸嘅怨氣、懷念養父母嘅求不得、對佢哋親生仔嘅嫉妒，通通纏繞喺我心頭。
罐頭嘅畫面實在太真實，之後我幾乎晚晚都發惡夢，夢見養父母嘅冷漠、親生阿爸猙獰嘅面孔……
直到老人院派新嘅罐頭，我先鬆一口氣。
我希望，今次可以抽到幸福……至少係平平淡淡嘅人生，將我從惡夢中解脫。
我抽出另一個罐頭。
第二世，我係一個女仔，出身普通，但我好勤力，憑自己嘅努力，成為咗一個醫生。
我一直專心工作，賺咗好多錢，都冇時間拍拖。
直到四十歲嗰年，我遇到一個溫柔嘅男人，我以為佢會係我嘅真命天子。
但原來佢嘅溫柔，只係為咗呃我嘅錢，佢好快就呃晒我成副身家，逃去無蹤。
中間我聽佢話，利用醫生身份，幫佢做咗啲唔見得光嘅嘢，連個牌都釘埋。
失去一切嘅我，喺一個冰冷嘅夜晚，跳海自殺。
離開罐頭後，我比上一次更悲傷。
或者係因為生命嘅時間更長，總之，嗰種拚搏一生，最後一無所有嘅絕望，我日日夜夜都放唔低。
好不容易等到下一個罐頭，我抱住最後一絲希望打開，點知又係一段悲慘嘅人生。
一次又一次，次次都係咁慘。
我終於意識到，人生係冇希望嘅，所有人生都係痛苦嘅，愈長嘅人生就愈痛苦。
我冇再打開「人生罐頭」，但回憶係放唔低，我成日都瞓唔著，身體愈嚟愈差，好快就步向死亡。
有一晚，我又諗起某段人生嘅悲慘，實在瞓唔著，靜雞雞咁起咗身，出去行吓。
行出大廳，我隱約見到，兩個護士喺度分緊罐頭。
係喎，聽日又係派「人生罐頭」嘅日子，但我已經唔再開罐頭，所以都唔關我事。
呢個時候，突然聽到護士A講：「分清楚啊，呢批係悲慘嘅罐頭，就留畀一樓啲廢老。」
護士B問：「點解呢？」
「唏，一樓啲廢老都係窮鬼，政府夾硬要我哋收㗎啫。啲悲慘嘅罐頭，咪留畀佢哋囉。」
護士A繼續講：「而樓上嗰啲係客人，生存多一個月，就畀多一個月錢。咁梗係要畀啲美好人生嘅罐頭，等佢哋開開心心，長命百歲。」
護士B問：「乜『人生罐頭』開之前，分到個人生美好定悲慘㗎咩？之前睇新聞，唔係話分唔到？」
「人會進步㗎嘛，收咁多負評，製作商都改良咗，不過好似唔係100%顯示正確。咁啱政府又話要派罐頭畀老人院，咁咪搵啲廢老做吓實驗咁。」護士A撇撇嘴。
我呆咗。
我一直以為，自己次次都抽到悲慘人生，係我黑仔。
點知原來，所有嘢都係被安排好。
我係一個窮鬼，所以就算人人都派「人生罐頭」，派畀我嘅都係最差嘅罐頭；要體驗新嘅人生，只可以體驗悲慘嘅人生。
你以為世界有公平？
但最唔公平嘅事，往往喺你以為公平嘅時候發生。
—完—
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #罐頭人生
