【呢一年你經歷嘅嘢，除咗政治問題仲有乜？】
我想講，我好多。原來，一切都係個連鎖效應。
今日我諗大家都係俾相類post洗板，我唔叻政治或社會分析，無謂獻醜，但都想講吓呢年個心路歷程。
話說以前我唔係冇留意時事或政治，未至於去到政治冷感，但同時都未去到願意走出嚟地步，七一曾經有出過嚟行，但都試過有朋友叫我出去行，我覺得好熱不如算。
直至一年前今日，我諗某程度上都由一隻港豬醒覺咗。
然後，連鎖反應就較大。由社會運動去到疫情，呢一年我做兩份工，俾人炒咗兩次。社會運動同疫情喎，梗係有得賴，仲要一炒就係成Team起，或者部門摺。你想「好嚟好去」，奈何兩間公司都最後都有小小不和氣收場。一年嚟你咁樣去見工，都會俾人問起你做乜做咁短、做乜俾人炒、做乜咁又做乜咁，其實有頭髮邊個想做癩痢，我想嘅咩？當然，呢段時間更唔鍾意嘅係，去見工會問你政治立場，我都唔知點答你好。
以前面對呢種情況，大家都會話「轉行囉」「去外國讀書囉」，但係今時今日你連自己老本行都冇人請，又邊度都去唔到時，呢啲「夢」，我諗都好難實現到。
喺呢啲低潮時期，以往最好治療方法，都係去睇戲或者旅行。一年前俾人炒，錢唔多我都去咗轉泰國、一個人喺泰北山區放空原來好正，今日你邊度都去唔到；一年前你留港，仲有得睇《阿拉丁》、《蜘蛛俠：決戰千里》、《反斗奇兵4》等等Popcorn片忘憂，一年後你只睇到大量倉底貨同爛片，本身心情已經唔多好，睇完心情更差，到底我睇咗啲乜。
以往失業時期，我好多時都會搞吓讀者聚會，俾我有少少嘢寄託下，都喺極無聊生活入面，有個目標去衝，真心每一場同讀者嘅交流，我都係開心嘅，仲因此識多好多朋友。托賴下星期嘅包場成功做到，都希望當日一切順利，但過去呢一年我真係唔敢搞。你點知會唔會樓下突然烽煙四起，又或者突然有人衝入嚟話你非法集結要清場，所以呢一切都冇做到。
以往我經營呢個場係開心架，睇完套好戲同大家分享、睇完套爛片同大家恥笑，但過去呢一年，好多時出post都要諗過。唔係話怕講錯政治敏感嘢，而係可能尋日打到九彩、可能尋日突然爆咗一堆確診、可能唔知邊個高官又突然講咗堆難聽說話，你仲粉飾太平話套戲好好睇，我又講唔出，不如隔幾日先。同埋，有時面對住呢啲新聞，加上自己前途迷惘，我諗係成個人嘅精神健康都好差，有時我唔識得同大家嘻嘻哈哈咁樣出post。
呢一年嚟，我諗唔止係我，好多香港人（依家全世界啦）嘅生活習慣都徹底改變咗，或者你個人本質仲好健康，但精神健康大家都唔多好。嚟到呢個年紀，以往嘅人生太不堪，講真係時候要去轉變，奈何撞正個咁嘅環境，我諗一時三刻都幾難變得到。以前就算冇嘢做，我都會周街去，四圍行下總有地方好去，但如今我唔多想戴住口罩周圍行，變相有時起身你唔知今日做乜好，果下嘅精神狀態都會極差。
我諗好多「沉默的大多數」都係覺得，唔好搞咁多政治啦，安安定定咪幾好，但呢一年嚟自會發現，你不碰政治、政治都會碰上你，你就算覺得做個順民咪冇事囉，但順民還順民，有啲生活習慣，都係會從此改變。
一年前你有遊行集會自由、一年後嘅今日，已經冇了。
好多朋友會話，走啦，快啲移民。等同於成日有人叫你「轉行啦」，喂唔好話有人請，「轉行」嘅工都冇得你見呀，同樣道理，有錢有門路我夠想啦。呢排我開始有睇多咗相關資料，但我諗都唔係一時三刻就做到。
我唔會好樂觀咁同大家講，明天會更好、撐得過呢一年，未來一定撐到之類說話，以前講得出，今時今日呢個環境我都唔敢講喇。不過話說我早排lost到一個點，走去算命，師傅話我呢幾年真係黑到一個地步佢都唔好意思講，但今年下半年會開始轉運有反彈。有朋友會覺得我做乜咁八婆，但有時唔知點樣好都要搵個心靈寄託。唔好嘅嘢就無謂信、好嘅嘢我會催眠自己去相信。朋友話「吸引力法則」呢樣嘢，你去相信就會成真，我會催眠自己去相信，如果我真係有運嘅，希望可以感染埋各位讀者。
【‼️留意‼️】
「晞。觀影記事」Patreon加強版已經開幕，更多精選深度獨家電影文章，請即訂閱：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
