Life in Japan~東京白山神社「繡球花祭」
6月係繡球花季，想喺東京睇繡球花嘅話，好多人都推介去鎌倉，因為單係鎌倉已經有3個著名睇繡球花嘅景點！不過唔想去咁遠，打算近近地喺東京市區睇繡球花，網上一樣有好介紹，就係位於文景區嘅「白山神社」~
「白山神社」種咗數千棵繡球花，佢仲會聯同「白山公園」舉行繡球花祭，大家可以一邊賞花一邊感受傳統節慶氣氛。今年6月Mean娜就去咗2次「白山神社」睇繡球花，一次係繡球花祭之前去，一次係繡球花祭期間去。
老老實實，「白山神社」嘅繡球花冇想像中咁壯觀，雖然佢種類多但由於種嘅位置唔算集中，所以整體感覺有點疏落，冇幻想中一大片繡球花嘅畫面，不過獨立睇啲繡球花都依然好靚。
喺繡球花祭之前去同期間去都有好有唔好，之前去就少人好多，但就冇咗祭典氣氛，同埋有一個種滿繡球花嘅小山丘未到繡球花祭時都不設開放，不過由於冇咩人嘅關係，影相就會易好多；而喺繡球花祭期間去，就會有好多小攤檔同表演，成件事好有Feel，不過同時都勁多人！要搵個靚位影相都難好多。同埋嗰個繡球花小山丘唔好以為開放左就等同你入到去睇，因為屆時係有勁勁勁多人排隊，當你見到長長人龍，又見到個小山丘其實真係好小，只係兜個圈就完，就好容易會放棄排隊入去。
總括而言，如果你係為清清淨淨咁影下相，就建議繡球花祭之前去，因為除咗小山丘，其他地方都係自出自入任影相；如果想感受日本節日氣氛，就建議繡球花祭期間去，雖然好多人唔易影相，但熱熱鬧鬧的確開心好多~！
